1 Əgerə ə̂kpû aawopandə əpʉ səkɔ sə̂ dji əzə̂ nɔ̂ gâ ye. Rəkɔ, əzə̂ ndje, a wə̈ra tə̂ əzə̂ tə̂ ərə nɔ̂ ə̂në ə sə kə lʉ əzə̂ â a na ana na gâ ətshinə ne kɔ, a wə̈ra tə̂ əzə̂ dîrî dîrî tə̂ nyaka ə̂në ə di əzə̂ diawû diawû kɔ. A kpë ärɔ̈ nə ə̂në əndje pa ndə nə kə əzə̂ kɔ ndjɔ gâ tə̂ ama nə. 2 A kö ala əzə̂ kʉ gâ tə̂ Jezu, ə̂në ətshə kə krɔ̂ äwä əpʉ lɔsu nə â ətshə kə sə kə na də nə ndjɔ gâ tə̂ ama nə kɔ. Tshə yîndə nə â tshû la masheyɔ, â tshə wû gana marä tə̂ kuzu rə tə amba ərə lə ala ye, mbrə ə̂në tshə lîshi gâ tə̂ ə̂rû ə̂në ə ka mbrə ətshə ə ka kɔ; â kpəsəye, tshə sə gâ tʉ gâ pâ mbata ngerə ndə ndəkɔ Ndjapä.

3 E lï tshelə e tə̂ ye, tə̂ äwä ə̂në tshə rû ə rû lə ərə ə̂në alayïnyaka mbrə̂ ə wə̂ra tə̂ əndje tə̂ ye kɔ. Â rə də̂ e sə sə kə mɔ tə̂ lɔsu e ka ə tshi äwä nə tʉ ne. 4 Ə̂në e sə kə mbrə awlra nə də nyaka kɔ, e te te pa ə ru ə ru ʉrrr ə̈ndjï e tu ə tu gâ ye kane ne. 5 Â əpʉ ə̂në əndje pâ kə e tə aləvu ndə kə gbɔgbɔ e kɔ, ə̂sə̂ nə rô e gâ ye, ə̂në ə pâ:

«Ɨrɨ əmə, kədə Âgbɔ̂ Əyïngerə kə da əbə ndə kə yisə̂ äwä kə əbə,

wü wü tə dəngʉ ərə ne,

â alɔ ə̂në tshə ngâ kə əbə,

tshelə kəna zə tɔ̈ tɔ̈ tə̂ äwä nə ne.

6 Mbrə ə̂në Âgbɔ̂ Əyïngerə sə kə da əzü ə̂në tshə yində ye kɔ ndə kə yisə̂ äwä kə ətshə,

ɨrɨ nə nɔ̂ ə̂në tshə yerɔ ətshə,

tshə sə kə da ətshə də ndjapa.»*

7 Mbrə kə yisə̂ ərə kə e də̂ e wu əyo kɔ. Ndjapä sə kə mbrə tə̂ e rə tə aləvu nə. Ɨrɨ əde də̂ abä nə da ətshə da ndə kə yisə̂ äwä kə ətshə ne? 8 Kədə Ndjapä kə da e da mata aləvu nə nɔ̂ ndə kə yisə̂ äwä kə e ne kɔ, e sə sə tə djatra aləvu nə ne, bale e sə tə aneshe tsheshu. 9 A sə də alabä pâ ashɔ səye, ə̂në əndje sə kə da əzə̂ ndə kə yisə̂ äwä kə əzə̂ â a sə kə kpe rawa əndje kɔ. Bale, a lï ndə kə pa a dji əpʉ ama Abä əzə̂ də Ndjapä nə ə ro, kanika a sə də sorô. 10 Alabä əzə̂ nə sə kə da əzə̂ ndə kə yisə̂ äwä kə əzə̂ lə töndö alɔ, alɔ ə̂në əndje wu tə ə̂rɔ̂nə lə ala əndje. Bale, Ndjapä nə da əzə̂ mbrə ə̂rɔ̂ ərə nə̂ əzə̂, kanika a sə tə azü ə̂në əndje sə kpî, mata ətshə. 11 Alɔ ə̂në əndje da əzü ndə kə yisə̂ ərə kə ətshə, tshelə ye sə sə kə mɔ nə kʉ pə tə̂ alɔ nə sə̂ ne, ə sə kə za əyo gâ tə̂ lɔsu ye. Bale, tala mandânə, azü nə ə̂në əndje yîsə̂ ərə nə kə əndje kɔ, əndje sə kə sɔtə̂ ə̂rɔ̂ ərə ə̂në kə yisə̂ ərə nə mbrə̂ kə əndje kɔ: blatshe də kə mbrə ərə də äwänə.

12 Rəkɔ, e tɔ̈ tshelə kəna e ə̂në ə yɔ̂ gâ tʉ kɔ də tshelə akota e ə̂në ə mɔ ə mɔ kɔ. 13 E göma aäwä ndji mbrə aə̈nü e, kanika ə̈nü əzü ə̂në ə mbrə̂ gâ ye kɔ ə ndɨ ndɨ kwatə̂ye rô pâ nə ne, bale ə gamba tə̂ ye gâ mandânə.

14 E prä äwä ndə kə pa e sə də blatshe də azü nɔ̂, ə prä äwä kə sə kpî ə̂në əzü â sə sə rə ne, tshə sə sə kə wu Âgbɔ̂ Əyïngerə ne kɔ. 15 Ala e gbɔ̈ ndə kə pa ə̈bə̈ əzü bale tshi tshi äwä ə̂rɔ̂tə̂ Ndjapä tʉ ne; ə̈bə̈ əshe əshu lɔsu tɔ̈ tɔ̈ tə̂ nə ə djingli azü ka ə mbrə ə̂kpû azü lə takpa tə̂ e ne. 16 Ala e gbɔ̈ ndə kə pa ə̈bə̈ əzü bale za za tə̂ ye gâ tə̂ ə̂trû ne wala tshə wu ərə Ndjapä tə amba ərə ne, mata Esawu, ə̂në tshə kâ ə̂sə̂ yiya əgblə ə̂në tshə sə̂ də nə kɔ mbrə sambe rəgo bale kɔ. 17 E wusə̂ nə ə pa, ndə ə̈bə̈ alɔ mandânə, tshə yîndə kə pa abä nə to ngwarə gâ pâ ye tə yiya əgblə nə, abä nə nə grɔ̂ ətshə. Ə̂në tshə prâ äwä nə də ngɔla ye kɔ, tshə sɔ̂tə̂ ə̈bə̈ äwä sɔ̂ bale ndə kə pa abä nə nə mbrə ə̈bə̈ ərə kpî ne.

18 Alɔ ə̂në e nâ trö gâ tə̂ Ndjapä nə kɔ, e nâ nâ trö də aərə ə̂në əzü go ə goro kɔ ne, mata azü əgɔ Isərayalə pâ kaga Sinayi kɔ: əwo gbli-gbli, əbutshe shiwu, âgbɔ̂ əyi, 19 əkɨ ängɔ̈ gâ ndə ə̈bə̈ tshema ə̂në ə sə̂ kɨ nə kɔ. Alɔ ə̂në azü əgɔ Isərayalə nə djî tshema səkɔ, əndje yî yîndə kə dji ə̈bə̈ ata əpʉ bale kwatəndje ne. 20 Mbrə ə̂në əndje lï lï ndə kə ru tshelə əndje tə̂ ama ə̂në Ndjapä nə zâ ə pâ: «Əzü ə̂në tshə goro kaga nə, ə də̂ agia ndje, əndje gbö ətshə də abadja ə wö ətshə.» 21 Ərə nə ə̂në ə sə̂ kə mbrə nə kɔ ə sə̂ tə ərə âgbɔ̂ awa â Mayïzə pâ: «Ərə nə mbrə̂ awa gâ lə əmə â mə gu ə gugu.»*

22 Bale, e nâ trö gâ tə̂ kaga Siɔ də tshelə gala nə̂ Ndjapä ə̂në tshə sə tə sorô kɔ, ə̂në ə tə nə kə də̂ gala Jeruzalamə tshelafɔ, də ə̂kpû atrawaya nə̂ Ndjapä sake sake sake ə̂në əndje ngbô tə̂ əndje gâ tə̂ nə lə ə̂rû kɔ. 23 E nâ trö gâ tə̂ aangbɔ nə̂ ayiya aneshe* nə̂ Ndjapä, ə̂në əndje tâ aəɨrɨ əndje mâ lafɔ gâ ye kɔ. E nâ trö də Ndjapä nə, tə awowa ngbanga azü nɔ̂ kɔ gâ ye, ndje gâ tə̂ ayirə̂ azü ə̂në əndje sə tə aə̂rɔ̂ azü lə ala Ndjapä nə kɔ, ə̂në əndje tɔ̂ gâ tə̂ ərə ə̂në ə lï nɔ̂ kɔ gâ ye. 24 E nâ trö gâ tə̂ Jezu, tə əyïkɔkɔ̂ nə̂ ə̈bə̈ tafa mbʉkʉ ə̂në Ndjapä nə mbrə̂ də əzə̂ gâ ye kɔ, ndje gâ tə̂ ə̈ndjï ye ə̂në ə tû gâ ye kɔ, ə̂në ə sə kə pa əpʉ tə âgbɔ̂ ə rô ənə̂ Abalə kɔ.

25 Ala e gbɔ̈ ndə kə pa e wəra tə̂ e wəra tə̂ ətshə nə ə̂në tshə pa əpʉ nə kɔ ne. Azü ə̂në əndje wə̂ra tə̂ əndje tə̂ kə dji əpʉ nə̂ ətshə nə ə̂në tshə sə kə pa əpʉ kə əndje pâ ashɔ kɔ, əndje tɔ̂ tɔ̂ lə ngbanga nə ne. Ə gu də̂ əzə̂, a sə sə kə kpe tə̂ ngbanga sə̂ ne, kədə a do tshepa əzə̂ gbo ətshə nə ə̂në tshə sə mâ ngâ lafɔ ə sə kə pa əpʉ kə əzə̂ kɔ. 26 Leme-e, tshema ye même ashɔ, â kpəsəye tshə zâ ama ə pâ: «Äwä bale kwatəndje, əmə də ə̂tə̂ əmə, mə sə sə kə meme kʉtə̂ ashɔ ne, mə sə kə meme ndje tshelafɔ.»* 27 Əpʉ səye «äwä bale kwatəndje» yisə̂ nə ngâ ə pa aərə ə̂në Ndjapä mbrə̂ gâ ye kɔ, Ndjapä nə ə meme je â ə ro je, ndə kə pa kʉtə̂ ərə ə̂në tshə sə sə kə meme ne kɔ kə daka pə je.

28 Rəkɔ, ə̂në a sə kə sɔtə̂ ə̈bə̈ əgɔngerə ə̂në əzü sə sə kə meme ne kɔ, a tegbɔ ə̂rɔ̂tə̂ Ndjapä nə tə̂ äwä kə vrɔ ətshə, tə̂ äwä ə̂në tshelə ye mɔ tə̂ nə kɔ də lɔsu əzə̂ bale də awa, ndə kə pa a za mərshe kə ətshə. 29 Mbrə ə̂në Ndjapä nə̂ əzə̂ nə sə ndje tə əwo ə̂në ə ju ətshe ə ju kɔ.