1 Hule kwayikoku He wakahala bamwe bali makumi ali kutondeka nebabili, akabatuma bali babili babili, kumizi nemizana yaaka owhonda kuyili. 2 Eti kubali, "Gowo ligulugulu, koga bahingi ndibo bahomanana; ndizo tembezelani mukumbile He mweni wegowho kuti atumile bahingi kugowho lile. 3 Tjiyendani zwenyu; lingani, ndomutuma semhwizana pakati kwemhele. 4 Musisenge kwama tjemari, kene whomo, kene mbhatata; musibuyise iye nhu muzila. 5 Kene yipi n'umba yamunongina, mutange mati, ‘Kunyalala ngakube mun'umba iyeyi!’ 6 Hha nkololo wekunyalala alipo, kunyalala kwenyu kowhogala pehhugwi kukwe; koga hapa esipo, kunyalala kowhobgwilila kumuli. 7 Mugale mun'umba iyeyo, mudla mun'wa tjabanomupa, ngobe n'hingi wakalizanila mbhayilo uwe; musitendeleke dzin'umba. 8 Mukangina munzi bakamuwamutjila mudle tjabigiwa mbeli kwenyu; 9 mutjidze bagwele bamukati, muti kubali, ‘Bumambo gweNdzimu gwasedzela kumuli.’ 10 Koga mukangina munzi bakasamuwamutjila, nginani mudzizila dzawo muti, 11 ‘Kene iyo whuluba yenzi wenyu yakanamatila mumakumbo edu toyipulila kumuli; koga zibani kuti bumambo gweNdzimu gwasedzela.’ 12 Ndomubudza, muhhuba ilelo kowhoba kuhine kwakayetika kuSodoma pana kunowhoyetika muna iwhoyo nzi."

13 "Kwakakubangalalila iwe Khorazini! Kwakakubangalalila iwe Bhethisayida! ngobe kadzene mihingo mikulu yakayetiwa mumuli yaka yayetiwa muTire nemuSidoni, banoba bakahanduka ntolo, baligele pamilota bakambala zwiyambalo zwemasaka. 14 Koga kowhoba kuhine kuTire neSidoni muhhuba letongewa pana kumuli. 15 Nawe, Khaphenawume, nowhomilidzigwa pehhugwi kudzimu? Nowhojitisigwa pasi kuHhedesi."

16 "Unomuwha unowha imi, ne unomulamba unolamba imi, unolamba imi unolamba wakandituma."

17 Ibabaya bali makumi ali kutondeka bakahanduka bakahanha, beti, "He kene meyambi dzadzitiwhilila muzina lenyu!"

18 Yesu wakati kubali, "Ndakabona Satane ewa ebva kudzimu sepenya kwevula. 19 Lingani, ndamupa masimba ekuti mutshambe nyoka nemhani, mutshambe kose nemasimba ose etjita; akuna tjinowhomukubadza. 20 Koga kene kwakajalo musihanhile ikoku, kuti meyambi dzozwisa pasi kwenyu; koga hanhilani kuti mazina enyu akakwagwa kudzimu."

21 Palubaka igogo Yesu wakahanha muMeya Yakayengemala akati, "Ndomuboka, Tate, He wekudzimu nehango, kuti makasumbikila zwinhu izwezwi batjenjebvu nebanowhisisa, mukazwilayidza bana batjetjana; ee, Tate, ngobe ikoku kwaka kuli kuda kwenyu kwengoni."

22 "Zose zwinhu zwapiwa imi naTate bangu; kakale akuna unoziba kuti Nkololo ndiyani kuhhe kwaTate, kene kuti Tate ndiyani kuhhe kweNkololo nayiwhoyo Nkololo waanohala wunlayidza."

23 Akati ohandukila kubadiyiwa babe boga akati, "Akakombolegwa meho anobona tjamunobona! 24 Ngobe ndomubudza kuti balebesambeli banjinji nabomambo banjinji bakayemula bona tjamunobona, koga abazotjibona, newha tjamunowha koga abazotjiwha."

25 Nzibi wenlayo wakamilika akawunlika, eti, "Ndhiyi, ndingatatjini kuti ndiwane butjilo gusingapele?"

26 Wakati kuwunli, "Kwaka kwagwani munlayo? Unokuwhisisa tjini?"

27 Wakahandula eti, "Ida He Ndzimu uwo nemoyo uwo wose, nemeya iyo yose, nemasimba awo wose, nenkumbulo uwo wose; ude mbakidzani uwo nezila yawunozwida iwe."

28 Wakati kuwunli, "Wahandula zwakanaka, thama ikoko, unowhotjila."

29 Koga iye ehaka zwilulamisa wakati kuna Yesu, "Mbakidzani wangu ndiyani?"

30 Yesu akahandula eti, "Umwe nlume waka ebva kuJerusalema eyenda kuJerikho, akawilana nembava dzikawuntolela zwiyambalo zwizwe zose dzikawunloba, dzikawunsiya ogwilofa. 31 Kukayetika kuti umwe mphirisiti wakapinda nezila iyeyo; wakati ewumbona akanyenyeledza nantome. 32 NeNlevi bo, wakati epinda napapo, ewumbona akangolinga koga, akapinda nantome. 33 Koga Nsamariya waka ali mugwendo, wakaswika ipapo akati ewumbona akawuwhila ngoni. 34 Akayenda pawunli akawungudza mabanga, akaahhodza mafuta newayini, akaasunga, akawuntanhisa zomba iye, akayenda naye kun'umba yebezi, akawuyenga. 35 Tjimuka oyenda wakatola maloso mabili edinari akaapa ntjengeti wen'umba yebezi, eti, ‘Yenga nhu iwhoyu, ukahingisa imwe mari pehhugwi kweyandakupa, pandinohanduka ndohha ndikubgwiliza.’ "

36 "Ngono unokumbula kuti pabatatu ibaba ndiwupi wakalakidza kuti umbakidzani wenhu waka awilana nembava?"

37 Wakahandula eti, "Iwhoya wakawuyetila mawhilangoni."

Yesu akakoti kuwunli, "Yenda unothama sayikoko."

38 Sangwenu bakati beyenda, akangina muyimwe mizi; umwe mfumakadzi waka eyi Maritha akawuwamutjila mun'umba iye. 39 Waka ana nun'una unoyi Mariya, wakanogala pedlo naHe ewhilila zwidiyo zwizwe. 40 Koga Maritha wakabhatikana nebhika, akayenda kuna Yesu akati, "He, amuna hanya kene kuti nun'una wangu atondibhatsha unondiletja ndibhika ndoga? Muwumbudze andibhatshe."

41 Koga He wakawun'handula eti, "Maritha, Maritha, awutagedzikene kakale nodziyidzika nezwinhu zwinjinji; 42 tjin'ompela tjinhu tjinohakika. Mariya wahala tjikamu tjibuyana, tjaasingowhotolegwa itjo."