1 Əmə, Palɔ, ə̂në əndje ê əmə, mata ə̂në tshelə Ndjapä yində nə, tə əzü-awla nə̂ Jezu Kristə kɔ, gâ ndə aye də Sɔstanə kə ta fraka səye kɔ. 2 Ä ta fraka nə kə Laglizə nə̂ Ndjapä ə̂në ə sə mâ Kɔratə kɔ, kə azü ə̂në Ndjapä ê əndje gâ ye tə̂ äwä Jezu Kristə ndə kə pa əndje sə tə azü nə̂ ye, ə̂në tshə ê əndje ə kô əndje kpî mbrə ətshə gâ ye kɔ, də azü nɔ̂ ə̂në, tə̂ aətshe nɔ̂, əndje sə kə dji əɨrɨ Âgbɔ̂ Əyïngerə nə̂ əzə̂ də Jezu Kristə, Âgbɔ̂ Əyïngerə nə̂ əndje də ətshə nə̂ əzə̂ nə kɔ.

3 Abä əzə̂ də Ndjapä gâ ndə Âgbɔ̂ Əyïngerə Jezu Kristə nə mbrə̈ ə̂rɔ̂tə̂ əndje kə e ə zä blatshe kə e!

4 Mə sə kə za mərshe alɔnɔ̂ kə Ndjapä nə̂ əmə mbrə e, mbrə ə̂rɔ̂tə̂ Ndjapä nə ə̂në tshə mbrə̂ kə e tə̂ äwä Jezu Kristə kɔ. 5 Mbrə ə̂në tə̂ äwä Jezu Kristə nə, Ndjapä kô aə̂rɔ̂ aərə nɔ̂ kə e, aə̂rɔ̂ aərə lə kə pa əpʉ ndje lə kə wusə̂ ərə. 6 Mbrə ə̂në əpʉ ə̂në e djî gâ pâ Kristə gâ ye kɔ, ə zâ lɔsu e nɔ̂ gâ ye. 7 Rəkɔ, Ndjapä ru e ru tə̂ ə̈bə̈ âkrâ nə̂ ye bale ne, e-e ə̂në e sə kə ka mbrə alɔ kə gu Âgbɔ̂ Əyïngerə nə̂ əzə̂ Jezu Kristə nə kɔ. 8 Ətshə kə sə kə mbrə ndə kə pa e gbɔgbɔ tə̂ e ʉrrr ndjɔ gâ tə̂ ama nə, ndə kə pa tə̂ əlo kə gu Âgbɔ̂ Əyïngerə nə̂ əzə̂ Jezu Kristə nə, ə̈bə̈ əpʉ bale sə sə lə kumu e ne. 9 Ndjapä sə kə mbrə ndəma ye alɔnɔ̂, ətshə ə̂në tshə ê e ndə kə pa e tɔ popo Ɨrɨ nə, Jezu Kristə nə, Âgbɔ̂ Əyïngerə nə̂ əzə̂ nə kɔ.

10 Alaye əmə, mə sə kə mʉ əpʉ kə e də əɨrɨ Âgbɔ̂ Əyïngerə nə̂ əzə̂ Jezu Kristə: e djï tə̂ e ndə kə pa tshelə takpa tə̂ e sɔ sɔ ne. Bale, e tɔ̈ popo angâ e lə takpa tə̂ e kanika kə tegbɔ kumu e də əpʉ lɔsu e sə kʉ bale. 11 Alaye əmə, mbrə ə̂në mə djî əpʉ gâ pâ e lə ama azü əgɔ Klɔwe ə pa e dji tə̂ e dji lə takpa tə̂ e ne. 12 Mə yində kə pa əpʉ rəke: lə takpa tə̂ e, əzü bale bale sə kə pa əpʉ kpî kpî. Ə̈bə̈ əzü sə kə pa: «Əmə, mə sə tə əzü nə̂ Palɔ!» Ə̈bə̈ nə sə kə pa: «Əmə, mə sə tə əzü nə̂ Apolɔsə!» Ə̈bə̈ ata nə sə kə pa: «Əmə, mə sə tə əzü nə̂ Sefasə*!» Ə̈bə̈ ata nə kpî sə kə pa: «Əmə, mə sə tə əzü nə̂ Kristə!» 13 Tshelə Kristə nə sɔ̂ gâ ye a? Palɔ nə kə tshû gâ ala masheyɔ nə mbrə e kɔ a? Wala də əɨrɨ Palɔ nə də̂ e zâ batamo kɔ a?

14 Mə za mərshe kə Ndjapä mbrə ə̂në mə zâ batamo zâ kə ə̈bə̈ əzü bale lə takpa tə̂ e ne kɔ, kʉtə̂ Krispusə gâ ndə Gayusə də̂ mə zâ batamo kə əndje kɔ. 15 Rəkɔ, əzü bale sə sə kə pa nə ə pa əne zâ batamo də əɨrɨ əmə ne. 16 Ayî! Mə zâ batamo kwatə̂mə kə azü tshelə bəngʉ nə̂ Sətefanasə, ə̂dû nə səkɔ, mə wusə̂ nə wu ə pa mə zâ batamo kə ə̈bə̈ ata əzü ne. 17 Mbrə ə̂në Kristə nə wlâ əmə wlâ ndə kə pa mə na ə za batamo kə azü ne, bale tshə wlâ əmə ndə kə pa mə na ə mʉ Ə̂rɔ̂ Əpʉ kə azü. Rəkɔ, mə mʉ Ə̂rɔ̂ Əpʉ nə mʉ tə̂ äwä kə wusə̂ kə pa əpʉ nə̂ azü ne, kanika əpʉ kuzu Kristə nə la masheyɔ do tə̂ ye do tə amba ərə ne.

18 Əpʉ kuzu Kristə nə la masheyɔ sə tə əpʉ yïrə̈ lə ala azü ə̂në ə̈nü əndje sə tə̂ äwä kuzu kɔ. Bale, ənə̂ əzə̂ ə̂në a sə tə̂ äwä ndə kə pa Ndjapä she əzə̂ lə kuzu kɔ, əpʉ nə sə tə awlra nə̂ Ndjapä. 19 Mbrə ə̂në Fraka nə̂ Ndjapä pâ əpʉ ə pa:

«Mə sə kə ndɨ kə wusə̂ âdâ ərə

nə̂ aawowusə̂ âdâ ərə,

mə sə kə do kə wusə̂ ərə

nə̂ awowusə̂ ərə tə amba ərə.»*

20 Awowusə̂ âdâ ərə sə kotâ a? Awoyisə̂ âgbɔ̂ əpʉ nə̂ Mayïzə sə kotâ a? Əzü ə̂në əpʉ zâ ama ye pâ ashɔ səye kɔ sə kotâ a? Ndjapä yîsə̂ nə gashu ə pa kə wusə̂ âdâ ərə nə̂ azü tshepashɔ səye sə tə ərə yïrə̈.

21 Mbrə ə̂në azü tshepashɔ səye də kə wusə̂ âdâ ərə nə̂ əndje, wûsə̂ Ndjapä wû tə̂ äwä kə wusə̂ âdâ ərə nə̂ Ndjapä nə ne. Âdârə ə̂në Ndjapä wû tə ə̂rɔ̂nə lə ala ye ndə kə pa tshə she azü ə̂në əndje zâ lɔsu əndje kə ətshə gâ ye kɔ lə kuzu tə̂ äwä əpʉ ə̂në ä sə kə yisə̂ nə kə azü, ə̂në ə sə mata əpʉ yïrə̈ kɔ. 22 Ajuwufu yində kə wu aərə ə̈lü â Agrakə sə kə pra äwä kə wusə̂ âdâ ərə. 23 Bale, ənə̂ ä, ä sə kə yisə̂ əpʉ nə̂ Kristə ə̂në azü kû ətshə gâ ala masheyɔ gâ ye kɔ. Əpʉ nə sə tə əpʉ ərə kə te tə̂ nə lə ala Ajuwufu â sə tə əpʉ yïrə̈ lə ala azü ə̂në əndje sə sə tə Ajuwufu ne kɔ. 24 Bale, ənə̂ azü ə̂në Ndjapä ê əndje gâ ye kɔ, əndje â sə kəmə tə Ajuwufu wala Agrakə, Kristə nə sə tə awlra nə̂ Ndjapä də kə wusə̂ âdâ ərə nə̂ Ndjapä nə. 25 Mbrə ə̂në əpʉ yïrə̈ nə̂ Ndjapä nə rô kə wusə̂ âdâ ərə nə̂ azü â əpʉ kə mɔ Ndjapä nə rô awlra nə̂ azü gâ ye.

26 Alaye əmə, e wü äwä ə̂në Ndjapä ê e tə̂ nə kɔ: lə takpa tə̂ e aawowusə̂ ərə ngbatshe lə ala azü, wala alayïworɔgbɔ ngbatshe, wala əgbro azü ngbatshe sə sə je ne. 27 Bale, Ndjapä kê ərə ə̂në ə sə tə ərə yïrə̈ lə ala azü tshepashɔ səye kɔ ndə kə pa tshə mbrə gana lə ala aawowusə̂ âdâ ərə. Ndjapä kê ərə ə̂në ə mɔ ə mɔ lə ala azü tshepashɔ səye kɔ ndə kə pa tshə mbrə gana lə ala alayïawlra. 28 Ndjapä kê amba ərə, ərə ə̂në azü sə kə neke nə ə neke kɔ, ərə ə̂në ə sə sə tə ə̈bə̈ ərə lə ala azü tshepashɔ səye ne kɔ, ndə kə pa tshə do ərə ə̂në ə sə̂ tə âgbɔ̂ ərə lə ala azü kɔ, tə amba ərə. 29 Ndjapä nə mbrə̂ rə kanika ə̈bə̈ əzü bale da əkro ye da ətshi Ndjapä nə ne. 30 Bale, Ndjapä nə kə kô e tɔ popo Jezu Kristə nə kɔ, â mbrə̂ Kristə nə, mbrə əzə̂, tə kə wusə̂ âdâ ərə kɔ. Tə̂ äwä Kristə nə, Ndjapä wû əzə̂ tə aə̂rɔ̂ azü lə ala ye, ə kô əzə̂ kpî mbrə ətshə â djɔ̂ əzə̂ lə nyaka gâ ye kɔ. 31 Â ə sə rə, mata ə̂në Fraka nə̂ Ndjapä pâ: «Əzü ə̂në tshə sə kə da əkro ye, tshə dä əkro ye mbrə ərə ə̂në Âgbɔ̂ Əyïngerə mbrə̂ gâ ye kɔ.»*