Mateus 13

Əmbrʉ ebe

24 Jezu kwatə̂ye ə pâ ə̈bə̈ əpʉ kəwû kə əndje ə pa: «Əgɔngerə tshelafɔ sə mata əpʉ nə̂ ə̈bə̈ koshe ə̂në tshə lû ə̂rɔ̂ angwa rəgo gâ lə kəndɨ nə̂ ye. 25 Bale, alɔ ə̂në azü lô na ye gâ ye kɔ, əyïkowɔ nə̂ ye nâ ə lû əmbrʉ angwa rəgo gâ lə angwa ble nə ə rô ərə nə̂ ye. 26 Alɔ ə̂në rəgo nə kô ə gêrə gâ ye kɔ, ə vɔ̂tə̂ kə le nə, əmbrʉ ebe nə gêrə ndje. 27 Alayïkosəra nə̂ əyïnga kəndɨ nə nâ ə pâ kə ətshə ə pa: "Âgbɔ̂ əzü, ə də̂ ə̂rɔ̂ angwa rəgo də̂ bə lû gâ lə kəndɨ nə̂ zə nə kɔ ne a? Rəkɔ, əmbrʉ ebe səye to ənə̂ ye mata a?" 28 Tshə kîrə əpʉ kə əndje ə pa: "Ə̈bə̈ əyïkowɔ kə mâ ərə səkɔ." Bale, alayïkosəra nə yû ətshə ə pa: "Bə yində nə ə pa ä na ə su əmbrʉ ebe nə a?" 29 Tshə pâ kə əndje ə pa: "Bale ne. Mbrə ə̂në, kədə e sə kə su əmbrʉ ebe nə, e lï ndje äwä bale ndə kə su aəshe ble nə. 30 E kätə̂ nə nɔ̂ ə gerə äwä bale ʉrrr ndjɔ gâ tə̂ alɔ kə wa angwa rəgo nə. Kədə alɔ kə wa angwa rəgo nə kə lî gâ ye, mə sə kə pa kə alayïkosəra nə ə pa: e sü əmbrʉ ebe nə angbʉlînə ə ngbö gâ tə̂ nə ndə kə sho nə gâ ye kane. Bale, e ngbö ble nə gâ lə agrɔ nə̂ əmə."»