1 Əmə, Palɔ, mə sə kə pa ə̈bə̈ əpʉ kə e də əɨrɨ Kristə ə̂në tshə mbrə ə̂rɔ̂tə̂ ye kə azü â mbrə ərə mbrə də awlra ne kɔ. Azü pa mə ma tə̂ əmə tə əngʉ əzü ətshi e, â alɔ ə̂në mə sə ngrʉ̂ tə̂ e, mə sə kə nga ə nga kə e. 2 Mə tegbɔ ə̈nü e: e mbrə̈ mbrə̈ ərə ndə kə pa, alɔ ə̂në mə yi kumu əmə mâ ndə e je, mə nga ə nga kə e ne. Mə nga ə nga kə e ne, mata ə̂në mə li tshelə əmə ndə kə pa mə na ə nga kə azü ə̂në əndje wu ənə̂ əndje ə pa mə sə kə mbrə ərə Lïndə̂ əgo lɔsu əzü kɔ. 3 Banda əpʉ, a sə tə azü, bale ä sə sə kə mbrə koshe lə əzü tə̂ ä ne. 4 Mbrə ə̂në aərə koshe ə̂në ä mbrə də awlra nə kɔ sə sə tə aərə koshe ə̂në əzü kə mbrə̂ kɔ ne. Bale, awlra aərə koshe nə̂ ä nə to mâ ndə Ndjapä ndə kə pa ə ndɨ aərə nɔ̂ ə̂në ə wəra tə̂ əndje tə̂ Ndjapä kɔ. Ä sə kə liwu aəmbrʉ aəpʉ lɔsu azü. 5 Ä sə kə liwu ərə nɔ̂ ə̂në alayïwuma ə afɔ də nə ndə kə kânga äwä tə̂ azü ndə kə pa əndje wusə̂ Ndjapä wu ne kɔ, â ä sə kə za əpʉ lɔsu nɔ̂ tə kanga ndə kə pa ə dji əpʉ ama Kristə nə. 6 Bale, alɔ ə̂në e sə kə dji əpʉ ama tə ə̂rɔ̂nə, ä sə trö ndə kə pa ä wa ngbanga gâ pâ əzü nɔ̂ ə̂në tshə dji əpʉ dji ne kɔ.

7 E wü aərə ngâ də äwänə! Kədə ə̈bə̈ əzü kə wusə̂ nə kpro ə pa əne sə tə əzü nə̂ Kristə, tshə tëgbɔ kumu ye gâ pâ əpʉ səye: kədə tshə sə tə ənə̂ Kristə nə, ä-ä ndje, ä sə tə ənə̂ Kristə nə. 8 Gu də̂, mə â sə kəmə kə da əkro əmə rô pâ nə, mbrə awlra ə̂në Âgbɔ̂ Əyïngerə zâ kə ä kɔ, gana sə sə kə ngɔ əmə ne. Tshə zâ awlra səkɔ kə ä ndə kə pa ä gbɔgbɔ e, bale ndə kə pa ä geta e geta ne. 9 Mə yi yində kə pa e wu ə pa mə sə kə za awa gâ lə e tə̂ äwä afraka nə̂ əmə nə ne. 10 Mbrə ə̂në azü sə kə pa əpʉ ə pa: «Aəpʉ tshelə afraka ə̂në Palɔ ə wla kɔ sə kʉ tə aəpʉ ə̂në ə lʉ ə lʉ kɔ â ə sə tə əgbro aəpʉ; bale alɔ ə̂në tshə sə lə takpa tə̂ əzə̂ də ə̂tə̂ ye, tshə mɔ ə mɔ â aəpʉ ama sə sə tə ə̈bə̈ ərə bale ne.» 11 Əzü ə̂në tshə sə kə pa əpʉ rə kɔ, tshə wüsə̂ nə ə pa: ä sə kʉ rə lə əpʉ ama ä ə̂në ä tâ gâ lə fraka nə kə e kɔ, alɔ ə̂në ä sə sə je lə takpa tə̂ e ne kɔ; â ä sə ndje kʉ rə lə kə mbrə ərə nə̂ ä, alɔ ə̂në ä sə kə sə je.

12 Ä yi ndje yində kə pa ä lï ə lï də alabə̈ azü lə takpa tə̂ azü ə̂në əndje wu tə̂ əndje tə əgbro azü kɔ wala ä ma tə̂ ä mata əndje ne. Ə̂në əndje sə kə ko alabə̈ angâ əndje tə ərə kə lï tə̂ əndje tə̂ nə â sə kə mbrə ərə mata angâ əndje nə kɔ, əndje wusə̂ ərə wu ne. 13 Ənə̂ ä, ä yi yində kə pa ä da əkro ä rô pâ nə ne, bale ä za kosəra ə̂në Ndjapä zâ kə ä kɔ â zâ äwä kə ä ndje ndə kə pa ä wutu ndjɔ mâ ndə e kɔ tə ərə ə̂në ä sə kə da əkro ä tə̂ nə. 14 Ä sə sə kə ro maka kosəra nə̂ ä nə ne, ə sə mata ä wû wûtu kəmə alɔ bale mâ ndə e je ne. Ä-ä kə yî kumu ä ngâ əlînə ndjɔ mâ ndə e də Ə̂rɔ̂ Əpʉ nə̂ Kristə nə gâ ye kɔ. 15 Rəkɔ, ä sə sə kə da əkro ä rô pâ nə tə̂ kosəra nə̂ alabə̈ azü kpî ne. Bale, ä za lɔsu ä gâ pâ e ndə kə pa lɔsu e gbɔgbɔ tə̂ ye, ä mbrə kosəra tə bandanə kwatəndje lə takpa tə̂ e je, kʉ lə maka kosəra ə̂në Ndjapä yîsə̂ nə kə ä kɔ. 16 Mandânə, ä sə kə mʉ Ə̂rɔ̂ Əpʉ lə ashɔ aəgɔ ə̂në ə sə ngrʉ̂ tə̂ əgɔ nə̂ e kɔ, ndə kə pa ä da əkro ä da tə̂ kosəra ə̂në alabə̈ azü mbrə̂ gâ ye tə̂ ətshe lə kosəra nə̂ əndje kɔ ne.

17 Rəkɔ, Fraka nə̂ Ndjapä pâ: «Əzü ə̂në tshə sə kə da əkro ye, tshə dä əkro ye mbrə ərə ə̂në Âgbɔ̂ Əyïngerə mbrə̂ gâ ye kɔ.»* 18 Mbrə ə̂në, ə də̂ əzü ə̂në tshə wu tə̂ ye tə âgbɔ̂ əzü kɔ də̂ Ndjapä yində kosəra nə̂ ye ne, bale ətshə ə̂në Âgbɔ̂ Əyïngerə pa ə̂rɔ̂ əpʉ də əɨrɨ ye kɔ də̂ Ndjapä nə ə yində kosəra nə̂ ye nə.