1 Kɛɗɔn Shɔ Farisiyayi a shɔmala nya ãsineyi i à a Urushalima i hɨ Yesɔ ne, 2 <<A jadɔyi i gɨn vigbete shɔ ãsi nya aɗɔn yɛba aru viya? I sɔki naa ɓa i shavi rɛ ɓa aru iviya!>>

3 Yesɔ kasi nyarɛ, Ɔ ɓɛ̃ Ɗalapa nya ãsine gɨn ne ɓɛ aru viya? 4 Ɗalapa shane,<< Ɔ wɛsho tɔ a meye nyani a mini ni, shɔgbete kɛ dã meye ne a mini ni shɔu nyou vɔrɔtɔ.>> 5 Ɔ kɔ mati shɔ vijo ne shɔgbete kɛ ɔ̃ne a vigbete ã ɓeye a bini ni, << Vigbete ɔsi kpaa ang naa nen ãkɛ Ɗalapa,>> 6 Ɔkɛ pɛline ɔ pɔ̃ a sɨsin ne ji leeɓa ɔ basi meye a mini ni ɓa. Aruumkɔ ɔ nyo nya ãsine Ɗalapa nya ruubii tɛ. 7 Shɔ -shɔ ɗakineyi! Ishaya sha si vitɔ̃vɨng aru gbete nwa nya awɔ yuu yɛ: 8 <<Shɔmiyi nwang nya ruubii naa i basin tɔ, ama i sɨsɨn a nkɔni kpɛlɛ.>>

9 I geeng nya ɓejo wɛzɛ;

i matine shɔ ɓɛjo vigbete shɔzɛ ãsi nyarɛ ɓa Ɗalapa ɓɛ ɓa.

10 Kɛɗɔn Yesɔ ɓa mɔɔyi nyarɛ a geliyi ne, <<Ɔ wesho ang nya ɔ nta ruum pɛ tɔ̃vɨn. 11 Ɓa vigbete shɔzɛ tosi a nya ukɔ pɔ̃rɛ u ɔ̃ <shɔ ruuvini ɓa,> ama vigbete shɛ au nya ukɔ pɔ̃rɛ u rii <shɔ ruuvini.> >> 12 Kɛɗɔn Yesɔ jadɔyi i au ɗɔbii a hɨu ne, << ɔ zɛ nɔgbete shɔ Farisiyayi i lɛsi yɛti aɗɔ ruum ntane tɛ ya?>> 13 Yesɔ risi nyarɛ ne,<<Vigbete ɓa mayɛ kolapa ɓarɛ ɓa shɔyɛ áa gɨnrini a lɔki ɓili.>> 14 <<Yai weze; Shɔnoo gbãtiyi sãriyi labáàrɛ. Naa shɔnoo gbãti kɛ sãri shɔnoo gbãti labáàne, i piti kpai i tɛ̃e a to>> 15 Bituru shane, <<Tasiu ruu ɓerɛm pɛ wasa-wasa.>> 16 << Ɔ doo yuu notiya >>Yesɔ hɨ rɛ. 17 Ɔ ji zɛɓane vigbete kɛ tone a nya yɛ to yɛti a shɛ sɔ̃n a ɓili ɓaya? 18 Ama vibgete kɛ shɛne a nya shɛ a sɨsin, vinkɔ pɔ̃ shɔzɛ rɛ u <<shɔ ruuvini.>> 19 A sɨsinkɔ vikɔ̃line shɛrɛ, naa shɔ yɔ̃ne, roone a shɔ so, roone a jasoro gbete shɔji tɛu ɓayɛ, viɓɔɔne, nya yeline a vigbete aji zɛɓayɛ. 20 Vinkɔ piti kpai ukɔ pɔ̃ shɔ rɛ a ɔ̃<< shɔ ruuvini>>; ama vishane a naa zizi pɔ̃ << shɔ ruuvini ɓa.>>

21 Yesɔ ya ɗɔu rɛ, a risinoo aka tipi Taya a Sɔdom. 22 Kɛɗɔn Suu wɔ ɗɔn a kanan tipi a Yesɔ ɗɔbii, u ɗɔgbete sɨn yɛ,<<Uɓeyɛlapa, Dauda ɓɛjaa, ntang raajoǃ Rãmaa pɔ̃ng jasoro tɛ a ɗekɨn u ɗɔ raa ɓoone.>> 23 Yesɔ jo sha ruu wɔɔɓa. Kɛɗɔn u jadɔyi i au ɗɔbii a gaki rɛ ne,<<Yɨkiune kɛ kariu shone a nyavɔɔ.>>

24 Yesɔ kasinya ne,<<Shɔ shɔng a shɔ Yahudawa gbete i ni nyaba naa jamɛ̃ɛ̃rɛ yɛ i yuu.>> 25 Ama Suu arɛ a ta yugboti a Yesɔ ɗekɨn.<<Uɓeyɛlapa, pɔ̃sing naa jo>> suu sharɛ. 26 Yesɔ risiu nyane, <<Yɛ kɔriɓa shɔu tuu kn gbete ne shɔ ã jaayi shɔu lɔki zaayi ɓa.>> 27 <<Nizɛ, Uɓeyɛlapa,>>suu sharɛ, <<zaa ma sha vigbete kɛ shishine a tipi a ɓeye ɗɔ vishane tɔ.>> 28 Kɛɗɔn Yesɔ kasi suu nya ne,<< a sɨsin ãne ɗɔn bang! Vigbete a kasiyɛ shɔyɛ ãtɔ.>>A ɗɔukɔ naa Yesɔ yisi nyanwane tɛ u jasoro gati rɛ.

29 Yesɔ ya ɗɔurɛ yɛkɛ nya mii wapo a Galili. Kɛɗɔn gɛ̃kɛ yukɔpɔ a ɔ̃ a ɗɔukɔ. 30 Mooyi i au ɗɔbii, i n tiu shɔ dɔɔ kagbeteyi, shɔ noo gɓãtiyi, shɔ dɔɔ gbutuyi, shɔ nyaɓayi a shɔgbete i bi vɔrɔ waane, i pɔ̃si Yesɔ a ɗekɨn; a gatirɛ. 31 Shɔwi ɔ̃ri vibiizaane aɗagbete i zɛ shɔ nyaɓayi aɗɔ nwanyane, shɔ dɔɔɓayi i yulapa tɛ, shɔ dɔɔ kagbeteyi i ɗɔ raane shɔ nogbãtiyi i zɛ ɗɔtɔ. I basi Isrela Ɗalapa tɔ. 32 Yesɔ ɓa u jadɔyi nya a geliyi ne, <<Nta shɔmi raa tɛ; aru gbete i ɔ̃tɛ ang aɗɔ bi dɔɔ taati vishane ɓa. N jo kasiɓa n ãi naa ɓa a wɔ̃niɓa, aru iyɛ nwesi rɛ a nyaba.>> 33 Yesɔ jadɔyi i hɨu ne,<<U yɛ kpaa vishane gbete yɛ tɛsi shɔmii kɛpi aɗɔni piya?>> 34 <<Ɔ borodi a naa nekɨn nya?>>Yesɔ hɨ rɛ. <<Maanzi,>>i kasiu nya rɛ, <<A jazɨng ni fɛ̃ɛ̃.>> 35 Yesɔ geli mooyi nei ɔ̃ne tipi. 36 Kɛɗɔn tuu borodi maanzii rɛ a jazɨng ni a naa a dɔ̃ri Ɗalapa rɛ, a dalirɛ a tuu rɛ a ãu jadɔyi, kɛɗɔn u jadɔyi ãli shɔ rɛ. 37 I piti kpai i sharɛ a ya gãsi. Kɛɗɔn Yesɔ jadɔyi nyeki u dalinɛ au yayɛ ɓuti maanzi lolot. 38 Shɔgbete ai shaa borodiu yɛ isi laa laa ziti atu kop au jaa maani ɓa Nɛ̃ɛt (4,000), sɔrɔyi ɓa ɓuzɨn ni ɓa jajayi. 39 Kɛɗɔn Yesɔ ã shɔwi naa rɛ, to yɛti latosi a yɛkɛ tipi Magadan.