1 Muhhuba lekutanga letshipi, kutjimangwanana ngwanana, bakayenda kukumbu bakasenga mhoza yabaka bathama. 2 Bakawana bgwe laka lakahhalila kumbu lakunguludzigwa kutjena nekumbu, 3 koga bakati bangina mukumbu mbili waHe Yesu bakawun'haya. 4 Bakati batjimile betjakatjenamisiwa nayikoku, bakabona babemile nebalume babili bakambala zwiyambalo zwinopenya; 5 ngentha yehla bakakotamisa miholo pasi, ibabo banhu beba beti, "Mohakilani umpenyu kubafi? 6 Aatapo pano, wamuka, kumbulani tjaakamubudza etji kuGalile, 7 wakati, ‘Nkololo wenhu wakafanila tengesewa kubatjinyi, akakowhomegwa, muhhuba lebutatu unowhomuka.’ "

8 Bakaalakana matama awe, 9 bakati bahanduka bebva kukumbu, bakabudza badiyiwa bali gumi lina un'ompela nebamwe bose kose ikoku. 10 Kwaka kuli Mariya wekuMagadala naJowana naMariya mayi baJakobe nebamwe babaka banabo, bakabudza bapositoli; 11 koga matama iyawa akanga zwilebo zwisina mano, abazobagalamoyo. 12 (Koga Phethiro wakamilika elabuka eyenda kukumbu, wakati eswika ehohhela mukumbu, akabona matjila elineni woga, akamilika eyenda ezwibhuzwa kuti ini tjayetika.)

13 Hhuba ilelo zwalo bamwe babo babili baka beyenda kunzi unoyi Emawusi, kungaba mamayili ali kutondeka ubva muJerusalema, 14 baka beyenda belebeleka nekwezwinhu zose izwezwi zwayetika. 15 Bakati batjazuwa belebeleka nekwezwinhu izwezwi, Yesu tjekukwe akasedzela, akabhatisana nabo zila. 16 Koga meho abo akakon'wa wunziba. 17 Eba eti kubali, "Moyenda muzuwa nekweni kene?"

Bakama, belingika besakahanha. 18 Umwe wabo, unoyi Kilopasi, waka wun'handula eti, "Umwezi kani muJerusalema usingazibe zwayetika ko mumahhuba iyawa?"

19 Eba eti kubali, "Zwinhu zwipi?"

Beba behandula beti, "NekwaYesu wekuNazaretha, waka ali nlebesambeli ana masimba makulu mumatama nemukuyeta, mbeli kweNdzimu nebanhu bose. 20 Nekuti baphirisiti bakulu nebatungamili bedu bakawunsungisa kuti atongegwe lufu, bekawunkowhomela. 21 Koga taka tagalabgwe kuti ndiye unowhosunungula Isirayeli. Pehhugwi kwayikoku kose, ileli ihhuba lebutatu kwayetika ikoku. 22 Kakale bamwe bomme bebunga ledu batitjenamisa nasi, bayenda mahhakuyedza kukumbu 23 mbili uwe bakawun'haya; kakale bahanduka beti babona mbono webatumwa bekudzimu, bakababudza kuti umpenyu. 24 Bamwe batatili toseni bayenda kukumbu, bakanowana kuli sekwalebgwa nebafumakadzi; koga iye tjekukwe abazowumbona."

25 Iye eba eti kubali, "Imwi zwilengwe, mimoyo yenyu inononoka galamoyo kose kwakalebgwa nebalebesambeli! 26 Kwaka kusakafanila kene kuti Khirisitu adziyidzike nayiyeyi zila ekotjingina mugudzo lile?" 27 Wakabatjenesela tjakalebgwa nekukwe muwhalo, etangisila kuna Mozisi, nebalebesambeli bose.

28 Batjiba pedlo nenzi wabaka beyenda kuwunli, iye wakathama senhu unopinda, 29 koga bakawunkumbilisisa beti, "Yezela pano naswi, ngobe kwatjihwa, hhuba lamila." Wakangina akagala nabo. 30 Nelubaka edla nabo, wakatola tjinkwa, akaboka, akatjipemula akabapa itjo. 31 Meho abo akahhulika bakawunziba; eba emila mbeli kwabo. 32 Bakabhuzwana beti, "Tatisingawhe kuhanha mumimoyo yedu lubaka gwayelebeleka naswi muzila, etitjenesela whalo?"

33 Bakamilika tjinyolotjo bakabgwilila kuJerusalema; bakanowana badiyiwa bali gumi newun'ompela bakakubungana nebamwe babaka banabo, 34 bakati kubali, "He bamuka kwemalebeswa, bazwilakidza kuna Simoni!"

35 Ibabo babili bakababudza tjayetika bali muzila, nekuti bakakowunziba tjini epemula tjinkwa.

36 Bakati betjalebeleka, Yesu tjekukwe akama pakati kwabo, akati, "Kunyalala ngakube kumuli."

37 Bakalobgwa nehana, bakahla bekumbula kuti babona puku. 38 Iye akaba eti kubali, "Ngentha yeni mudziyidzika, nentha yeni muna kubvubvuma mumimoyo yenyu? 39 Lingani maboko nemakumbo angu; ndimi, mundibhate mubone ngobe puku atjina mafupa nenyama sekwamunobona ndinako."

40 Wakati eleba ejalo akabalakidza maboko nemakumbo awe.* 41 Kwakati besanhu bakagalamoyo tjabanobona ngentha yehanha netjenama, akaba ebabhuzwa eti, "Muna tjinodliwa pano kene?" 42 Bakawumpa nhango yewhobe yakagotjewa, 43 wakayitola akayidla mbeli kwabo.

44 Ekotjiti kubali, "Ndiwo matama angu andakamubudza iyawa, lubaka titjitoseni, kuti kose kwakakwagwa nekwangu munlayo waMozisi nebalebesambeli nemunjimbo kwakafanila hhadzisika."

45 Ipapo wakabahhula mikumbulo kudze bawhisise whalo, 46 akababva eti, "Ndizo kwakakwagwa, kuti Khirisitu wakafanila dziyila ekomuka kubafi muhhuba lebutatu, 47 kose nekuti handuka neyetigwa mazwibhatigwa matjinyo kwakafanila sumikigwa muzina lile kuzwitjaba zose kutangisila muJerusalema. 48 Imwi muna busupi nekwezwinhu izwezwi. 49 Lingani, ndowhomutumila tjamakagadziwabgwe naTate bangu; koga mugale munzi-nkulu, kuswikila mangin'wa nemasimba anobva pehhugwi."

50 Wakabhuda nabo, akabatungamila bakayenda bakadza bakanoti kuBhethani, akamilidza maboko awe, akabakombolela. 51 Kwakayetika kuti atjabakombolela, wakapalalanyiwa nabo, akatogwa akawulukila kudzimu. 52 Bakawunamata, bakabgwilila kuJerusalema bakahanha kwazo, 53 bakagala tjoselele beli muthempeli, belumbidza beboka Ndzimu.