1 Limwe hhuba, wakati ediya banhu muthempeli kakale esumikila ndebo mbuya, baphirisiti bakulu nebakwali bena bawhola, bakahha, 2 bakati kuwunli, "Tongotibudza, zwinhu izwezwi nozwithama nalipi simba, kene ndiyani wakakupa simba ileli?"

3 Akabe ebahandula eti, "Ndowhomubhuzwa bo mbhuzo. Tjitongo ndibudzani, 4 bvubika kwaJohane kwakakubva kudzimu kene kubanhu?"

5 Baka kulebeleka tjekwabo, beti, "Tikati, ‘Kwakabva kudzimu,’ unowhoti, ‘Ngentha yeni musakagalamoyo muwunli?’ 6 Koga tikati, ‘Kubanhu,’ bose banhu banowhotikhikitidza ngemabgwe; ngobe banogalabgwe kuti Johane waka ali nlebesambeli." 7 Ndizo bakahandula beti, "Atitoziba kuti kwakabva poni."

8 Yesu eba eti kubali, "Ngono nami bo anditowhomubudza kuti kunge simba lipi ndithama zwinhu izwezwi."

9 Wakatangisa budza banhu tjifananidzo yetji. "Umwe nlume wakalima minda yemahhambi, akayisayidza balimi, akayenda kuyimwe hango kwelubaka. 10 Lubaka gweyibva kwemahhambi gwaswika, akatuma nlanda uwe kuna baakasayidza minda, kuti anopiwa gobe lemitjelo yeminda; koga baakasayidza minda bakawunloba akabgwilila akalembedza maboko. 11 Wakapamha akatuma umwe nlanda; bakawunloba kakale bakawumbhata nezila inobhatisa honi, akabgwilila akalembedza maboko. 12 Wakatuma umwe webutatu; bakawunkubadza kakale bakawuntata. 13 Mweni weminda ekotjiti, ‘Ndowhota nditini? Ndowhotuma nkololo wangu, wandinoda; kungayetika iye bakawuwhilila.’ 14 Koga balimi bakati bewumbona bakalangana beti, ‘Iwhoyu ndiye nghalinhaka; atiwumbulayeni, kuyetila kuti nhaka ibve yabe yedu.’ 15 Bakawumposela kuhhe kweminda bakawumbulaya."

"Ngono mweni weminda unowhobatani? 16 Unowhohha ebapaladza balimi ibabo, etola minda eyipa bamwe."

Banhu bakati bekuwha ikoku bakati, "Ngakusijalo!"

17 Koga wakabalinga akati, "Kobvani ke ikoku kwakakwagwa.

" ‘Bgwe ilo tjekwalo lakalambiwa nebabaki

ndilo latjiba bgwe linotambunudza mbako’?

18 Wose nhu unowila pehhugwi kwebgwe ilelo unowhovunikana akaba zwipivu; koga hapa liwila nhu lowhupwanya."

19 Bakwali nebaphirisiti bakulu bakayedza wunsunga nayigogo lubaka, koga bakahla banhu; ngobe bakaziba kuti waleba tjifananidzo itjetji ebva ibo. 20 Ndizo bakawunlonga hhiho, bakawuntumila whodzi, dzakadzizwita banhu bakalulama, kudze dziwhilile tjaanoleba, kuti dziwunsungise kubutungamili gwembhati wentunhu. 21 Dzakawumbhuzwa dziti, "Ndhiyi, toziba kuti moleba nediya tjakatambunuka, kakale amutohalawula, koga imwi modiya zila yeNdzimu ngelebeswa. 22 Kumunlayo lipa luketo kuna Khesari, kene akuta munlayo?"

23 Koga iye wakabona butjengeli gwadzo, akaba eti kudzili, 24 "Tongondilakidzani loso. Ibuso gwani igogu, kakale kwakakwagwa ngekwayani mulili?"

Dzibe dzihandula dziti, "Khesari."

25 Iye ekotjiti kudzili, "Ipani Khesari kwaKhesari, neNdzimu kweNdzimu."

26 Dzikasitubule wumbhatshila ngematama awe pakati kwebanhu; kakale dzakatjenamisiwa ngen'handulo iye dzikanyalala.

27 Kwakakotjihha kuwunli bamwe baSadusi, ibabo banoti akuna muka kubafi, bakawumbhuzwa beti, 28 "Ndhiyi, Mozisi wakatikwalila kuti hapa nkulu wenhu afa, kuli kuti waanankadzi koga basina bana, nun'una uwe wakafanila tola nkadzi iwhoyo azwalile nkuluyi bana. 29 Ngono kwakakuna bakololo benhu un'ompela bali kutondeka; mbano ikatola nkadzi ikakotjinyika basina bana; 30 webubili akangina nkadzi iwhoyo, 31 webutatu akangina nkadzi iwhoyo bo, kukayendila mbeli kujalo kukadza kukaswika kuna wekutondeka, bose akuna wakafa ata mwana naye. 32 Hule kwayipapo nkadzi iwhoya akafa bo. 33 Ngono pakumuka kubafi, nkadzi iwhoyo unowhobe wani? Ngobe bose bali kutondeka wakaba nkadzi wabo."

34 Yesu wakahandula eti, "Banhu banotjila mumahhuba anasi banolobola kakale banolobogwa; 35 koga ibabo banobagwa sebakafanila kuti babe belubaka gunohha kakale bemuka kubafi abatolobola kene lobogwa, 36 abangatjafe kakale, ngobe belizana nebatumwa bekudzimu kakale batjibe bana beNdzimu, saku beli bana bemuka kubafi. 37 Koga kuti bafi banomusiwa, kene naMozisi wakakulayidza, mundima yedenje lemhiwa, paanodana He eti, ‘Ndzimu wa Abhurahhamu, Ndzimu wa Isaka, Ndzimu waJakobe.’ 38 Haate Ndzimu webafi, koga ndewebapenyu; ngobe bose banotjilila iye."

39 Bamwe bakwali bakahandula beti, "Ndhiyi, mahandula zwibuyanana." 40 Ngobe baka besingatjahake wumbhuzwa umwe mbhuzo.

41 Koga wakati kubali, "Bangati Khirisitu unkololo waDavida tjini? 42 Ngobe Davida tjekukwe unoti muLukwalo gweNjimbo,

" ‘He wakati kuna He wangu,

Gala kuluboko gwangu gweludli,

43 ndidze ndithame zwita zwizo tjigadziko tjemakumbo awo.’

44 Iye Davida unowundhana eti He; ngono unkololo uwe tjini?"

45 Banhu bose bakawhilila, iye wakati kubadiyiwa babe, 46 "Mutjenjelele bakwali, banoda yenda bakambala zwiyambalo zwilefulefu, banoda buyisiwa munhanga dzetengesela nepiwa zwigalo zwakanaka mumasinagogu nebugalo gwebanhu banagudzo panobe pedliwa, 47 banotjebela njhilikadzi bedzitolela nhundu nezwimun'umba dzadzo, beyeta mahonga ndibon'we ngemitembezelo milefulefu. Banowhowanikwa nlandu nkulunkulu."