1 Yesu alihhele Meya Yakayengemala wakahanduka ebva kuJorodani, akatungamigwa neMeya kuyenda kutjilambanyika 2 kwaakalikiwa naSatane mahhuba ali makumi mana. Mumahhuba ihawo akuna zodliwa zwaakadla; kwapela mahhuba ihawo wakawha hhala.

3 Satane wakati kuwunli, "Hapa uli nkololo weNdzimu laya bgwe ileli kuti lihanduke libe tjinkwa."

4 Yesu wakahandula eti, "Kwakakwagwa kuti, ‘Nhu atowhotjila netjinkwa* tjoga.’ "

5 Satane wakawunsa pehhugwi, tjinyolotjo akawulakidza bumambo gwehango dzose. 6 Satane akati kuwunli, "Ndowhokupa masimba ose iyawa negudzo lawo; ngobe ndakawawamutjidziwa ndowapa wandinoda apa. 7 Hapa ungandinamata, bumambo gose gowhobe gugo."

8 Yesu wakawun'handula eti, "Kwakakwagwa kuti, ‘Nowhonamata He Ndzimu uwo koga, iye yega ndiye wawunowhohingila.’ "

9 Wakayenda naye kuJerusalema akawuntanhisa pehhugwi kwetjilungwane tjethempeli, akakoti kuwunli, "Hapa uli nkololo weNdzimu, uzwiligile pasi. 10 Ngobe kwakakwagwa kuti, ‘Unowholaya batumwa babe kuti bakutjengete.’ 11 Kakale, ‘Banowhokusenga mumaboko abo kuyetila kuti usikunhiwe nebgwe.’ "

12 Yesu wakahandula eti kuwunli, "Koyi, ‘Usilike He Ndzimu uwo.’ "

13 Satane apedza zose zwiliko, wakawunsiya kwelubaka.

14 Yesu wakabgwilila kuGalile ali mumasimba eMeya, kwakalebgwa nekukwe muntunhu wose. 15 Wakadiya mumasinagogu abo, elumbidziwa nebanhu bose.

16 Wakaswika kuNazaretha kwaaka alegwa; senlenje uwe, wakayenda kusinagogu munsi wesabatha. Wakamilika akabala; 17 wakapiwa lukwalo gweNlebesambeli Isaya, akaguhhula akawana pakakwagwa kuti,

18 "Meya yaHe ipehhugwi kwangu,

nentha yekuti wakandihhodza kuti ndisumikile ndebo mbuya kubahayi.

Wakandituma kuti ndisumikile sunungugwa kwebatapwa,

nepofunuka kwemapofu,

nesunungugwa kwebakatshambidzigwa,

19 kuti ndisumikile gole laHe linowamutjilika*."

20 Wakahhalila lukwalo akagubwiliza kunlanda wesinagogu akanogala pasi. Banhu bose baka bali musinagogu bakawunlingisisa, 21 akatangisa lebeleka nabo eti, "Muhhuba lanasi, lukwalo igogu gwahhadzisika muzebe dzenyu."

22 Bose bakaleba zwakanaka nekukwe, betjenamisiwa nematama ahhele ngoni aka ebhuda munlomo uwe. Bakabhuzwana beti, "Kati haata nkololo waJosefa iwhoyu?"

23 Iye wakahandula eti, "Mowhondilebela gungulupesa linoti, ‘Nlapi tjizwilapa.’ Kwatakawha kwawakathama kuKhaphenawume tongokuthama bo namuno muhango yakanyi kwenyu." 24 Akakoti kubali kakale, "Ndolebesa ndoti kumuli, akuna nlebesambeli unowamutjigwa muhango yakanyi kwabo." 25 Koga lebeswa ndoti, "Kwaka kuna njhilikadzi njinji muhango ye Isirayeli mumahhuba a Elija, pakwakahhaligwa kudzimu kwemakole matatu nemimwedzi mitanhatu, kukaba bhamba gulu muhango yose. 26 Koga ke Elija waka asatumwa kuyimwe yadzo, wakatumwa kuZarephathi, ntunhu weSidoni, kumfumakadzi waka ali tjilikadzi. 27 Lubaka gwenlebesambeli Elisha kuna banjinji baka bana bugwele gwemapele mu Isirayeli, koga akuna wakatjenesewa, kuhhe kwaNaamani wekuSiriya."

28 Bose baka beli musinagogu pabakawha ikoku bakahhala buhongola. 29 Bakamilika bakawudusila kuhhe kwenzi-nkulu, bewunkakatila kunopelela dunhu laka lakabakigwa nzi-nkulu wabo, beyetila kuti bawumposele pasi. 30 Koga iye wakasodzoroka nepakati kwabo akayenda zwe.

31 Wakayenda kuKhaphenawume, nzi-nkulu weGalile. Waka ebadiya nsi wesabatha; 32 bakatjenamisiwa nediya kukwe, nekuti dama lile laka lina simba. 33 Musinagogu kwaka kuna nlume waka aligegwe nemeyambi, meya isakayengemala, wakamimila newhi lipehhugwi, eti, 34 "Siyana naswi, tineni nawe iwe Yesu wekuNazaretha? Wahha wotipaladza kani? Ndokuziba kuti ndiwe yani, ndiwe Wakayengemala weNdzimu."

35 Yesu wakayitjemela eti, "Nyalala, ubhude muwunli." Meyambi yakawunlahila pasi pakati kwebanhu, ikabhuda muwunli isawunkubadza.

36 Bose bakatjenama, bakalebelesana beti, "Idama lakatini ileli? Ngobe ngekukunda nangemasimba unolaya meyambi dzikabhuda." 37 Kwakalebgwa nekwaYesu muntunhu wose.

38 Wakabhuda musinagogu akayenda kun'ha waSimoni, mezwale baSimoni baka begwala bugwele gweluhhahhamo, baka bakumbilila kuti abatjidze. 39 Wakamilika akatjemela bugwele, luhhahhamo gukapela, tjinyolotjo bakamilika baka bayetila zodliwa.

40 Hhuba lakati lingina, bose baka bana bagwele bana nghwele dzakasiyana bakabuya nabo akababiga maboko akabapolesa. 41 Meyambi dzakabhuda mubanjinji, dzikuwa dziti, "Ndimwi Nkololo weNdzimu!"

Koga wakadzitjemela, asingadzibvumile kuti dzilebeleke, ngobe dzaka dziwunziba kuti ndiye Khirisitu.

42 Kwayedza, wakamilika akayenda kubugalo gwakanyalala, banhu bakasala bewun'haka, bakawuwana, baka kumbila kuti asiyende, 43 koga wakabahandula eti, "Ndakafanila sumikila bumambo gweNdzimu kuyimwe mizi bo, nditjo tjandakatumwa."

44 Waka esumikila mumasinagogu emuJudiya.