João 13

Yesu kowanawisha ghamaghulu wanafunzi wake

1 Tsa ichihungo cha Pasaka ng’ana chipfike baye, Yesu kamanya saa yake ya ukuka kulawa isi aino na kughenda kwa Aba wake ipfika, naye tsakawakunda ng’ani iwanu wake iwali muisi, na kawakunda pfikomkom ghendo. 2 Hawang’ali wakuja ichijo cha nemihe, Ibilisi, kamwingila Yuda, imwana wa Simoni Isikarioti mna ghumoyo ghwake, yambiduke Yesu. 3 Yesu kamanya kama Aba keka ukulu wose mna ghamoko ghake, na ka kalawila kwa Imlungu na kakuya kwa Imlungu. 4 Apfo kenuka hana ichijo, keka hambali ghamagwanda ghake, kasola tambala keyoha mchuno. 5 Kuya kaghela matsi mna libeseni, kandusa kuwanawisha ghamaghulu wanafunzi wake, na kuwabaghusa kwa litambala lyayeyohile mchuno.

6 Hayapfikile kwa Simoni Petiri, ayo kamghutsa, "Ghwemtwatsa, ghweghwe ghendo uninawishe ghamaghulu nene?"

7 Yesu kamwidika’kalonga, "Chanitenda, sambi ghweghwe ng’uchimanya baye, lekeni kutsochimanya hambele."

8 Petiri kalonga, "Mbe, ng’utsoninawisha baye ghendo ghamaghulu ghangu!"

Yesu kamwidika, "Ana sikunawishe ng’utsakuwa na undughu na nene baye."

9 Baho Simoni Petiri kamwidika, "Ghwemtwatsa, ana ni pfipfo, uleke kuninawisha ghamaghulu ghangu ghaliyeka, ila uninawishe hamwe na ghamoko ghangu na litwi lyangu!"

10 Yesu kedika, "Imunu yoghile kobamighwa yanawe ghamaghulu ghaliyeka, kwa apfila ayo kela ilukuli lwose. Mwemwe mwela, ila si wose baye." 11 Kalonga apfo, "Si mwemwe wose imwelile baye", kwaapfila tsakamanya munu wachi iyoghenda kumbiduka hambele.

12 Hayamalitse ukuwanawisha ghamaghulu ghawo, kapfala keli ghamagwanda ghake, kakala hanu hake, kawaghutsa, "Apfi, mghamanya agho ghaniwatendele?" 13 "Mwonikema nene "Mlangulitsi" na "Imtwatsa", mwotenda ghoya, kwaapfila apfo pfipfo pfanili. 14 Lelo, kama nene yanili Imtwatsa na Mlangulitsi, niwanawisha mwemwe ghamaghulu, namwe mwobamighwa pfipfila mwinawishe ghamaghulu, chila munu yamnawishe miyaghe. 15 Nimlangusani ichinu cha ukutenda, namwe mtende pfipfo pfaniwatendele mwemwe. 16 Nowalongelani kweli ghendo, imtumwa si mkulu kubita imtwatsa wake, wala imsenga si mkulu kubita ayula iyamtumile. 17 Lelo kwa apfila mwopfimanya ipfinu apfino, mtsobweda ka mwopfitenda.