1 Yesu wakangina muJerikho, waka epinda. 2 Kwaka kuna nlume waka eyi Zakhewu, ali nketisi nkulu, kakale akafuma. 3 Waka ehaka bona kuti Yesu unhu wakatini, koga waka kon'wa ngentha yebunji gwebanhu, ngobe alimfupi. 4 Ndizo wakalabukila mbeli akanotanha nti wenkuyu kudze atubule wumbona, ngobe waka ewhopinda nayipapo. 5 Yesu wakati eswika ipapo akalinga pehhugwi, akati, "Zakhewu libilidza udeluke; ngobe nasi ndonoyezela kun'umba iyo."

6 Wakadeluka nekulibilidza, akawamutjila Yesu nekuhanha. 7 Bakakubona kose ikoku bakan'un'urika beti, "Wayenda kunoba mwezi wentjinyi."

8 Zakhewu wakamilika akati kuna He, "He, ndopalalanya fumwa yangu pakati ndikobela bahayi. Hapa kuli kuti ndaka ndatjebela umwe nhu tjimwe tjinhu, ndotjibgwiliza tjaka pamhiwa kanna."

9 Yesu wakati kuwunli, "Nasi jidzo laswika mun'umba iyeyi, ngobe na iyebo unkololo wa Abhurahhamu. 10 Ngobe Nkololo wenhu wakahhila whohaka netjidza bakalahika."

11 Bakati batjakawhilila zwinhu izwezwi, akayendilambeli ebabudza tjifananidzo, saku waka aba pedlo neJerusalema, kakale ngobe baka bekumbula kuti bumambo gweNdzimu gwaka guwhoswika tjinyolotjo. 12 Ndizo ke wakati, "Umwe nlume waka ali wen'umba yebumambo, wakayenda kuhango ikule kule kuti anombadziwa bumambo eko handuka. 13 Wakadana balanda babe bali gumi, akabapa maloso emamina* aligumi, akati kubali, ‘Muzwalise mari iyeyi ndidze ndihanduke.’ 14 Koga banhu behango iye baka bewumbenga, ndizo bakasala betuma banhu hule kukwe beti, ‘Atitohaka kuti iwhoyu nlume abe mambo wedu.’

15 "Wakati ahanduka, atjimbadziwa bumambo, akalaya kuti ibabo balanda baaka apa mari badan'we, kuyetila ziba kuti mari yakazwala kungapani. 16 Wekutanga wakahha eti, ‘He, loso lenyu lemina lakazwala maloso ali gumi.’ 17 Akati kuwunli, ‘Wakathama zwakanaka, nlanda mbuya! Ngobe wagalikabgwe mutjinhu tjitukununu, unowhobe ntungamili wemizi-mikulu ili gumi.’ 18 Webubili akahha eti, ‘He, loso lenyu lemina lakazwala maloso ali mahanu.’ 19 Eba eti kuwunli, ‘Unowhobe ntungamili wemizi-mikulu ili mihanu.’ 20 Umwe akahha eti, ‘He, yeli loso lenyu lemina, ndakalibiga ndakalipetela nejekana; 21 ndaka ndihla, ngobe munhu unamoyo nkukutu; motola pamusakabiga, mokowha pamusakadzwala.’ 22 Eba eti kuwunli, ‘Ndokuwana nlandu ngentha yematama awo, iwe nlanda mbi! Wawuziba kuti ndinamoyo nkukutu, ndotola pandisakabiga, ndokowha pandisakadzwala? 23 Ngentha yeni ngono usakayendesa mari yangu kubhenki kuyetila kuti nditi ndihanduka ndiyiwane yazwala?’ 24 Wakati kuna bakabalimile ipapo, ‘Muwuntolele loso ilelo mupe unamaloso aligumi.’ 25 Bakawun'handula beti, ‘He, unamaloso aligumi!’ 26 ‘Ndoti kumuli, wose nhu unako unowhopiwa kunjinji; koga usina, nayikoko kwaanako unowhokutolegwa. 27 Koga zwita zwangu, zwaka zwisingahake kuti ndibe ntungamili wazo, muzwilezi ngeno muzwibulaye mbeli kwangu.’ "

28 Yesu wakati atjileba ikoku, akapindilambeli, eyenda kuJerusalema. 29 Akati aswika pedlo neBhethifeji neBhethani, padombo linoyi leMitoba, akatuma badiyiwa babili, 30 eti, "Yendani kunzi umbeli, mowhoti mungina mowhowana gondolo lekakambe, lisakatongotan'wa nenhu, lakasungiligwa, mulisunungule mubuye nalo. 31 Hapa kukaba nenhu unomubhuzwa, eti, ‘Molisunungulilani?’ muhandule muti, ‘He banohaka lihingisa.’ "

32 Ndizo bakayenda baka batumwa, bakawana kwakajalo sebudziwa kwabo. 33 Bakati betjasunungula gondolo lekakambe, bobatezi balo bakati, "Mosunungulilani kakambe itjetji?"

34 Baka bahandula beti, "He banotjihaka." 35 Bakahhisa gondolo lekakambe kuna Yesu, bakawala pehhugwi kwalo zwiyambalo zwabo, bakagadza Yesu pehhugwi kwalo. 36 Wakati eyenda akatanha kakambe banhu bakawala zwiyambalo zwabo muzila.

37 Wakati atjiba pedlo, panojitila peDombo leMitoba, lukawu gwebadiyiwa gukatangisa lumbidza Ndzimu ngemawhi apehhugwi guna kuhanha ngentha yemihingo mikulukulu yagwaka gwabona, 38 guti, "Wakakombolegwa Mambo unobuya muzina laHe! kunyalala kudzimu negudzo pehhugwihhugwi."

39 Bamwe bebaFarisi baka bali pakati kwelukawu bakati kuwunli, "Ndhiyi tjemelani badiyiwa benyu."

40 Wakabahandula eti, "Ndomubudza, hapa ibaba benganyalala, mabgwe iwo ngekwawo anowhomimila."

41 Wakati atjibe pedlo nenzi-nkulu, ewumbona akawunlilila, 42 eti, "Kadzene wawuziba nasi zwinhu zwinokuhhisila kunyalala! Koga ngwenuwali zwakasumbikika kumeho awo. 43 Ngobe kowhoswika mahhuba ekuti zwita zwizo zowhothama bhakasa linokukombeledza, kakale zwikuzwinila ntha dzose, 44 zwikokupwanyila pasi, iwe nebana bawunabo, kakale azwitowhosiya bgwe lilipehhugwi kwelimwe mukuli; ngobe usakaziba lubaka gwekumbiwa kuko."

45 Wakangina muthempeli akatangisa tata baka betengesa, 46 eti, "Kwakakwagwa kuti, ‘N'umba yangu inowhobe n'umba yentembezelo’; koga imwi matjiyithama guwhu lembava."

47 Wakabe ediya muthempeli mahhuba ose. Baphirisiti bakulu nebakwali nebatungamili bebanhu baka begwisa wumbulaya; 48 koga bakahaya zila yabangakuhinga ndiyo, ngobe banhu bose baka bakawunteedza kakale bewhilila kwazo matama awe.