1 Tə̂ alɔ nə səkɔ, Jezu rô tɔ lə akəndɨ ble*12.1 Ble sə tə ə̂lê rəgo ə̂në ə sə mata rɔsɔ. tə̂ ə̈bə̈ əlo saaba. Əgo mî atrawaya nə̂ ye â əndje vɔ̂tə̂ kə kra kumu ble nə â zɨ aə̂lê nə. 2 Ə̂në Afariza wû ərə sə̂ rəkɔ, əndje pâ kə Jezu ə pa: «Wü-a! Atrawaya nə̂ zə sə kə ma ərə ə̂në âgbɔ̂ əpʉ zâ äwä zâ ndə kə pa əzü ma tə̂ əlo saaba ne kɔ.» 3 Bale, Jezu kîrə əpʉ kə əndje ə pa: «E dɨ̂ əpʉ ərə ə̂në Davidə də agbɔbəngâ nə mâ alɔ ə̂në əgo mî əndje kɔ dɨ̂ ne a? 4 Tshə lî gâ lə gbafa Ndjapä ə kô amapa ə̂në əndje tô də əkrɔ kə Ndjapä kɔ ə zɨ̂, ə kô ndje kə agbɔbəngâ nə nə. Kandää, âgbɔ̂ əpʉ zâ ama zâ ndə kə pa tshə zɨ wala azü nə̂ ye nə zɨ ne, kʉtə̂ aawotokrɔ kə lï ndə kə zɨ nə. 5 Wala e dɨ̂ dɨ̂ lə âgbɔ̂ əpʉ nə̂ Mayïzə əpʉ ərə ə̂në, aawotokrɔ ə̂në əndje sə kə ma kosəra mâ lə Anda Ndjapä kɔ, tə̂ əlo saaba, bâta əlo saaba nə bata ne kɔ. Bale, Ndjapä wa ngbanga wa gâ lə kumu əndje ne kɔ ne a? 6 Bale, mə pa kə e, ə̈bə̈ ərə sə koye ə̂në ə sə tə âgbɔ̂ ərə ə rô Anda Ndjapä. 7 Kədə e kə wusə̂ kəmə tshelə âdâ Əpʉ Ndjapä ə̂në ə pâ: "Mə yində nə ə pa əzü ma ə̂rɔ̂tə̂ ye kə angâ nə. Bale, mə yində kə to əkrɔ yi ne"*12.7 Wu Ɔze 6.6., e lï lï kəmə ndə kə wa ngbanga gâ lə kumu azü ə̂në əndje mâ ə̈bə̈ ərə mâ bale ne kɔ. 8 Mbrə ə̂në, Əgblə nə̂ Əzü sə tə əyïnga saaba nə.»

9 Jezu âfɔ kôto ə nâ mâ lə anda aangbɔ nə̂ Afariza nə. 10 Lə anda nə, ə̈bə̈ koshe sə̂ je ə̂në kəna ye tshû gâ ye kɔ. Azü nə yində kə sɔtə̂ ə̈bə̈ əpʉ kə lea Jezu tə̂ nə, əndje yû ətshə ə pa: «Âgbɔ̂ əpʉ zâ äwä kə əzü ndə kə pa tshə grɔ rəka tə̂ azü tə̂ əlo saaba a?» 11 Tshə kîrə əpʉ kə əndje ə pa: «Əzü əde lə takpa tə̂ e, də̂ tshə sə də ndalimi kpiabale â tshə tê gâ lə kudû tə̂ əlo saaba, â tshə sə sə kə na ə gbətɔ ətshə ndə kə wutu də ətshə gashu ne? 12 Bale, əzü rô ndalimi ngbatshe. Rəkɔ, âgbɔ̂ əpʉ zâ äwä kə əzü ndə kə ma ə̂rɔ̂nə kə ngâ nə tə̂ əlo saaba.» 13 Bale, tshə pâ kə koshe nə ə pa: «Yërɔ tshelə kəna zə.» Tshə yêrɔ tshelə kəna ye nə, kəna ye nə gâmba tə̂ ye gâ mandânə mata bale nə səkɔ.

14 Afariza nə wûtu gashu ə têgbɔ kumu əndje gâ pâ äwä ndə kə wo Jezu.

15 Bale, Jezu djî ndə əpʉ nə ə âfɔ kôto ə rô. Ə̈bə̈ əgerə ə̂kpû azü zâ äwä ye. Tshə grɔ̂ rəka tə̂ alayïrəka nɔ̂. 16 Tshə ngâ kə azü nə tə bandanə ndə kə pa əndje pa ndə ye pa gashu ne. 17 Rəkɔ, əpʉ ə̂në awopandəma Ndjapä Ezayi pâ gâ ye kɔ ndəma nə mbrə. Tshə pâ:

18 «Əyïkosəra nə̂ əmə ə̂në mə kê ətshə gâ ye kɔ kə səye,

ətshə ə̂në mə yində ye tə bandanə,

tshelə əmə mɔ tə̂ ye tə bandanə kɔ.

Mə sə kə za Âgbɔ̂ Yîrə̂ nə̂ əmə gâ pâ ye,

tshə sə kə mʉ əpʉ gâ pâ kə ma ərə də äwänə kə amarä nɔ̂.

19 Tshə sə sə kə pʉ nə də ə̈bə̈ əzü bale ne,

tshə sə sə kə ta râwâ ne.

Ə̈bə̈ əzü bale sə sə kə dji tshema ye lə äwä ne.

20 Tshə sə sə kə ngɔ tshelə wara ə̂në ə dûru gâ ye kɔ ne.

Tshə sə sə kə rɨ əwo lə lamba ə̂në ə za kʉ nge kɔ ne.

Tshə sə kə mbrə kʉ rə

ʉrrr ndə kə pa kə ma ərə də äwänə ro pâ əmbrʉ kə ma ərə.

21 Amarä sə kə za lɔsu əndje nɔ̂ kʉ gâ pâ ye.»*12.21 Wu Eza 42.1-4.

22 Bale, əndje nâ də ə̈bə̈ koshe ə̂në tshə sə̂ də afrɔ yîrə̂ lə ye, ə̂në tshə sə̂ tə əyïbula, ə̂në tshə sə̂ tə gbɔndɨbʉ kɔ kə Jezu. Tshə grɔ̂ rəka tə̂ koshe nə â tshə vɔ̂tə̂ kə pa tshema ye â lîshi. 23 Kumu ə̂kpû azü nə nɔ̂ kpê pâ əndu əndje â əndje pâ: «Ə də̂ Ɨrɨ Davidə də̂ kə səye ne a?»

24 Alɔ ə̂në Afariza djî ndə əpʉ səkɔ, əndje pâ: «Koshe sə̂ grɔ aafrɔ ayirə̂ də awlra nə̂ Beləzebulə, makɔndji nə̂ aafrɔ ayirə̂ nə.»

25 Jezu wûsə̂ əpʉ ə̂në ə sə̂ mâ tə̂ lɔsu əndje kɔ, ə pâ kə əndje ə pa: «Əgɔ nɔ̂ ə̂në azü tshelə nə sə kə ma awlra lə takpa tə̂ əndje kɔ, əgɔ nə sə kə ndɨ nə. Gala wala anda nɔ̂ ə̂në azü tshelə nə sə kə ma awlra lə takpa tə̂ əndje kɔ, gala nə wala anda nə sə sə kə sə pə je ne. 26 Kədə Sataa kə grɔ Sataa, tshə sə kə ma awlra gâ tə̂ ye də ə̂tə̂ ye, əgɔngerə nə̂ ye ə sə pə je atâ a? 27 Kədə əmə, mə grɔ aafrɔ ayirə̂ də awlra nə̂ Beləzebulə, azü nə̂ e, əndje sə kə grɔ aafrɔ ayirə̂ nə də awlra nə̂ əde? Âdârə ə̂në azü nə̂ e də ə̂tə̂ əndje yisə̂ nə ə pa əpʉ nə̂ e nə sə sə də äwänə ne. 28 Bale, kədə əmə, mə sə kə grɔ aafrɔ ayirə̂ nə də awlra nə̂ Yîrə̂ Ndjapä, kandää Əgɔngerə nə̂ Ndjapä wûtu ndjɔ gâ tə̂ e gâ ye.

29 «Alɔ ə̂në ə̈bə̈ əzü yində kə li gâ lə anda nə̂ ə̈bə̈ əyïworɔgbɔ ndə kə ko aərə nə̂ ye ndə kə ro də nə, tshə lï ndə kə i ətshə angbʉlînə gâ ye kane â gâ mandânə, tshə lï ndə kə ko aərə tshelə anda nə̂ ye nə nɔ̂ ndə kə ro də nə.

30 «Əzü ə̂në tshə sə sə djoko ndə əmə ne, tshə wə̂ra tə̂ ye tə̂ əmə gâ ye. Əzü ə̂në tshə yi kəna ye yi kə əmə ndə kə ngbo aərə gâ tə̂ nə ne, tshə sə tə awondjɔ tshelə aərə. 31 Âdârə ə̂në mə pa kə e ə pa: azü ə̂në əndje ma nyaka də azü ə̂në əndje gu Ndjapä kɔ, Ndjapä sə kə gba tshelə nyaka lə kumu əndje. Bale, azü ə̂në əndje gu Âgbɔ̂ Yîrə̂, Ndjapä sə sə kə gba tshelə nyaka nə lə kumu əndje ne. 32 Əzü nɔ̂ ə̂në tshə pa əmbrʉ əpʉ gâ tə̂ Əgblə nə̂ Əzü, Ndjapä sə kə gba tshelə nyaka nə lə kumu ye; bale, əzü nɔ̂ ə̂në tshə gu Âgbɔ̂ Yîrə̂, Ndjapä sə sə kə gba tshelə nyaka nə lə kumu ye kpəsəye wala ndje lə aəlo ə̂në ə sə kə na gu nə mandânə kɔ ne.»

33 «Kədə ə̈bə̈ ayɔ sə tə ə̂rɔ̂ nə, leyɔ nə sə ndje tə ə̂rɔ̂ nə. Kədə ə̈bə̈ ayɔ sə tə əmbrʉ nə, leyɔ nə sə ndje tə əmbrʉ nə. Mbrə ə̂në əndje wusə̂ ayɔ mbrə leyɔ nə. 34 E-e, angwa alɔngɔ! E sə kə pa ə̂rɔ̂ əpʉ lə ama e atâ, ə̂në e sə tə aəmbrʉ azü kɔ? Mbrə ə̂në əpʉ ə̂në ə sə tə̂ lɔsu əzü kɔ kə wutu lə ama ye gashu. 35 Ə̂rɔ̂ əzü wutu də aə̂rɔ̂ aərə lə agrɔ nə̂ ye ə̂në ə sə tə̂ lɔsu ye kɔ. Əmbrʉ əzü wutu də aəmbrʉ aərə lə əmbrʉ agrɔ nə̂ ye ə̂në ə sə tə̂ lɔsu ye kɔ. 36 Mə pa kə e, tə̂ alɔ kə wa ngbanga nə̂ Ndjapä, azü sə kə kirə də əpʉ gâ pâ aamba aəpʉ nɔ̂ ə̂në əndje pa kɔ. 37 Mbrə ə̂në tə̂ äwä aəpʉ ama zə də əndje sə kə dɨ əbə tə ə̂rɔ̂ əzü, wala əndje sə kə wa ngbanga gâ lə kumu zə.»

38 Bale, alabə̈ aawoyisə̂ âgbɔ̂ əpʉ nə̂ Mayïzə də alabə̈ Afariza zâ əpʉ ə pâ: «Awoyisə̂ ərə, mä ə̈bə̈ ərə ə̈lü ä wu ka ə pa Ndjapä kə wlâ əbə kɔ.»

39 Jezu kîrə əpʉ kə əndje ə pa: «Azü tshe kpəsəye ə̂në əndje sə tə aəmbrʉ azü ə dji əpʉ ama Ndjapä dji ne kɔ, əndje yində kə wu ə̈bə̈ ərə ə̈lü. Bale, əndje sə sə kə wu nə ne, kʉtə̂ ərə ə̈lü ə̂në ə wûtu gâ tə̂ awopandəma Ndjapä Jonasə kɔ ə lî gâ ye. 40 Mbrə ə̂në, äwä bale mata ə̂në Jonasə mâ əlo vəta lə əgerə giangû kɔ, Əgblə nə̂ Əzü sə kə ma ndje äwä bale əlo vəta lə ashɔ. 41 Tə̂ alɔ kə wa ngbanga nə̂ Ndjapä, azü əgɔ Ninivə sə kə afɔ kpə ətshi azü tshe kpəsəye ndə kə za əpʉ gâ lə kumu əndje. Mbrə ə̂në, azü əgɔ Ninivə tshî äwä angbrɔ kə mbrə tə̂ əndje tʉ ə̂në əndje djî kə mʉ əpʉ nə̂ Jonasə kɔ. Bale, ə̈bə̈ əzü sə koye ə̂në tshə rô Jonasə nə gâ ye. 42 Tə̂ alɔ kə wa ngbanga nə̂ Ndjapä, yashe ngerə əgɔ tshepakɔnɔ sə kə afɔ kpə ətshi azü tshe kpəsəye ndə kə za əpʉ gâ lə kumu əndje. Mbrə ə̂në, tshə âfɔ lə əgɔ ə̂në ə sə ngrʉ̂ kɔ, ə nâ ndə dji əpʉ kə wusə̂ âdâ ərə lə ama Salomɔ. Bale, ə̈bə̈ əzü sə kotəye ə̂në tshə rô Salomɔ nə gâ ye.»

43 «Alɔ ə̂në ə̈bə̈ afrɔ yîrə̂ wûtu lə ə̈bə̈ əzü gâ ye, tshə sə kə na ana lə ngbûndû ndə kə pra ə̈bə̈ ətshe ndə kə wu tə̂ ye tə̂ nə. Bale, tshə sɔtə̂ ətshe nə sɔ ne. 44 Bale, tshə sə kə pa nə ə pa: "Mə sə kə do tə̂ əmə ə gu mâ lə anda nə̂ əmə ə̂në mə wûtu lə nə kɔ." Alɔ ə̂në tshə do tə̂ ye ə gu, tshə sə kə wu anda nə, tshelə nə sə̂ ndawu, əndje ngbô tshelə nə mvo ə gâmba tə ə̂rɔ̂nə gâ ye. 45 Bale, tshə sə kə na ə ko alabə̈ angâ nə də̂ aafrɔ ayirə̂ nə mindû amanə bishi, ə̂në əndje sə tə aəmbrʉ nə ə rô ətshə gâ ye kɔ. Əndje sə kə gu ə li gâ lə anda nə ə gamba ə̂sə̂ əndje. Mandânə, əzü nə sə kə wu əyo ə ro pâ ənə̂ ətshi nə kɔ. Ərə ə̂në ə sə kə wutu gâ tə̂ azü tshe kpəsəye ə̂në əndje sə tə aəmbrʉ azü kɔ kə sə̂.»

46 Alɔ ə̂në Jezu sə̂ pə kə pa əpʉ kə ə̂kpû azü nə kɔ, əyï nə də alaye nə yî kumu əndje. Əndje kâ mashu ə sə̂ kə pra äwä ndə kə pa əpʉ kə ətshə. 47 Ə̈bə̈ əzü pâ kə ətshə ə pa: «Əyï zə də alaye zə ka mashu, əndje yində kə pa əpʉ kə əbə.» 48 Bale, Jezu kîrə əpʉ kə əzü səkɔ ə pa: «Əde kə sə̂ tə əyï əmə? Aəde kə sə̂ tə alaye əmə?» 49 Mandânə, tshə yî kəna ye ə yîsə̂ atrawaya nə̂ ye ə pâ: «E lïshi-a! Əyï əmə də alaye əmə kə səye. 50 Mbrə ə̂në, əzü ə̂në tshə mbrə ərə ə̂në tshelə Abä əmə ə̂në tshə sə mâ lafɔ kɔ yində nə kɔ, tshə sə tə aye əmə, tə kobɔ əmə wala tə əyï əmə.»