1 N pɛ Labeenɛ au tuu vibeenɛ a Yesɔ krisi shɛshi shɔyɛ. Ɗalapa ãu vitasinɛm u tasiu jawɛrɛyitɔ pɛ kaka jazɨng akɔrɔ yɛ ɔ̃ ɓa ɗɔkɔkɔ ɓa yɛ pɛlitɔ. Kirisi pɔ̃ vim shɔ zɛrɛ a nyaɓa gbete shou Ɗajashonɛlapa yɛnɛ u jawɛrɛ Yɔhana ɗɔbii, 2 Yɔhana sha vigbete zɛyɛtɔ kpai. Shɔm ukɔ ɔ̃rɛ u nya shanɛ ayuu Ɗalapa vishanɛ a ruu tɔ̃vɨn gbete Yesɔ Kirisi tasiyɛ. 3 Ɗalapa u tasi shɔ gbete ɓali labeenɛ janyagadim susãritɔ a biini, Ɗalapa u tasi shɔ gbeteyi wesho a janyagadiyi nya susãri abiini ai gɨn vigbete shɔ bee a labeenɛmyɛ! Aruviya ɗaa ɓatɛ maanɛ vim kpai yɛ pɛlitɔ.

4 Nkɔng Yɔhana n ɗɔ sẽkoom beenɛ yɛnɛ kn shɔ sisɨn anɛyi ɗɔbii ɗɔ manzii a tipi Asiya.

Tɔ̃vɨn shonɛ a ɔ̃nɛbiinyatɔ̃nɛni au shɛ a Ɗalapa ɗɔbii u ɔ̃ a ɔkɔɔni, au aɗɔn dɔdɔrim, u siɗɔn tɛ̃ɛ̃tɛ̃ɛ̃, shɔ gbete yɛ a yɛ. A suru manzii ai a ɗekɨn Ɗalapa lakpatim, 5 au shɛ a Yesɔ Kirisi ɗɔbii, shɔshinɛkɨnti sisɨn ãnɛ tɔ̃vɨn, shɔ gbete gaa yunɛ a saa yɛ, ukɔ ɔ̃ sɔ̃n shɔgbete sã kpati kotipiyɛ.

Ɔriutɔ, au nyaba yuu ãnɛ au vɔyɛ, raautɛ au ruuvini a kpaa gbete tɛɛyɛni. 6 Pɔ̃utɛ u ɔ̃ lakpati u ɔ̃ shɔlansi u bɛli Ɗalapa u Ɓeye. Bassinɛ a kakani yɛnɛ Yesɔ Kirisi ɗɔbii dɔdɔrim yɛnɛ ɗekɨn dangdang! Nankɔ.

7 kɨnnɔɔ pɛ kaanɛ a koonyasi! kopiya yɛ zɛutɔ, piti a shɔgbeteyi ɓauyɛni. Shɔzɛ kotipi kpai i yɛ sɨntɔ au yuuni. U ɔ̃ nankɔ!

8 <<Nkɔng ɔ̃rɛ gaanɛ a yisinɛni,>>Uɓeyelapa Ɗalapa shɔgbete vitɛu kaka ɓayɛ sharɛ, shɔgbete dɔdɔrim u ɗɔn, au si tɛ̃ɛ̃tɛ̃ɛ̃ aɗɔn, au yɛ a yɛ.

9 Nkɔng Yɔhana, ɔ ɓɛzɔ̃, shɔu gɨn Yesɔ yɛ, n pɛ ɔ shɔ dɔraanɛ n ji a tete sisɨnmɛɛnɛ a raɓoonɛni au a si shɔ Ɗa lakpati ɔ̃nɛ yɛ. Shɔ pɔ̃ng a doddokanɛ a patimo aru gbete n nwari shɔ Ɗalapa nyaruubii a ruu tɔ̃vɨn gbete Yesɔ tasiyɛ. 10 A Uɓeyelapa lee, Suru tuurɛ, n nta yeenya a kakani, gbete kaa naa ganti, u ɗɔɔ nyanwanɛ ang kakɨnti. 11 Nyeenyau shanɛ, <<Bee vigbete a zɛ a labeenɛ a shoshi shɔwɛrɛɗa manziiwiyi labeenɛmtɔ a komoo manzii miyi: kɛ a Afisa a Simirna a pegamum a Tiyatira a Sardi a Filadefiya wɔsɔ̃n Laudikiya.>> 12 N rinɔɔ n zɛ shɔgbete au nwanya a nkɔniu pɛ ang zɛ laa tarimɛɛ manzii ai sã yaa yɛ, 13 atete laa tarimɛɛu n zɛ viwɔɔ shɛ zɔ a shɔzɛ u ɗɔ shinɛ, tosi fãrã gbɛm anɛ jadɔɔdii, u nɔsisɨn shɔ ma a tarimɛɛ. 14 U suyuu ayuu puru naa rubu ko naa nyasipuru, u nɔɔ naa ɗeeti yaa; 15 u jadɔɔ naa lasaka nweri au shɔ tou a yaa u ɗɔ kolinɛ, u yeenya kaa naa mii gbete au ɗɔ yunɛyɛ. 16 Sã sɛ manzii au nakɨn, yere u nya ɗɔ ziti ɗeɗe-ɗeɗe shɛ au nya, u nɔkɨn si kolinɛ naa ɗaa tete niti. 17 Naa n zɛutɛ, n nwesi au dɔɔ naa shɔu vɔtɛttɔ. A pɔ̃sɨng nakɨn a bi a shanɛ,<<Mɔkaa ntasetinɛ! N kɔng ɔ̃rɛ gaanɛ a yisinɛni. 18 Nkɔng ɔ̃rɛ shɔgbete u suru aɗɔn! Sin vɔtɛttɔ, Ama dɔdɔrim n a suruni dangdang. N kaka a yuu vɔrɔni a kotipi gbete vɔrɔ a ɗɔnyɛni 19 Aru nankɔ a bee vigbete a nɔɔ zɛyɛ dɔdɔrim a vigbete yɛ a yɛ a ɗekɨn. 20 Nkɔ dɔɔ ruɓusinɛ e sɛyi manzii gbete ɔ zɛ ang nakɨn, a laa tarimɛɛ manzii au sã yaa yɛ yɛmː sɛyi manzii ikɔyi ɔ̃rɛ Ɗajashonɛlapa e kn shɔ sisɨn ãnɛ manzii, laa tarimɛɛ manzii au sã yaa yɛ, ikɔyi ɔ̃rɛ kn shɔ sisɨn ãnɛ manziiyi.