1 Kwaka kuna bamwe baka balipo nayigogo lubaka bakawumbudza nekwemalopa ebaGalile, Pilatu aakahanganya nezwibhayilo zwabo. 2 Akabahandula eti, "Mokumbula kuti banhu bekuGalile ibaba baka bali batjinyi kupinda bamwe bose banhu bekuGalile, ngobe bakagwadzisiwa sayikoku? 3 Ndomubudza, akuzojalo; koga kuhhe kwekuti muhanduke mowhopalala bo sayibo. 4 Kene ibabaya bali gumi nehhanakadzi bakawigwa nembako nlefunlefu wekuSilowamu ukababulaya, mokumbula kuti ndibo baka bali batjinyi kupinda banhu bose baka begala muJerusalema? 5 Ndomubudza, akuzojalo; koga kuhhe kwekuti muhanduke mowhopalala bo sayibo."

6 Wakaleba kakale tjifananidzo itjetji. "Umwe nlume wakadzwala nkuyu muminda iye yemahhambi; akahha ewhohaka mitjelo akawana nkuyu usina mitjelo. 7 Akati kun'hingi, ‘Linga, kwabe makole matatu ndihha ndiwhohola mitjelo yenkuyu iwhoyu, koga ndiwana kusina; uwunteme, unozanisilani mavu?’ 8 N'hingi wakawun'handula eti, ‘Muwunletje, tate, gole ileli bo, ndiwun'hakulile ndiwunse mpfudze. 9 Hapa wazwala mitjelo gole linohha, kwakalulama; koga hapa kusakajalo, mungatjiwuntema.’ "

10 Sangwenu waka ediya muyimwe yemasinagogu munsi wesabatha. 11 Kwaka kuna umwe nkadzimayi waka ali tjilema eyetiwa nemeyambi kwemakole gumi nehhanakadzi, waka akakotama, asingatubule tambunuka. 12 Yesu wakati ewumbona, akawundhana akati kuwunli, "Nkadzimayi, wasunungugwa mubulema gugo." 13 Akawumbiga maboko, tjinyolotjo akatambunuka, akalumbidza Ndzimu.

14 Koga ntungamili wesinagogu, amon'wa nentha yekuti Yesu waka atjidza nhu munsi wesabatha, wakati kubanhu, "Kuna mahhuba matanhatu ehinga; mubuye mumahhuba iyawo muwhopodzewa, koga kusi munsi wesabatha."

15 He wakawun'handula eti, "Imwi batjengeli! Umwe newumwe wenyu atosunungula akahhulila n'ombe iye kene kakambe tjitje danga nsi wesabatha, akapamha akanotjin'wisa? 16 Nkadzimayi iwhoyu, ali nkololokadzi wa Abhurahhamu waka akasungwa naSatane kwemakole ali gumi nehhanakadzi, wayesakafanila sunungugwa mubusungwa igogu munsi wesabatha?" 17 Atjaleba ikoku, zwita zwizwe zose zwakabhakhwa nehoni; banhu bose bakahanhisiwa nezwinhu zwakanaka zwaakayeta.

18 Wakakotjiti, "Bumambo gweNdzimu gongani? Kakale ndingagufananisa neni? 19 Gwakafanana nemhudzi yemasitadi yakatogwa newumwe nlume akayidzwala munhiba iye; ikakula ikabe nti, nyunyi dzemumhepo dzikabaka zwihaka munhabi dzawo."

20 Akapamha akati, "Bumambo gweNdzimu ndowhogufananisa neni? 21 Gonga mbidzo mfumakadzi yaakatola akasa muzwilizanyo zwitatu zwebgwisa, zwikadza zwikabila zose."

22 Wakapinda nemumizi-mikulu nemumizana, eyenda ediya, alimugwendo eyenda kuJerusalema. 23 Umwe akawumbhuzwa eti, "He, ibabo banowhotjidziwa bahomanana?"

Iye wakati kubali, 24 "Gwisani kuti mungine nenkoba ntukununu; ngobe banjinji, ndomubudza, banowhogwisa ngina koga abatowhotubula. 25 Hapa batezi ben'umba batjimilika bakahhalila nkoba, mowhotangisa ma kuhhe pankoba mukokodza, muti, ‘He, mutihhulile.’ Banowhomuhandula beti, ‘Anditoziba kwamunobva.’ 26 Ndipo pamunowhotangisa muti, ‘Takatidla tin'wa namwi, makamudiya mudzizila dzedu.’ 27 Koga banowhoti, ‘Ndomubudza, anditoziba kuti mobva poni; ibvani pandili, imwi mose bahingi bezwakayipa!’ 28 Kowhobe nelila nelobanya meno, hapa mobona Abhurahhamu na Isaka naJakobe nebalebesambeli bose bali mubumambo gweNdzimu imwi mutatigwa kuhhe. 29 Banhu banowhobva kubhehhuba nekumahwahhuba, nekubunandzwa nekuburwa, bakagala mubumambo gweNdzimu. 30 Lingani, bekupedzisila banowhoba bekutanga, bekutanga banowhoba bekupedzisila."

31 Lubaka igogo bamwe baFarisi bakabuya bakati kuwunli, "Ibva ipapa, ngobe Hherodi unohaka kubulaya."

32 Akati kubali, "Yendani munobudza mhungubgwe iyeya kuti, ‘Ndotata meyambi kakale ndopodza banogwala nasi namangwana, koga muhhuba lebutatu ndopedza n'hingo wangu. 33 Kusineni ndakafanila yenda mugwendo gwangu nasi namangwana nehhuba linotobela; ngobe akungayetikale kuti nlebesambeli afile kuhhe kweJerusalema.’ "

34 "Jerusalema, Jerusalema, nobulaya balebesambeli bawunotumigwa ubakhikitidza nemabgwe! ndandingakubunganya bana babo kangana sesetje inokuzwa zwikukwana zwayo kusi kwemaphaphiro ayo, koga iwe usingahake! 35 Linga n'umba iyo labe dongo, ndokubudza, awutjowhondibona udza uti, ‘Wakakombolegwa iye unohha muzina laHe!’ "