1 Rəkɔ, ə̂në əpʉ kə za ama ə̂në Ndjapä nə zâ ndə kə li gâ ə̂sə̂ wutə ye nə daka pə je kɔ, a mbrə̈ awa ndə kə pa ə̈bə̈ əzü bale lə takpa tə̂ e da daka pə gâ mandânə ne. 2 Mbrə ə̂në Ə̂rɔ̂ Əpʉ səkɔ, əzə̂ nɔ̂, a djî ndje mata ə̂në əndje djî gâ ye kɔ. Bale, əpʉ nə ə̂në əndje djî gâ ye kɔ mbrə̂ ə̈bə̈ ərə mbrə̂ bale kə əndje ne, mbrə ə̂në əndje zâ lɔsu əndje zâ gâ tə̂ nə ne alɔ ə̂në əndje djî gâ ye kɔ. 3 Ənə̂ əzə̂ ə̂në a zâ lɔsu əzə̂ gâ tə̂ əpʉ səkɔ, a sə kə li gâ ə̂sə̂ wutə Ndjapä nə, ə lï də əpʉ ə̂në Ndjapä nə pâ gâ ye kɔ ə pa:

«Mə drâ ama əmə də əkɔ gâ ye:

əndje sə sə kə li ngâ gâ ə̂sə̂ wutə əmə ne!»*4.3 Wu Ətsh 95.11.

Ndjapä nə pâ əpʉ sə rə, bale, tshə gâmba aərə sə nɔ̂ leme-e kerə gâ ye pə tə̂ alɔ kə mbrə tshepashɔ kɔ. 4 Mbrə ə̂në Fraka nə̂ Ndjapä pâ əpʉ gâ pâ mindû amanə bishi əlo nə ə pa: «Â Ndjapä nə wû tə̂ ye mandâ akosəra nə̂ ye nə nɔ̂ tə̂ mindû amanə bishi əlo nə.»*4.4 Wu Vɔtə̂ 2.2. 5 Â kwatə̂ye ə pâ: «Əndje sə sə kə li ngâ gâ ə̂sə̂ wutə əmə ne.» 6 Kandää, äwä kə li gâ je daka pə je mbrə alabə̈ azü. Bale, azü nə ə̂në əndje djî Ə̂rɔ̂ Əpʉ sə̂ angbʉlînə kɔ lî lî gâ ə̂sə̂ wutə nə ne, mbrə ə̂në əndje djî əpʉ djî ne. 7 Âdârə ə̂në Ndjapä nə dɨ̂ ə̈bə̈ əlo kwatə̂ye, ə̂në tshə ê ə pa «kpəsəye», alɔ ə̂në tshə pâ əpʉ ə̂ngû ngbatshe djoko mandânə lə Aətshi nə̂ Davidə, mata ə̂në a dɨ̂ ətshinə gâ ye kɔ ə pâ:

«Kpəsəye, kədə e dji tshema Ndjapä,

e gbɔ̈ gbɔ̈ lɔsu e ne.»

8 Mbrə ə̂në, kədə Jozuwe kə zâ kəmə äwä kə azü əgɔ Isərayalə ndə kə pa əndje wu tə̂ əndje, Ndjapä nə sə̂ sə̂ kə pa kəmə ndə ə̈bə̈ ata əlo mandânə ne. 9 Rəkɔ, ə̈bə̈ alɔ kə wu tə̂ sə je mbrə azü nə̂ Ndjapä, mata ənə̂ Ndjapä nə tə̂ mindû amanə bishi əlo nə kɔ. 10 Mbrə ə̂në əzü ə̂në tshə li gâ ə̂sə̂ wutə Ndjapä nə, tshə sə kə wu tə̂ ye mandâ akosəra ə̂në tshə mbrə̂ gâ ye kɔ, mata ə̂në Ndjapä nə wû tə̂ ye mandâ aənə̂ ye nə kɔ. 11 Rəkɔ, a mbrə nɔ̂ ndə kə pa əzə̂ li gâ ə̂sə̂ wutə Ndjapä səkɔ, kanika ə̈bə̈ əzü bale te te tə̂ äwä kə dji əpʉ dji ne, mata azü əgɔ Isərayalə nə ne. 12 Mbrə ə̂në Əpʉ Ndjapä sə tə sorô ə sə kə mbrə ərə. Ama nə kî ə rô ama ə̈ngrʉ̈ kamba ə̂në aama nə sə bishi kɔ gâ ye; ə sə kə li əzü ʉrrr ndjɔ ə kru tshelə takpa tə̂ lɔsu ye də yîrə̂ ye, ə kru tshelə takpa tə̂ akəshe də ayerɔngɔ; ə sə kə wa tshelə aəpʉ ə̂në ə sə tə̂ lɔsu əzü kɔ də aəpʉ kə tegbɔ kumu ye. 13 Ə̈bə̈ ərə bale ə̂në Ndjapä mbrə̂ gâ ye kɔ sə sə kə za tə̂ ye wû ətshi Ndjapä nə ne, bale ərə nɔ̂ sə kpə tə̂ ə̂ngbʉ̂tshe ətshi ətshə ə̂në əzə̂ lï ndə kə pa a yisə̂ əpʉ gâ ətshi ye je kɔ.

14 Rəkɔ, ə̂në a sə də ə̈bə̈ âgbɔ̂ awotokrɔ gâ ye kɔ, Jezu, Ɨrɨ Ndjapä, ə̂në tshə ô ʉrrr ndjɔ mâ ətshi Ndjapä kɔ, a kä kpirə̂ gâ pâ əpʉ lɔsu ə̂në a pa ndə nə kɔ. 15 Mbrə ə̂në a sə də ə̈bə̈ âgbɔ̂ awotokrɔ ə̂në tshə lï ndə kə pa tshə wu əyo əzə̂ lə kə mɔ əzə̂ ə̂në a mɔ ə mɔ kɔ. Lə aərə nɔ̂, ərə trâ ətshə gâ ye mata əzə̂, bale tshə mbrə̂ nyaka mbrə̂ bale ne. 16 Rəkɔ, a gï tə̂ əzə̂ trö gâ tə̂ mbata ngerə ə̂rɔ̂tə̂ Ndjapä nə, a gï gï tə̂ əzə̂ də awa ne, kanika Ndjapä nə wu əyo əzə̂ ə mbrə ə̂rɔ̂tə̂ ye kə əzə̂, ka ə tɨ əzə̂ gâ lafɔ alɔ ə̂në a ma əgo ə̈bə̈ ərə.