1 Wakababudza tjifananidzo, tjebadiya kuti batembezele tjoselele basitongonyala moyo. 2 Wakati, "Muwumwe nzi-nkulu kwaka kuna ntongi waka asingahle Ndzimu kakale asina mazwibhato kunhu. 3 Kwaka kuna tjilikadzi munzi-nkulu iwhoyo, yaka igala ihha kuwunli, iti, ‘Mundigwile kutjita tjangu.’ 4 Wakalamba kwelubaka gulefulefu, koga hule wakakoti mumoyo uwe, ‘Kene zwangu ndisingahle Ndzimu kene ndisina mazwibhato kunhu, 5 koga nentha yekuti tjilikadzi iyeyi inondisilinga, ndowhotonga ndebo yayo, kuyetila kuti ndisinyale neholela hha kukwe.’ "

6 He wakakotjiti, "Iwhani kuti ntongi mbi unotini. 7 Ngono Ndzimu haatowhopa ndulamilo kubahalugwa babe, banolila kuwunli siku nesikati? Angabanonokela? 8 Ndomubudza, unowhobapa ndulamilo nekulibilidza. Koga Nkololo wenhu unowhowana bugalimoyo muhango pakubuya kukwe kene?"

9 Wakabudza bamwe banhu baka bezwigalabgwe kuti bakalulama kakale belingila pasi bamwe tjifananidzo itjetji. 10 "Balume babili bakayenda benotembezela kuthempeli, umwe wakaali Mfarisi umwe ali nketisi. 11 Mfarisi wakama yega akatembezela eti, ‘Ndzimu, ndomuboka ngentha yekuti anditonga bamwe banhu, batjebeli, basakalulama, mhombgwe, kene sayiwhoyu nketisi. 12 Ndoyila zodliwa kabili patshipi, muna kose kwandinowana ndodusa tjegumi.’ 13 Koga nketisi, alimile kule nyana, asingake akamilidzila meho awe kudzimu, koga akakotamisa n'holo, wakatembezela eti, ‘Ndzimu, mundiwhile ngoni imi ntjinyi!’ 14 Ndomubudza, nlume iwhoyu wakabgwilila kunzi uwe alulamisiwa kupinda Mfarisi, ngobe wose nhu unozwimilidza unowhotebamisiwa, koga unozwitebamisa unowhomilidziwa."

15 Baka bolezi kose nebana batjambozwagwa kuwunli kuti ababige maboko; koga badiyiwa bakati bekubona ikoku baka batjemela. 16 Koga Yesu wakabadana, akati, "Letjani bana bahhe kundili musibadzibise; ngobe bumambo gweNdzimu ndegwebakajali. 17 Lebeswa ndoti kumuli, kene yani usingowhowamutjila bumambo gweNdzimu semwana ntjetjana aatowhogungina."

18 Umwe ntungamili wakawumbhuzwa, eti, "Ndhiyi mbuya, ndithameni kudze ndiwamutjile butjilo gusingapele?"

19 Yesu wakati kuwunli, "Nentha yeni unditi ndimbuya? Akuna umbuya kuhhe kweNdzimu yega. 20 Unowhisisa milayo. ‘Usite bupombgwe, Usibulaye, Usikwibe, Usipe busupi gwemanyepwa, Lemekedza tate babo nameyabo.’ "

21 Wakahandula eti, "Yose iyeyi ndakayitobela kubvila nditjintjetjana."

22 Yesu paakawha n'handulo iye, wakati kuwunli, "Unotayila netjinhu tjin'ompela. Tengesa kose kwawunako ukobele bahayi ntengo wako, unowhobe nefumwa kudzimu; ukotjihha, unditobele." 23 Wakati ewha matama iyawa akangin'wa nebuyendasi, ngobe waka akafuma kwazo.

24 Yesu ewunlinga wakati, "Kolema kwazo seni kuti ibabo banafumwa bangine mubumambo gweNdzimu! 25 Kulelulelu kuti kamela lipalame muhuli yelunji, pana kuti mfumi angine mubumambo gweNdzimu."

26 Ibabo bakawha matama iyawa bakati, "Ngono ndiyani ungatjidziwa?"

27 Koga Yesu wakati, "Zwisingayetike ngebanhu zoyetika ngeNdzimu."

28 Phethiro eba eti, "Bonani, iswi takasiya kose tikatobela imwi."

29 Yesu eba eti kubali, "Lebeswa, ndoti kumuli, akuna nhu wakasiya n'ha uwe kene nkadzi uwe kene bakuluyi kene banun'una kene bazwadzi kene bana ngentha yebumambo gweNdzimu, 30 usingowhowamutjila kwakapamhidzigwa kanjinji mulubaka igogu nebutjilo gusingapele mutjibaka tjinohha."

31 Yesu wakatola bali gumi nebabili, akati kubali, "Whililani! toyenda kuJerusalema, kowhonohhadzisika kose kwakakwagwa nebalebesambeli nekweNkololo wenhu. 32 Ngobe unowhotugwa mumaboko eBataya, unowhokuwelegwa, akabhakhwa zwakayipa kakale akapfigwa mate; 33 banowhowunsukuta bakawumbulaya, koga muhhuba lebutatu unowhomuka."

34 Koga akuna tjayizwezwi zwunhu tjabakawhisisa; matama iyawa aka akasumbikika kubali, abazotongoziba tjaka tjilebgwa.

35 Kwakayetika kuti atjibe pedlo neJerikho, umwe nlume webhofu waka aligele ntome kwezila ekumbila; 36 ewha bunga liyenda ntome kukwe, wakabhuzwa kuti koyetikani.

37 Bakawumbudza beti, "Yesu wekuNazaretha unopinda ipapa."

38 Wakamimila eti, "Yesu, Nkololo waDavida, mundiwhile ngoni."

39 Baka balimbeli bakawuntjemela beti ngaanyalale; koga iye wakamimila newhi lipehhugwi, eti, "Nkololo waDavida mundiwhile ngoni!"

40 Ndizo Yesu wakama, akalaya kuti ahhisiwe kuwunli; wakati atjibe pawunli akawumbhuzwa, eti, 41 "Unohaka kuti ndikuyetileni?"

Iye wakahandula eti, "He, ndohaka kuti ndibone kakale."

42 Yesu wakati kuwunli, "Bona; galamoyo kuko kwakuthama ukanaya."

43 Tjinyolotjo wakabona akawuntobela, ekudza Ndzimu; banhu bose bakati bekubona ikoku, bakalumbidza Ndzimu.