1 A lee susunɛ Yesɔ yɛ ɗɔɔ vishaanɛ a yupɛ̃ni Farisiya wɛrɛ; shɔ ɗɔgbete shɔ tẽriu nɔɔbii. 2 Kɛɗɔn jawɔɔ u dɔni au naa puutɔ a dɔɔni arɛ shi a Yesɔ ɗɔbii. 3 Yesɔ hɨ shɔmala nya-ãsinɛ Musa a shɔ Farisiyayi nɛ, <<U nya-ãsinɛ yasiu nyaɓa tɛttɔ nɛ shɔ gati shɔ a lee susunɛ niya ko ɓa?>>

4 Ama i ji sha viwɔɔ ɓa. Yesɔ tuu jaurɛ, a gatiurɛ, a geliunɛ u yɛ wɛrɛnɛ. 5 Kɛɗɔn Yesɔ geliyinɛ, Naa shɔzɛ gbete awɔ tete u jaa ko janapu aɗɔn, kɛ shishinɛ a too mii a lee susunɛ, yɛ zɔ̃u ɓa aru pɛ lee susunɛ ya?

6 Ama i ji zɛnɔɔ Yesɔ nya kasinɛ ɓa a ruumni ɓa.

7 Yesɔ zɛrɛ shɔzɛ gbete shɔ ɓayi nya aru yumusunɛ i ɗɔgbete lɔ ɗɔɔ ɔ̃nɛ tɔ̃vɨnyɛ, kɛɗɔn a geliyi kɛ ruɓusinɛm: 8 Naa shɔwɔɔ ikɛ ɓawɔ nyanɛ aru yumusunɛ so tɛnɛ, ɔkɔɔ ɔ̃nɛ a ɗɔɔ ɔ̃nɛ pẽniɓa. Yɛ pɛlitɔ shɔwɔɔ pẽniɓa gbete tɛɛ a tɛttɔ shɔ wau nya sɔ̃ntɛjo, 9 shɔgbete ɓaa ɔ nya ziti piti kpai yɛ arɛ u gelaa nɛ, <<Yunɛ, a ã jam ɗɔ ɔ̃nɛ pɛ.>>kɛɗɔn shɔyɛ ãã yusẽrɛ a tasaa ɗɔɔ ɔ̃nɛ pẽtẽrẽ naa ɔ̃nɛ ɗɔn. 10 Ama shɔkɛ waa nyanɛ a ɗɔɔ yumusinɛ a yɛrɛ a ɔ̃ a laa, ɔ̃nɛ gbete pẽtẽrẽ, nɔgbete shɔu waa nya yɛ shanɛ, <<Anɛ masa a ɔ̃ la ɔ̃nɛ kiriri-pẽniɓam.>>Shɔm yɛ pɔ̃rɛ shɔ gãsiyi gbete shɔ wayi nya aru yumusinɛ i bassaa waanɛ. 11 Aru shɔgbete ikɛ basiyi yunɛ Ɗalapa yɛ rooriyi a tipi ama shɔgbete ikɛ rooriyi yunɛ Ɗalapa yɛ basiyitɔ pẽniba.

12 Kɛɗɔn Yesɔ geli shɔgbete wau nya aru binyatɔ̃nɛ yumusinɛ nɛ, Akɛ waa shɔ nyanɛ aru vishaanɛ ko binyatɔ̃nɛ yumusinɛ mɔkaa ɓaanɛ mɛsayi ko mɛzɔ̃yi ko a shɔbiiyi ko a shɔ nyakãsiri ko shɔ vinaayi aru lewɔɔ i yɛ ɓaa nya sɔ̃njirɛ, a nyaɓangkɔ i yɛ shoraa vigbete a pɛliyitɔ. 13 Ama a kɛ tɔnɛn waa shɔ nya aru yumusinɛ vishaanɛ, a waa shɔ raayi, shɔgbete i dɔɔ gbangbutu, shɔ gbete u bi vɔkagbete a shɔnɔgbãti. 14 Ɗalapa yɛ tasaa vɔɔ susãritɔ biini, aru gbete shɔmiyi i yɛ zɛnɔɔ a shorinɛ ɓa. Ɗalapa yɛ shɔraa a lee gbete shɔ tɔ̃vɨn i yɛ yulapa a sàà a suruni.

15 Shɔzɛ gbete atette shɔ gbete i ɔ̃ a la ɔ̃nɛ vishaanɛ a Yesɔ ni, geli Yesɔ nɛ, Ɗalapa u tasi shɔgbete i yɛ shaavi a ɗɔɔ yumusinɛ a Ɗa Kpati roonɛ vɔɔ susãri a biini!

16 Yesɔ geliunɛ, <<Jawɔɔ siɗɔn gbete washɔ nya aru yumusinɛ pẽniɓa, ɓaa shɔzɛ nya waanɛ. 17 Naa ɗaa yumusinɛ vishaanɛu pɛlitɛ, a sho u jawɛrɛ nɛu geli shɔgbete wayi nyanɛ,<Ɔ anɛ, shɔ sɔ̃nri nya vishaanɛ pɛlinɛtɛ!> 18 Ama i piti kpai i gaa nya walinɛ. Shɔ gbete gaa yɛ geli jawɛrɛu nɛ, N woo ɗɔɔ ɔ̃ringtɛ kaka jazɨng akɔrɔ n zɛtɔ, n gakaatɔ, tang gakinɛtɔ. 19 Wɔɔ sha sɔ̃nnɛ, < N woo napu jaa lanɛ kopi, n nyaba gbete n kasiyi matinɛ; gbee tang gakinɛtɔ.> 20 Wɔɔ gbete sha sɔ̃njinɛ,< N tɛ so ji dii zitimtɔ, aruumkɔ n yɛn kpaa anɛ ɓa.>

21 << Jawɛrɛu sɔrɛ a geli ɓɛshɔwɛrɛ vim piti kpai. Ɓɛshɔwɛrɛ sisɨn lɛsirɛ waanɛ a shanɛ, pɛli tɛ̃ɛ̃ti a gɨn nyaba-nyaba, a ɗɔɔ gogoti komoo, a toli shɔraayi nya, a shɔ dɔɔ gbangbutuyi, a shɔnɔgbãtiyi a shɔ gbete i bi vɔkagbete a n-tiyi arɛ. 22 tɛ̃ɛ̃ti jawɛrɛu shanɛ,<Shɔwɛrɛ, a nya-ãsinɛ shɔ pɛlitɛ, ama nyaba doo aɗɔn aru wɔɔ pɛlinɛ.> 23 Kɛɗɔn shɔwɛrɛ geli jawɛrɛu nɛ, < Yɛnɛ a nyaba lanɛ pẽniba a nyaba wujaa a toli shɔ i atɔ, aru n wɛrɛ u yiitɔ. 24 N gelɔɔtɛ, shɔzɛ gbete atette shɔgbete shɔ ɓayi nya siyɛ i yɛ ntang vishaanɛ ɓa!> >>

25 A lewɔɔ shɔzɛ waanɛ i ɗɔgbete i gɨn Yesɔ yɛ, kɛɗɔn a riinɔɔ a geliyinɛ, 26 Shɔgbete kasing gɨnnɛ piti kpai, setɛ ɔringtɛ u tɛɛ ɓeye, ko ɓiini, ko ɓeso, ko ɓɛjaayi, ko ɓɛzɔ̃ a ɓɛnaani, u bɛ̃ɛ̃ au yuuni piti kpai. 27 Shɔgbete ji tuu u laa gbete shɔyɛ ɓau naa aɗɔnyɛ u gɨnrɛ ɓa, yɛ ɔ̃ n jadɔɔ ɓa.

28 <<Naa shɔwɔɔ awɔ tete kasinɛn maa ɗɔɔ tarara, setɛ ɔ̃tɛ u ɓasi saa vigbete yɛ woliyɛ kɛ ɓasinɛ u zɛkɛkɨn ko u saa aɗɔn gbete yɛ yisi nya ɗɔɔ maanɛtɔ aɗɔn ya.>> 29 Ama ji pɛliɓa, yɛ zɛnɔɔ ɗɔ gbete gaa maanɛ yisinɛ ɓa; shɔgbete kɛ zɛ vishonɛu nɛ piti kpai yɛ laatiutɔ. 30 I yɛ shanɛ, jam gaa ɗɔɔ maanɛtɛ ama ji zɛnɔɔ yisinɛ ɓa! 31 Naa kpati kɛ shɛ ɓilinɛ a shɔ bawaanɛyini lazɔrɔ kopi nɛn tasɨn a kpati wɔɔ, shɔ gbete shɛ sɔ̃njo a shɔ bawaanɛyini lazɔrɔ kopi, kpatiu yɛ ɔ̃ pɛtɔ u gɨn sisɨn ko u kaka aɗɔn gbete shaa kpati wa a sɨn aɗɔn ya. 32 Naa kɛ zɛnɛ yɛ zɛnɔɔ ɓa, yɛ sho jashonɛyi i yɛrɛ i kpaa kpati wa i ɔ̃ ɔ̃nɛ binyatɔ̃nɛ. 33 Yesɔ yisi nyaruu shanɛ nɛ, <<Ji nanko kopiya awɔ tete setɛ yaa vigbete u a wunitɛ piti kpai, nɗau ɔ̃ n jadɔɔ kn.>>

34 Ntayẽ pɛ vitɔ̃vɨng, ama ntayẽ kɛ yaa u nya shɔ̃tinɛnɛ, nyaɓa gbete shɔ sɔriu nya shɔ̃tinɛ toti ɓa. 35 U vishonɛ toti ɓa a tipini ɓa, ko a dɔjaa, ama see wɛsinɛ weze. Shɔgbete u sho ntanɛ aɗɔn, u ntarɛǃ