1 Sangwenu baketisi nebatjinyi bakabesedzela bose kuti bawuwhe. 2 Bafarisi nebakwali bakan'un'urika, beti, "Nlume iwhoyu unowamutjila batjinyi kakale unodla nabo."

3 Ndizo wakababudza tjifananidzo itjetji eti. 4 "Ndiyani wenyu ungati ana mhwizi dzili gulu, kukalahika in'ompela usingawhosiya dzimwe dzili makumi ali hhanalume nehhanalume mutjilambanyika, enohaka in'ompela yakalahika, akadza akayiwana? 5 Hapa ayiwana unoyitola, nekuhanha kukulu, eyisa pamapfudzi awe. 6 Unoti aswika kanyi, akadana bakwinya babe nebabakidzani babe, eti kubali, ‘Hanhani nami ngobe mhwizi yangu yayakalahika ndayiwana.’ 7 Sayikoku bo, ndomubudza, kowhobe nekuhanha kunjinji kudzimu nentha yentjinyi un'ompela unohanduka kupinda makumi ali hhanalume nehhanalume ebakalulama basingatjowhohakika kuti bahanduke."

8 "Kene nkadzimayi, una mari yemaloso esiliva ali gumi, hapa alahikigwa nelin'ompela, atopfutisa tjivoneko ekotshwayila n'umba, akadza akaliwana? 9 Unoti aliwana akadana bakwinya babe, nebabakidzani babe panhu pan'ompela, eti, ‘Hanhani nami, ngobe loso langu laka lalahika ndaliwana.’ 10 Sayikoku ke, ndomubudza, kuna kuhanha kubatumwa beNdzimu hapa ntjinyi un'ompela ahanduka."

11 Wakati, "Kwaka kuna umwe nlume waka anabakololo babili; 12 ntukunu wakati kuna tatayi, ‘Tate, mundipe gobe langu lefumwa.’ Tatayi baka bakobela fumwa yabo. 13 Hule kwemahhuba asimangana, nkololo ntukunu wakakuba kose kwaaka anako, akayenda kuhango ikulekule, akanozanisa fumwa iye ngebutjilo gusina mazwibhato. 14 Akati apedza kose, kukabe nehhala whuluwhulu muhango iyeyo, akatangisa dziyila. 15 Wakahaka n'hingo kuwumwe nghali wehango iyeyo, akawuyendesa kuminda kuti abe epa whotji dzidze zodliwa. 16 Akayemula dlazwe kuba tjaka tjidliwa newhotji; akuna nhu wakawumpa zodliwa. 17 Koga wakati ahhigwa nenkumbulo wakatambunuka akati tjemumoyo, ‘Kuna balanda bangana banohingila tate bangu banodla kumwe belaha, koga imi ipapa ndifa nehhala! 18 Ndowhomilika ndikayenda kuna tate bangu, ndikaswika nditi kubali, "Tate, ndakatjinyila kudzimu kose namwi; 19 Andizotjafanila dan'wa ndiyi nkololo wenyu, mundibhate sewumwe webalanda benyu." ’ 20 Wakamilika akayenda kuna tate babe."

"Koga etji nhambo nyana kuswika kunzi, tate babe bakawumbona, bakawuwhila ngoni, bakalabuka bakawunghumbatila bakawuputa. 21 Nkololo wakati kubali, ‘Tate, ndakatjinyila kudzimu kose namwi; andizotjafanila dan'wa ndiyi nkololo wenyu.’ 22 Koga tatayi bakati kubalanda babo, ‘Libilidzani muhhise tjiyambalo tjilefu tjakanakisisa, muwumbadze; muse rin'i muluboko gugwe, nehangu mumakumbo awe; 23 buyani negondolo lakakola mulibulaye, tidle tihanhe; 24 ngobe nkololo wangu iwhoyu waka akafa, weetjila kakale; waka alahika, wawanika.’ Nzano ukatangisa."

25 "Sangwenu nkololo whola waka ali kuminda; wakati asedzela pedlo nenzi, akawha kumbiwa kuzaniwa. 26 Akadana umwe webalanda akabhuzwa kuti koyetikani. 27 Akawun'handula eti, ‘Nun'una wenyu wabuya, tate benyu babulaya gondolo lakakola, ngobe bawuwamutjila akatjengeteka alimbuyanana.’ 28 Koga iye wakamon'wa akasada ngina munzi. Tate babe bakabhuda bakawuntetedza, 29 koga wakahandula tate babe eti, ‘Lingani, makole manjinji ose iyawa ndimuhingila, andizotongolamba tjamandilaya; koga amuzotongondipa kene tjibudzana, kuti ndihanhe nebakwinya bangu. 30 Koga iwhoyu nkololo wenyu wati abuya, iye wakazanisa fumwa yenyu nemhombwe, mawumbulayila gondolo lakakola!’ 31 Bakati kuwunli, ‘Nkololo unogala unami, kose kwangu ndekuko. 32 Kwakwakafanila kuti tihanhe tizane, ngobe whoyu nun'una uwo waakafa, ngono weetjila; waakalahika, koga wawanika.’ "