1 Negole legumi nemahanu letonga kwaThibheriyasi Khesari, Phontiyu Pilatu ali mbhati wentunhu weJudiya naHherodi ali ntungamili weGalile, nun'una uwe Filiphi ali ntungamili wentunhu we Ithuriyasi nehangwanyana yeTirakhonisi naLisaniyasi ali ntungamili we Abhilini, 2 Anasi naKhayiyafasi ndibo baka bali baphirisiti bakulu, dama leNdzimu lakahha kuna Johane nkololo waZakhariya ali mutjilambanyika. 3 Wakayenda kuhango yeJorodani, esumikila bvubikiwa kwekuti banhu bahanduke, bayetigwe mazwibhatigwa matjinyo. 4 Sekwakwaka kwagwa mulukwalo gwa Isaya nlebesambeli.

"Whi lewunodanilila ali

mutjilambanyika, eti baakanyani zila yaHe,

mutambunudze zidlana dzidze.

5 Wose nkuku unowhovukidziwa,

matombo nezwitombwana kowhojitisiwa,

zila dzakakombama dzowhotambunudziwa,

zila dzina makadi dzowhobaakanyiwa;

6 nebanhu bose banowhobona jidzo leNdzimu."

7 Wakakoti kumbunga waka wahha kuwunli kuti uwhobvubikiwa, "Imwi tjizekugwana tjenyoka, ndiyani wakamuluma zebe kuti mutihhe buhongola gunohha? 8 Ibani nezwiyeto zwinolakidza handuka, musitange mati mumikumbulo yenyu, ‘Tina Abhurahhamu ndibo tate bedu’; ngobe ndoti kumuli, Ndzimu unotubula thama bana ba Abhurahhamu nemabgwe iyawa. 9 Kuna hanhu* latjibigwa kale pamidzi yemiti, nti wose usingazwale mitjelo yakanaka unowhotemewa ukaposegwa mumoto."

10 Banhu bakawumbhuzwa ke beti, "Ngono titetjini."

11 Iye wakahandula eti, "Una zwiyambalo zwibili ngaape tjimwe kuna usina, unazodliwa ngathame bo ejalo."

12 Baketisi bakabuya bo behaka bvubikiwa beti kuwunli, "Ndhiyi ngono iswi titetjini?"

13 Wakabahandula eti, "Musilipise mupindisa kwamakatumwa."

14 Bagwi bengwa bakabhuzwa bo beti, "Iswi titetjini?"

Akakoti kubali, "Musitolele banhu zwinhu nemasimba, kene pa nhu nlandu iye esina nlandu, mugutshiwe nembhayilo wenyu."

15 Ipapo banhu baka bakalingilila kwazo, bezwibhuzwa mumimoyo yabo nekwaJohane, kuti angaba iye Khirisitu kani, 16 Johane wakahandula bose eti, "Imi ndobvubika nevula, koga kuna unamasimba apehhugwi kwe angu unowhobuya, mitjili yehangu dzidze andizolizanila yisunungula, iye unowhomubvubika neMeya Yakayengemala nemoto. 17 Wakabhata luselo gugwe gwewulusa, kudze asiye kusina tjiyapo palutombo gugwe, ekokubunganya zwidlo ezwisa mudula lile, koga bunye unowhogupisa mumoto usingadzimike."

18 Ndizo ngematama manjinji wakabakuludzila banhu, akasumikila ndebo mbuya kubali. 19 Koga Hherodi ntungamili, waka atjemegwa kuti asitole Hherodiyasi, nkadzi wenkulu uwe, nezwimwe zwibi zose zwaaka athama, 20 wakapamidzila bubi gugwe ngesunga Johane akawuhhalilila mujele.

21 Kwakakoyetikala kuti banhu bose behha bewhobvubikiwa, Yesu atjibvubikiwa bo etembezela, kudzimu kwakahhuka, 22 Meya Yakayengemala ikajitila pehhugwi kukwe ili mutjimo tjembili, senjiba, whi likabva kudzimu liti, "Iwe uNkololo wangu wandinoda, ndohanha kwazo mukuli."

23 Yesu paakatangisa diya, waka ana makole ezwagwa angaba makumi matatu, ali nkololo waJosefa (sekumbula kwebanhu), iye waka ali nkololo waHheli, 24 nkololo waMathati, iye ali nkololo waLevi, nkololo waMeliki, waka ali nkololo waJanayi, iye ali nkololo waJosefa, 25 waka ali nkololo waMathathiyasi, iye ali nkololo wa Amosi waka ali nkololo waNahhamu, iye ali nkololo wa Esili wakabe ali nkololo waNagayi. 26 Waka ali nkololo waMaathi, wakabe ali nkololo waMathathiyasi, waka ali nkololo waSemeyini, ali nkololo waJoseki, waka ali nkololo waJoda, 27 iye waka ali nkololo waJowanani, iye ali nkololo waResa waka ali nkololo waZerubhabheli waka ali nkololo waSheyalithiyeli ali nkololo waNeri. 28 Waka ali nkololo waMeliki ali nkololo wa Adi, unobe nkololo waKhosamu waka ali nkololo wa Elimadamu, unobe waka ali nkololo wa Eri. 29 Iye waka ali nkololo waJoshuwa ali nkololo wa Eliyeza, nkololo waJorimu, waka ali nkololo waMathati, nkololo waLevi. 30 Waka ali nkololo waSimiyoni, ali nkololo waJuda, waka ali nkololo waJosefa waka ali nkololo waJonamu ali nkololo wa Eliyakhimu, 31 iye waka ali nkololo waMileya, waka ali nkololo waMena, ali nkololo waMathatha, ali nkololo waNathani nkololo waDavida, 32 iye waka ali nkololo waJese waka ali nkololo wa Obhedi, ali nkololo waBhowazi ali nkololo waSalimoni waka ali nkololo waNashoni, 33 iye waka ali nkololo wa Aminadabhu, ali nkololo wa Adimini waka ali nkololo wa Ani, ali nkololo waHhezironi, ali nkololo waPherezi waka ali nkololo waJuda. 34 Waka ali nkololo waJakobe ali nkololo wa Isaka waka ali nkololo wa Abhurahhamu ali nkololo waThera nkololo waNahhori, 35 iye waka ali nkololo waSerugu waka ali nkololo waRewu, ali nkololo waPhelegi, waka ali nkololo wa Ebha, waka ali nkololo waShela. 36 Waka ali nkololo waKhenani waka ali nkololo wa Afakisadi iye ali nkololo waShemu, nkololo waNowa, waka ali nkololo waLameki, 37 iye waka ali nkololo waMethusela, ali nkololo wa Inoki waka ali nkololo waJaredi ali nkololo waMahalaleli, ali nkololo waKhenani, 38 Waka ali nkololo wa Inosi iye ali nkololo waSethi waka ali nkololo wa Adamu, nkololo weNdzimu.