1 Yesu wakati emilidza meho, akabona bafumi besa zwipo zwabo museme yezwipo; 2 akabona imwe tjilikadzi inodziyila, isa maloso mabili matukununu. 3 Akati, "Ndomubudza lebeswa, tjilikadzi iyeyi inodziyila yasa kunjinji kupinda bose. 4 Ngobe bose ibaba banokola mufumwa yabanayo bakasa tjipo museme, koga tjilikadzi mubuhayi gwayo ysa kose kwayinako."

5 Bamwe bakati beleba nekwethempeli, sekwalakanakisiwa ngemabgwe akanaka nange zwipo, Yesu wakati, 6 "Nekwezwinhu izwezwi zwamunobona, kowhohha lubaka pakusingowhosala bgwe lilipehhugwi kwelimwe ipapa, lisingowholigigwa pasi."

7 Bakawumbhuzwa beti, "Ndhiyi, kowhoyetikala lini, kakale tjilakidzilo tjowhobe tjili tjipi hapa ikoku kwabepedlo neyetikala?"

8 Wakati, "Mutjenjele kuti kusibe nenhu unomulaha; ngobe banjinji banowhohha muzina langu beti, ‘Ndi iye!’ kakale beti, ‘Lubaka gwebupelo gwasedzela!’ Musibatobele. 9 Hapa muwha nekwengwa nepandukilana, musihle; ngobe zwinhu izwezwi zwakafanila yetikala kutanga, koga bupelo agutowhoswika tjinyolotjo."

10 Wakayendilambeli eti kubali, "Tjaba tjowhomukila tjaba, bumambo gowhomukila bumambo. 11 Kowhobe nekutengenyeka kwehango kukulu nebhamba lakabangalala nedzinghwele muhango yose; kowhoba nezwinhu zwinohlisa kwazo nezwilakidzilo zwikulu zwinobva kudzimu. 12 Koga kusanhu kwayetika kose ikoku, banowhomusunga bakamudziyidza, bakamuyendesa kumasinagogu nemajele, kakale mowhoyendisiwa kuna bomambo nebabhati bemitunhu ngentha yezina langu. 13 Igogu gowhobe guli lubaka gwekuti mupe busupi. 14 Simani mimoyo, musizwidziyidze kuti mowhobahandula tjini; 15 ngobe ndowhomupa matama nebutjenjebvu, gusingowhokuligwa kene nyanyayidziwa nayibo bose banopesana namwi. 16 Mowhosungisiwa ngebazwadzi benyu, nangebana babotate benyu, nange makamu enyu, nange bakwinya benyu, bamwe benyu banowhobulawa. 17 Banhu bose banowhomubenga ngentha yezina langu. 18 Koga akuna kene vudzi len'holo wenyu linowhopaladzika. 19 Ngesimidzila kwenyu mowhotjengetedza butjilo gwenyu."

20 "Mukabona Jerusalema yakombeledzewa nengwa muzibe kuti paladziwa kwabepedlo. 21 Nayigogo lubaka bamuJudiya batihhile kumatombo, bamukati kwenzi-nkulu babhude muwunli, nebakuhhe kwawo basibgwilile muwunli; 22 ngobe kowhobe kwabemisi yebgwilizila, kudze kose kwakakwagwa kuhhadzisike. 23 Koga kowhobabangalalila ibabo bakazwisenga nebanomwisa mumahhuba iyawo! Ngobe kowhoba nebuyendasi gukulu muhango, nebuhongola pehhugwi kwebanhu ibaba; 24 banowhobulawa ngemapangatjeke, kakale banowhoba batapwa kunjudzi dzose; neJerusalema inowhokanyangiwa ngeBataya, kudzina lubaka gweBataya gwahhadzisika."

25 "Kakale kowhoba nezwilakidzilo muhhuba nemumwedzi nemunyenyedzi, kose nemuhango zwitjaba zowhodziyidzika, zwihanganyiwa miholo ngewona nange kumidukana kwevula yegungwa, 26 banhu banowhotongopela meya ngentha yehla nesaziba kuti ini tjinowhoyetika muhango; ngobe masimba ekudzimu anowhozunguzika. 27 Nelubaka igogo ndipo pabanowhobona Nkololo wenhu ehha ali mugole, anamasimba negudzo gulu. 28 Hapa zwinhu izwezwi zwitangisa yetika, mumilike mumuse miholo mulinge pehhugwi, ngobe sunungugwa kwenyu kobe kwabepedlo."

29 Yesu wakakobabudza tjifananidzo yetji. "Mulinge nkuyu neyimwe miti yose; 30 hapa itangisa sinila mahhani, mobva maziba kuti tjilimo tjeesedzela. 31 Kwakajalo bo ke, hapa mubona zwinhu izwezwi zwiyetika, zibani kuti bumambo gweNdzimu gwatjiba pedlo."

32 "Lebeswa, ndoti kumuli, tjizekugwana itjetji atjitowhopinda kose kusanhu kwahhadzisika. 33 Kudzimu nehango kowhopinda, koga matama angu atowhopinda."

34 "Ibani nenjele kudze mimoyo yenyu isikuligwe ngedla nange kulaladza kose nezwinodikala mubutjilo igogu, hhuba ilelo libva limuswikila tjinyolotjo makafala 35 sedati, ngobe hhuba ilelo lowhohhila bose banhu banogala muhango. 36 Mugale makalinda, mutembezela lubaka gose kuti mube nemasimba esubvunuka muna kose ikoku kunowhoyetika, nekuti mume mbeli kweNkololo wenhu."

37 Hhuba nehhuba waka ehwa ediya muthempeli, busiku eyenda kudombo leMitoba. 38 Banhu bose baka bebindukila mangwanana behha kuwunli muthempeli bewhowuwhilila.