1 Kʉ pə tə̂ alɔ nə səkɔ, Jezu wûtu lə anda ə nâ ə sə̂ gâ tʉ mâ tə̂ ama dala ə̂ngû əgɔ Galile. 2 Ə̈bə̈ əgerə ə̂kpû azü ngbô tə̂ əndje gâ ngotə̂ ye â tshə ô gâ lə ə̈bə̈ əgerə âgbâ â sə̂ gâ tʉ. Azü nə kâ ənə̂ əndje mâ tə̂ ama ə̂ngû nə. 3 Tshə pâ əpʉ kə əndje tə bandanə tə̂ äwä aəpʉ kəwû. Tshə pâ: «Ə̈bə̈ awolu ərə nâ gâ lə kəndɨ ndə kə lu angwa rəgo. 4 Ə̂në tshə sə̂ kə lu angwa rəgo nə kɔ, alabə̈ nə yɔ̂ gâ ndʉ äwä, ayanu nâ ə dê nɔ̂. 5 Alabə̈ nə yɔ̂ gâ pâ ashɔ badja ə̂në ashɔ nə mî mî ne kɔ. Angwa rəgo nə kô ə gêrə katshä, mbrə ə̂në ashɔ nə mî mî ne. 6 Bale, ə̂në alɔ âfɔ ndə kə tɔ nə kɔ, ə tshû nɔ̂ ə ôrɔ mbrə ə̂në aəshe nə lî ashɔ lî tə ə̂rɔ̂nə ne. 7 Alabə̈ nə yɔ̂ gâ lə gonge. Gonge nə gêrə ə wô rəgo nə nɔ̂. 8 Alabə̈ nə yɔ̂ gâ lə ə̂rɔ̂ ashɔ. Ə kô ə lê: ə̈bə̈ nə lê ngbangbo bale (100), ə̈bə̈ nə lê zazü vəta, â ə̈bə̈ ata nə lê zazü bale də morofo.» 9 Jezu pâ kwatə̂ye ə pa: «Əzü ə̂në tshə sə də ətu kə dji də əpʉ, tshə djï!»

10 Atrawaya nâ trö də ətshə ə yû ətshə ə pa: «Bə pa əpʉ kə əndje tə̂ äwä aəpʉ kəwû mbrə yekɔ?» 11 Tshə kîrə əpʉ kə əndje ə pa: «Ndjapä zâ äwä kə e ndə kə pa e wusə̂ tshelə âdâ əpʉ kəwû Əgɔngerə tshelafɔ. Bale, ənə̂ əndje, Ndjapä zâ äwä nə zâ kə əndje bale ne. 12 Mbrə ə̂në, əzü ə̂në tshə sə də ə̈bə̈ ərə ndə ye, əndje sə kə za ə̈bə̈ nə gâ pâ nə kə ətshə â tshə sə kə sə də ərə ro pâ nə. Bale, əzü ə̂në tshə sə sə də ə̈bə̈ ərə ndə ye ne, əndje sə kə za aya ərə ə̂në tshə sə də nə kɔ tə̂ ye. 13 Âdârə ə̂në mə pa əpʉ kə əndje lə aəpʉ kəwû kɔ kə sə̂: əndje sə kə lishi, ə wu ərə wu bale ne; əndje sə kə dji əpʉ, ə dji tshelə âdâ əpʉ nə dji bale ne. 14 Rəkɔ, ka əpʉ ama Ndjapä ə̂në Ezayi pâ mbrə əndje kɔ, ndəma nə ma. Tshə tâ ə pa:

"E sə kə dji əpʉ tə ə̂rɔ̂nə,

bale e sə sə kə dji tshelə nə kpiabale ne.

E sə kə lishi tə ə̂rɔ̂nə,

bale e sə sə kə wu ə̈bə̈ ərə kpiabale ne.

15 Mbrə ə̂në lɔsu azü əgɔ səye gbɔ̂ gâ ye.

Əndje bî ətu əndje gâ tə̂ nə gâ ye

ə pî ala əndje gâ tə̂ nə gâ ye

ndə kə pa əndje wu ərə wu də ala əndje ne,

əndje dji əpʉ dji də ətu əndje ne,

ə dji tshelə âdâ əpʉ dji ne,

ə tshi äwä angbrɔ kə ma tə̂ əndje tshi tʉ

kanika mə gɔ grɔ rəka nə̂ əndje tə̂ əndje ne."*

16 «Ənə̂ e tə ə̂rɔ̂nə mbrə ə̂në ala e sə kə wu ərə â ətu e sə kə dji əpʉ. 17 Djatra əpʉ, mə pa kə e, aawopandəma Ndjapä də aə̂rɔ̂ azü ngbatshe yîndə kə wu kəmə ərə ə̂në e sə kə wu nə kɔ, bale, əndje wû wû ne. Əndje yîndə kə dji kəmə əpʉ sə̂ ə̂në e sə kə dji nə kɔ, bale, əndje djî djî ne.»

18 «Rəkɔ, e djï tshelə âdâ əpʉ kəwû nə̂ awolu angwa rəgo nə. 19 Azü ə̂në əndje dji əpʉ Əgɔngerə tshelafɔ ə dji tshelə nə dji ne kɔ, djablo na ə za ərə ə̂në əndje lû gâ tə̂ lɔsu əndje kɔ ə ro də nə. Əndje sə mata tshe ndʉ äwä ə̂në angwa rəgo nə yɔ̂ gâ tə̂ nə kɔ. 20 Alabə̈ azü sə mata ashɔ badja ə̂në angwa rəgo nə yɔ̂ gâ tə̂ nə kɔ. Əndje dji əpʉ nə ə yində nə trale də amɔ tshelə əndje. 21 Bale, əpʉ nə za lɔsu əndje za ne. Əndje yində əpʉ nə kʉ ndə ə̈bə̈ alɔ. Alɔ ə̂në ərə əyo kə wutu wala azü gi əyo tə̂ əndje mbrə əpʉ nə, əndje tshi äwä əpʉ nə tʉ. 22 Alabə̈ azü sə mata ashɔ tshelə əshi ə̂në angwa rəgo nə yɔ̂ gâ lə nə kɔ. Əndje dji əpʉ nə, bale, kə li tshelə əndje gâ pâ aərə tshepashɔ səye, də əgo aərə ə̂në ə frɔ əndje kɔ, kânga äwä tə̂ əpʉ nə ndə kə pa ə le. 23 Alabə̈ azü sə mata ə̂rɔ̂ ashɔ ə̂në angwa rəgo nə yɔ̂ gâ lə nə kɔ. Əndje dji əpʉ nə ə dji tshelə nə ə le tə ə̂rɔ̂nə. Alabə̈ nə le ngbangbo bale, alabə̈ əndje le zazü vəta, â alabə̈ aata əndje le zazü bale də morofo.»

24 Jezu kwatə̂ye ə pâ ə̈bə̈ əpʉ kəwû kə əndje ə pa: «Əgɔngerə tshelafɔ sə mata əpʉ nə̂ ə̈bə̈ koshe ə̂në tshə lû ə̂rɔ̂ angwa rəgo gâ lə kəndɨ nə̂ ye. 25 Bale, alɔ ə̂në azü lô na ye gâ ye kɔ, əyïkowɔ nə̂ ye nâ ə lû əmbrʉ angwa rəgo gâ lə angwa ble nə ə rô ərə nə̂ ye. 26 Alɔ ə̂në rəgo nə kô ə gêrə gâ ye kɔ, ə vɔ̂tə̂ kə le nə, əmbrʉ ebe nə gêrə ndje. 27 Alayïkosəra nə̂ əyïnga kəndɨ nə nâ ə pâ kə ətshə ə pa: "Âgbɔ̂ əzü, ə də̂ ə̂rɔ̂ angwa rəgo də̂ bə lû gâ lə kəndɨ nə̂ zə nə kɔ ne a? Rəkɔ, əmbrʉ ebe səye to ənə̂ ye mata a?" 28 Tshə kîrə əpʉ kə əndje ə pa: "Ə̈bə̈ əyïkowɔ kə mâ ərə səkɔ." Bale, alayïkosəra nə yû ətshə ə pa: "Bə yində nə ə pa ä na ə su əmbrʉ ebe nə a?" 29 Tshə pâ kə əndje ə pa: "Bale ne. Mbrə ə̂në, kədə e sə kə su əmbrʉ ebe nə, e lï ndje äwä bale ndə kə su aəshe ble nə. 30 E kätə̂ nə nɔ̂ ə gerə äwä bale ʉrrr ndjɔ gâ tə̂ alɔ kə wa angwa rəgo nə. Kədə alɔ kə wa angwa rəgo nə kə lî gâ ye, mə sə kə pa kə alayïkosəra nə ə pa: e sü əmbrʉ ebe nə angbʉlînə ə ngbö gâ tə̂ nə ndə kə sho nə gâ ye kane. Bale, e ngbö ble nə gâ lə agrɔ nə̂ əmə."»

31 Jezu kwatə̂ye ə pâ ə̈bə̈ əpʉ kəwû kə əndje ə pa: «Əgɔngerə tshelafɔ sə mata ə̂ndjî ayɔ ə̂në əɨrɨ nə kə də̂ mutardə kɔ, ə̂në ə̈bə̈ əzü zâ ə lû gâ lə kəndɨ nə̂ ye kɔ. 32 Ə sə tə ə̂ndjî rəgo ə̂në ə sə teashe ə rô ə̂dû ə̂ndjî arəgo nɔ̂. Bale, alɔ ə̂në ə gêrə gâ ye kɔ ə rô ə̂dû akako gûsû tshelə kəndɨ nə nɔ̂. Ə mâ ndje tə əgerə ayɔ â ayanu na ə ma akomɔ əndje gâ lə ayana nə.»

33 Jezu kwatə̂ye ə pâ ə̈bə̈ ata əpʉ kəwû kə əndje ə pa: «Əgɔngerə tshelafɔ sə mata əyï mapa ə̂në ə̈bə̈ yashe zâ ə vɔ̂ gâ lə əgerə ndjuwu kə ma də mapa ə zâ tshelə nə ʉrrr â ômɔ nɔ̂.»

34 Jezu pâ əpʉ sə̂ nɔ̂ kə ə̂kpû azü nə tə̂ äwä aəpʉ kəwû. Tshə pâ əpʉ pâ kə azü nə tə̂ ə̈bə̈ äwä kpî ne. Tshə pâ əpʉ kə əndje kʉ tə̂ äwä aəpʉ kəwû, 35 ndə kə pa ndəma əpʉ ə̂në awopandəma Ndjapä pâ kɔ ma. Tshə pâ:

«Mə sə kə pa əpʉ kə əndje tə̂ äwä əpʉ kəwû.

Mə sə kə mʉ əpʉ aərə ə̂në ə kô tə̂ əndje wû-e kɔ

ə vɔ̂tə̂ nə mâ tə̂ alɔ kə ma tshepashɔ.»*

36 Bale, Jezu kâtə̂ ə̂kpû azü nə â gû na ye gâ lə manda. Atrawaya nə̂ ye nâ trö də ətshə ə pâ kə ətshə ə pa: «Yisə̂ tshelə âdâ əpʉ kəwû əmbrʉ ebe ə̂në ə sə lə kəndɨ nə kɔ kə ä.» 37 Tshə kîrə əpʉ kə əndje ə pa: «Əzü ə̂në tshə lu ə̂rɔ̂ angwa rəgo nə kɔ, kə də̂ Əgblə nə̂ Əzü. 38 Kəndɨ nə kə də̂ tshepashɔ. Ə̂rɔ̂ angwa rəgo nə kə də̂ azü ə̂në əndje sə tə azü Əgɔngerə nə. Əmbrʉ ebe nə, kə də̂ aneshe nə̂ djablo. 39 Əyïkowɔ nə ə̂në tshə lû əmbrʉ ebe nə kɔ, kə də̂ djablo. Tshekɨ kə ko angwa rəgo nə kə də̂ kə nglɔ tshepashɔ nɔ̂. Azü kə ko angwa rəgo nə kə də̂ atrawaya nə̂ Ndjapä. 40 Mata ə̂në əndje ngbo əmbrʉ ebe gâ tə̂ nə ndə kə sho nə kɔ, ərə nə sə kə sə ndje äwä bale rə tə̂ alɔ kə nglɔ tshepashɔ. 41 Əgblə nə̂ Əzü sə kə wla atrawaya nə̂ Ndjapä. Əndje sə kə wutu də azü nɔ̂ ə̂në əndje sə kə ma ndə kə pa angâ əndje te gâ lə nyaka kɔ, də azü ə̂në əndje sə kə ma əmbrʉ ərə kɔ lə Əgɔngerə nə̂ Ndjapä gashu. 42 Əndje sə kə wli əndje gâ ala âgbɔ̂ əwo ə̂në ə rɨ rɨ tə̂ ərə ne kɔ. Kôto də̂ əndje sə kə kɨ nə də ngɔla əndje ə zɨ tshelə əji əndje. 43 Bale, aə̂rɔ̂ azü sə kə tshe mata alɔ lə Əgɔngerə nə̂ Abä əndje. Əzü ə̂në tshə sə də ətu kə dji də əpʉ, tshə djï!»

44 «Əgɔngerə tshelafɔ sə kwatə̂ye mata ə̈bə̈ agrɔ ə̂në əndje zâ wû gâ lə ə̈bə̈ kəndɨ. Ə̈bə̈ əzü sɔ̂tə̂ nə â zâ əndʉ nə wû kwatə̂ye. Tshelə ye mɔ̂ â tshə nâ ə kâ aərə nə̂ ye nɔ̂ â yɔ̂ kəndɨ səkɔ.»

45 «Əgɔngerə tshelafɔ sə kwatə̂ye mata ə̈bə̈ awoka aərə ə̂në tshə sə kə pra ə̂rɔ̂ kədji ndə kə yɔ nə. 46 Alɔ ə̂në tshə sɔ̂tə̂ ə̈bə̈ nə ə̂në ndogɔ nə gbɔ̂ wââ kɔ, tshə nâ ə kâ aərə nə̂ ye nɔ̂ ə yɔ̂ kədji səkɔ.»

47 «Əgɔngerə tshelafɔ sə kwatə̂ye mata gbânda ə̂në əndje wlî gâ ala ə̂ngû əngbrʉ ə̂në ə kô adongo agiangû nɔ̂. 48 Alɔ ə̂në agiangû nə sû tshelə gbânda nə gâ ye kɔ, aawopra agiangû nə gbə̂tɔ gbânda nə gâ tə̂ ama ə̂ngû nə, ə sə̂ gâ tʉ ə rô tshelə agiangû nə: əndje kô aə̂rɔ̂ əndje gâ lə akakli, bale, ə kô aəmbrʉ əndje nə vê-e. 49 Tə̂ alɔ kə nglɔ tshepashɔ, ə sə kə sə ndje äwä bale rə. Atrawaya nə̂ Ndjapä sə kə na ndə kə sɔ tshelə takpa tə̂ alayïnyaka də aə̂rɔ̂ azü 50 ə ko alayïnyaka nə wli gâ ala âgbɔ̂ əwo ə̂në ə rɨ rɨ tə̂ ərə ne kɔ. Kôto də̂ əndje sə kə kɨ nə də ngɔla əndje ə zɨ tshelə əji əndje.»

51 Jezu yû əndje ə pa: «E djî tshelə aəpʉ sə̂ nɔ̂ a?» Əndje kîrə əpʉ kə ətshə ə pa: «Ä djî tshelə nə gâ ye.» 52 Bale, tshə pâ kə əndje ə pa: «Âdârə ə̂në awoyisə̂ âgbɔ̂ əpʉ nə̂ Mayïzə nɔ̂ ə̂në tshə wûsə̂ ərə gâ pâ Əgɔngerə tshelafɔ gâ ye kɔ, tshə sə mata əyïnga anda ə̂në tshə sə kə wutu də atafa aərə də aangbrɔ aərə lə agrɔ nə̂ ye gashu.»

53 Alɔ ə̂në Jezu pâ əpʉ tə̂ äwä aəpʉ kəwû səkɔ ə kâ gâ ye kɔ, tshə âfɔ kôto ə rô. 54 Tshə nâ na ye mâ lə gala ə̂në tshə gêrə lə nə kɔ ə vɔ̂tə̂ kə yisə̂ ərə kə azü lə anda aangbɔ nə̂ əndje. Azü ə̂në əndje sə̂ kə dji əpʉ nə̂ ye kɔ, kumu əndje kpê pâ əndu əndje â əndje pâ: «Tshə sɔ̂tə̂ marä tə̂ kə wusə̂ ərə səke də marä awlra kə ma aərə ə̈lü səke kotâ a? 55 Ə də̂ ɨrɨ awosuru tshelə aayɔ də̂ kə səye ne a? Ə də̂ əyï nə də̂ Marə̂ ne a? Ə də̂ alaye nə də̂ Zake, Jozafu, Shemɔ gâ ndə Zudə ne a? 56 Alakobɔ nə sə sə koye lə takpa tə̂ əzə̂ ne a? Tshə sɔ̂tə̂ aərə sə̂ nɔ̂ kotâ a?» 57 Aərə sə̂ nɔ̂ kânga äwä tə̂ əndje ndə kə pa əndje za lɔsu əndje kə ətshə. Bale, Jezu pâ kə əndje ə pa: «Əndje yində awopandəma Ndjapä yi lə əgɔ nə̂ ye wala lə bəngʉ nə̂ ye də ə̂tə̂ ye ne.» 58 Jezu mâ aərə ə̈lü mâ ngbatshe kôto ne, mbrə ə̂në azü nə zâ lɔsu əndje zâ kə ətshə ne.