1 Munsi wesabatha, epalama mudziminda, badiyiwa babe bakakowha miholo yezwidlo bakadla, bezwizozonga mumaboko abo. 2 Koga bamwe baFarisi bakati, "Kati motilani tjisingabvumigwe yetiwa muhhuba lesabatha?"

3 Yesu wakabahandula eti, "Imwi amuzobala tjakayetiwa naDavida abhakhwa nehhala, iye nayibabo baaka enabo. 4 Kuti wakangina tjini mun'umba yeNdzimu, akatola tjinkwa tjakayengemala, tjaka tjisingabvumigwe dliwa nenhu kuhhe kwebaphirisiti, akadla, kakale akabapa bo baaka enabo?"

5 Eba eti kubali, "Nkololo wenhu ndihe wesabatha."

6 Umwe nsi wesabatha, paakangina musinagogu akadiya, kwaka kuna nlume waka ana luboko gwakahwehwana. 7 Bakwali nebaFarisi bakawunteya, behaka bona kuti unowhotjidza kene muhhuba lesabatha, kuyetila kuti bawuwanile nlandu. 8 Koga iye wakaziba mikumbulo yabo, akakoti kunlume unaluboko gwakahwehwana, "Milika, ume pakati." Akamilika. 9 Ipapo Yesu akati kubali, "Ndomubhuzwa, kumunlayo kuti uthame tjakalulama muhhuba lesabatha kene kuti uthame tjakayipa, kuti utjengetedze butjilo kene kuti ugupaladze?" 10 Wakabalinga bose ekotjiti kunlume iwhoyo, "Tambunudza luboko gugo." Akathama ejalo, luboko gugwe gwaka gwatjitambunuka.

11 Bakahhala buhongola, bakalangana kuti Yesu bangawunta betini.

12 Mumahhuba iyawo wakayenda kudombo enotembezela, akatembezela kuNdzimu busiku gose. 13 Kwayedza wakadana badiyiwa babe, akahala bali gumi nebabili, baakapa zina linoyi bapositoli; 14 Simoni waakadana eti Phethiro nenun'una uwe Andhireya, naJakobe naJohane, naFiliphi naBhatholomewu, 15 naMatewu naTomasi, naJakobe nkololo wa Alifiyasi, naSimoni (Njhuta unogwila lusununguko), 16 naJudasi nkololo waJakobe naJudasi Isikariyoti, wakakoba ntengesi.

17 Wakajita nabo, akanoma mugula nebadiyiwa babe banjinji, kwaka kuna lukawu gwebanhu baka bebva muJudiya yose nemuJerusalema yose nemuntha dzimunsumho wegungwa leTire neSidoni, baka babuya kuti bawhowha esumikila nekuti abapodze nghwele dzabo; 18 nebaka bedziyidziwa nemeyambi bakapodzewa. 19 Banhu bose bakayedza wunkunha, ngobe masimba aka ebhuda muwunli ebatjidza bose.

20 Wakalinga badiyiwa babe akati,

"Makakombolegwa imwi bahayi;

ngobe tjenyu bumambo gweNdzimu!"

21 "Makakombolegwa imwi banahhala ngwenuwali;

ngobe mowhogutshiwa!"

"Makakombolegwa imwi munolila ngwenuwali;

nentha yekuti mowhoseka!"

22 "Makakombolegwa imwi hapa banhu bemuhema, bemumbuka bemudusa pakati kwabo, bemutuka, betola mazina enyu se akayipa, ngentha yeNkololo wenhu! 23 Muhanhe muhhuba ilelo, mutambe nekuhanha, ngobe mbhayilo wenyu unkulunkulu kudzimu; ngobe bobatategulu babo ndiko kwabakathama bo kubalebesambeli."

24 "Koga kwakamubangalalila imwi bafumi;

ngobe matjiwana nyaladziwa kwenyu."

25 "Kwakamubangalalila imwi makaguta ngwenuwali,

ngobe mowhobhakhwa nehhala!"

"Kwakamubangalalila imwi munoseka ngwenuwali,

ngobe mowholila mukakuwa."

26 "Kwakamubangalalila hapa mulebgwa zwakanaka nebanhu bose, ngobe botate babo baka beleba zwakanaka nekwebalebesambeli bemanyepwa."

27 "Koga ndoti kumuli imwi makawhilila. Idani zwita zwenyu, banomuhema mubatile zwibuyanana. 28 Kombolelani banomutuka, mutembezelele banomubhata zwakayipa. 29 Unokuloba luhaya gun'ompela uwumpe gumwe, wakutolela bhatji usiwundzibise kuti atole kose neyempe. 30 Nhu wose unokukumbila tjimwe tjinhu uwumpe, wakutolela tjinhu tjitjo usitobele unobhuzwa. 31 Kwamunoyemula kuti banhu bakuthame kumuli, mukuthame bo kubali."

32 "Hapa muda ibabo banomuda, bokewa kwenyu ndikupi? Ngobe batjinyi banoda banobada bo. 33 Hapa muyetila kwakalulama banomuyetila kwakalulama, mungabokewa kene? Ngobe batjinyi banota sayikoko bo. 34 Hapa mu adzima bangamubgwiliza, mungabokewa nani? Ngobe batjinyi bano adzima batjinyi bo, bakalingilila kuti banowhobgwiliziwa. 35 Koga idani zwita zwenyu, mubayetile zwakalulama, mu adzime musingalingilile kuti mubgwiliziwe. Mbhayilo wenyu unowhoba nkulunkulu, imwi mowhobe bana be Upehhugwihhugwi; iye unangoni kuna basingaboke nebayeti bezwibi. 36 Ibani nemawhilangoni saTate benyu bena mawhilangoni."

37 "Musitilike nlandu, namwi bo amutowhotilikiwa nlandu, musitonge, namwi bo amutowhotongewa, yetilani mazwibhatigwa, namwi mowhoyetigwa bo mazwibhatigwa. 38 Ipani, namwi mowhopiwa bo; tjiyelo tjakanaka, tjakatshambidzigwa, tjikazunguziwa, tjitebukana, tjowhosiwa pamakumbo enyu. Ngobe tjiyelo tjamunowhopa natjo mowhoyelegwa bo natjo hha mobgwiliziwa."

39 Wakakoleba tjifananidzo kubali eti, "Bhofu lingatungamila limwe bhofu? Bubili gwawo aangawile mugomba? 40 Ndhiyiwa aangabe pehhugwi kwendhiyi uwe, koga umwe nemwe hapa atjidiyiwa unowhonga ndhiyi uwe."

41 "Nobonelani lubaza muhhiho lehama iyo, koga usingabone danda limuhhiho lilo? 42 Kene ungati kuhama iyo, ‘Hama, letja ndikuduse lubaza gumuhhiho lilo,’ tjini iwe usingabone danda limuhhiho lilo tjini? Iwe ntjengeli, dusa danda limuhhiho lilo kutanga, ndiko kwawunowhobona zwibuyanana kuti uduse lubaza gumuhhiho lehama iyo."

43 "Nti mbuya awutozwala zwizwalo zwakayipa, kene nti mbi awutozwala zwizwalo zwibuya. 44 Nti umwe newumwe unozibgwa ngezwizwalo zwawo, makuyu haatotjegwa pamatenje emimhiwa, nemahhambi haatotjegwa pamatenje emimhiwa. 45 Nhu wakalulama, mukululama kukwe kobhuda tjakalulama mukati kwemoyo uwe, koga nhu mbi, mububi gugwe kobhuda tjibi mukati kwemoyo uwe; ngobe nlomo unoleba zwihhele mumoyo."

46 "Mondidanilani muti ‘He, He,’ imwi musingathame zwandinomulaya? 47 Wose nhu unohha kundili ewha zwidiyo zwangu kakale ezwitobela, ndowhomulakidza kuti wakafanana nani. 48 Wakafanana nenlume wakabaka n'umba, wakatanga netsha edza enobhata lutombo, akakobamba n'umba pehhugwi kwelutombo; kukati kuba nenkubila, gwizi gukahhala gukapembela nehango vula ikalobelela pan'umba, koga ayizotubula yizunguza ngobe yaka yabakika.* 49 Koga unowha ekosatobela, unofanana nenlume wakabakila n'umba iye pavunje isakabambiwa; kwakati gwizi gwahhala gukapembela nehango, vula ikalobelela pan'umba, tjinyolotjo ikawa, wa kwayo kwakaba kukulukulu."