1 Tə̂ alɔ nə səkɔ, atrawaya nə nâ gâ ngotə̂ Jezu ə yû ətshə ə pa: «Əde kə sə tə âgbɔ̂ əzü ə rô angâ nə lə Əgɔngerə tshelafɔ?» 2 Bale, Jezu ê ə̈bə̈ aya əgblə ə zâ ətshə tɔ gâ lə ə̂grû tə̂ əndje 3 ə pâ: «Djatra əpʉ, mə pa kə e: kədə e tshi äwä angbrɔ kə ma tə̂ e tshi tʉ â sə sə mata aaya aneshe ne, e sə sə kə li gâ lə Əgɔngerə tshelafɔ bale ne. 4 Âdârə ə̂në əzü â ma tə̂ ye tə əngʉ əzü mata aya əgblə səye, tshə sə kə sə tə âgbɔ̂ əzü ə rô azü nɔ̂ lə Əgɔngerə tshelafɔ. 5 Əzü nɔ̂ ə̂në tshə wəra ə̈bə̈ aya əgblə tə ə̂rɔ̂nə mata ətshə ənə̂ səye də əɨrɨ əmə, tshə wəra əmə də ə̂tə̂ əmə.»

6 «Bale, kədə ə̈bə̈ əzü kə mbrə â ə̈bə̈ aya əgblə bale lə aneshe səye ə̂në əndje za lɔsu əndje kə əmə kɔ kə te gâ lə nyaka, ə sə tə ə̂rɔ̂nə mbrə ətshə ndə kə pa əndje i ə̈bə̈ əgerə əkpʉ gâ tə̂ əgʉ ye ə wli ətshə də nə mâ budu ə̂ngû əngbrʉ. 7 Əyo gâ pâ azü tshepashɔ, mbrə aərə ə̂në azü sə kə te tə̂ nə gâ lə nyaka kɔ! Aərə ə̂në ə sə kə ma ndə kə pa azü te gâ lə nyaka mbrə nə kɔ sə kə sə je alɔnɔ̂, bale əyo gâ pâ əzü ə̂në tə̂ äwä ye ə̈bə̈ ngâ nə sə kə te gâ lə nyaka!

8 «Kədə kəna zə wala ə̈nü zə kə yində kə frɔ əbə ndə kə pa bə te gâ lə nyaka, dë gâ ye, ə wlï ngrʉ̂ tə̂ zə gashe. Ə sə tə ə̂rɔ̂nə mbrə əbə ndə kə pa bə li gâ ə̂sə̂ djatra sorô də kəna zə wala ə̈nü zə bale, ə rô ndə kə pa bə bata akəna zə wala aə̈nü zə bishi, əndje wli əbə də nə gâ ala əwo ə̂në ə rɨ rɨ tə̂ ərə ne kɔ. 9 Kədə ala zə kə yində kə frɔ əbə ndə kə pa bə te gâ lə nyaka, tshäkəwla ə wlï ngrʉ̂ tə̂ zə gashe. Ə sə tə ə̂rɔ̂nə mbrə əbə ndə kə pa bə li gâ ə̂sə̂ djatra sorô də ala zə bale ə rô ndə kə pa bə bata ala zə bishi, əndje wli əbə də nə gâ ə̂sə̂ əyo, gâ ala əwo.»

10 «Ala e gbɔ̈! E wü wü ə̈bə̈ aya aneshe səye bale tə amba əzü lə ala e ne. Mbrə ə̂në, mə pa kə e ə pa atrawaya nə̂ Ndjapä nə̂ aneshe səkɔ sə kə ka alɔnɔ̂ gâ ətshi Abä əmə ə̂në tshə sə mâ lafɔ kɔ. [11 Mbrə ə̂në Əgblə nə̂ Əzü nâ ndə kə tshɔ azü ə̂në əndje yû gâ ye kɔ lə kuzu.]*18.11 Əpʉ səke sə sə lə alabə̈ aangbrɔ afraka Ndjapä də ama grakə ne.

12 «E wü ənə̂ e atâ a? Kədə ə̈bə̈ əzü â sə də andalimi ngbangbo bale (100) â kədə ə̈bə̈ nə bale lə takpa tə̂ əndje kə yu, tshə sə sə kə katə̂ ə̂dû əndje nə zazü vəna də grʉvəta amanə vəna (99) pâ kaga ndə kə na na ye ə pra ətshə nə sə̂ bale ə̂në tshə yû gâ ye kɔ ne a? 13 Djatra əpʉ, mə pa kə e, kədə tshə â sɔtə̂ ye, tshelə ye sə kə sə də ə̂rû mbrə ndalimi bale səkɔ ə rô ə̂rû mbrə ə̂dû andalimi nə zazü vəna də grʉvəta amanə vəna ə̂në əndje yû yû ne kɔ. 14 Äwä bale ndje, Abä e ə̂në tshə sə mâ lafɔ kɔ yində nə yi ə pa ə̈bə̈ aya aneshe səye bale yu ne.»

15 «Kədə aye zə kə ma əmbrʉ ərə kə əbə, nä ə wü ətshə. E də ətshə bishi, bə yisə̂ nyaka nə̂ ye kə ətshə. Kədə tshə dji əbə, kandää, bə wə̂ra aye zə nə gâ ye. 16 Bale, kədə tshə dji əbə dji ne, zä ə̈bə̈ əzü bale wala bishi gâ ndə zə e na kwatəndje ndə kə pa e gamba əpʉ nə də ala azü bishi nə wala vəta nə. 17 Kədə əzü nə kə wəra tə̂ ye ndə kə dji əpʉ nə̂ əndje, yïsə̂ ndəma əpʉ nə kə Laglizə. Kədə tshə wəra tə̂ ye ndje ndə kə dji əpʉ nə̂ azü Laglizə nə, wü ətshə mata ə̈bə̈ əzü ə̂në tshə wusə̂ Ndjapä wu ne kɔ wala ə̈bə̈ aworɔ ngendja lapɔ.

18 «Djatra əpʉ, mə pa kə e: ərə nɔ̂ ə̂në e sə kə kânga äwä nə pâ ashɔ, Ndjapä sə kə kânga äwä nə mâ lafɔ-e. Ərə nɔ̂ ə̂në e sə kə krɔ äwä nə pâ ashɔ, Ndjapä sə ndje kə krɔ äwä nə mâ lafɔ-e.

19 «Djatra əpʉ, mə kwatə̂ əmə ə pa kə e: kədə azü bishi lə takpa tə̂ e kə dji tə̂ əndje pâ ashɔ səye ndə kə yu tshuku ərə yekɔ, Abä əmə ə̂në tshə sə mâ lafɔ kɔ sə kə za ərə səkɔ kə əndje. 20 Mbrə ə̂në, tə̂ ətshe ə̂në azü bishi wala vəta ngbo tə̂ əndje gâ tə̂ nə də əɨrɨ əmə, mə sə lə takpa tə̂ əndje.»

21 Bale, Piarə nâ gâ ngotə̂ Jezu ə yû ətshə ə pa: «Âgbɔ̂ Əyïngerə, kədə aye əmə kə ma nyaka kə əmə, mə sə kə gba tshelə ködä nyaka nə lə kumu ye äwä vəkɔ? Äwä mindu amanə bishi a?» 22 Jezu kîrə əpʉ kə ətshə ə pa: «Mə pa pa kə əbə ə pa bə ma ʉrrr äwä mindû amanə bishi ne, bale, bə ma ʉrrr zazü vəta də morofo äwä mindû amanə bishi (77). 23 Âdârə ə̂në Əgɔngerə tshelafɔ sə mata ə̈bə̈ əyïngerə ə̂në tshə yində kə pa alayïkosəra nə̂ əne na ə dɨ ngendja nə̂ əne kə əne, əne wu. 24 Alɔ ə̂në tshə vɔ̂tə̂ kə dɨ ngendja nə gâ ye kɔ, əndje nâ də ə̈bə̈ əyïkosəra nə kə ətshə ə̂në ngendja ə̂në ə sə lə kumu ye kɔ gêrə ngbatshe. 25 Ə̂në əyïkosəra nə sə̂ sə̂ də ngendja ndə kə piyi də nə ne kɔ, âgbɔ̂ əzü nə̂ ye nə zâ ama ndə kə pa əndje ka ətshə, ə ka əwɔ nə də aneshe nə̂ ye gâ ndə aərə nə̂ ye nɔ̂ ə ko ngendja nə ə piyi də ködä nə. 26 Əyïkosəra nə tê gâ tshekudu ye ə zâ kumu ye su ashɔ ə pâ: "Mə tegbɔ ə̈nü zə, kä ə kä kane, mə sə kə piyi nə nɔ̂ kə əbə!" 27 Əyo ye mâ âgbɔ̂ əzü nə â tshə gbâ tshelə ködä nə lə kumu ye â kâtə̂ ye ndə kə pa tshə gu na ye.

28 «Mandânə ə̂në tshə wûtu gashu gâ ye kɔ, əyïkosəra səkɔ tê ə̈bə̈ gbɔbəngâ nə bale ə̂në ngendja nə̂ ye sə̂ lə kumu ye ə̂lê ngendja ngbangbo bale (100). Tshə têgbɔ ətshə ə têgbɔ angrɔ ye krâ ə pâ: "Pïyi ködä nə̂ əmə kə əmə!" 29 Gbɔbəngâ nə səkɔ tê gâ tshekudu ye, ə kɨ̂ ə̂sə̂ əyo tə̂ ye kə ətshə ə pa: "Mə tegbɔ ə̈nü zə, kä ə kä kane, mə sə kə piyi nə kə əbə." 30 Bale, ətshə, tshə yîndə nə yî ne, tshə nâ də ətshə ə wlî ətshə gâ lə anda kânga ndə kə pa tshə sə pə ma je ʉrrr ə piyi koda nə gâ ye kane. 31 Alɔ ə̂në agbɔbəngâ əyïkosəra səkɔ wû ərə ə̂në ə mâ kɔ, əyo nə mâ əndje tə bandanə â əndje nâ ə pâ ndə əpʉ aərə nɔ̂ ə̂në ə mâ kɔ kə âgbɔ̂ əzü nə̂ əndje nə. 32 Bale, âgbɔ̂ əzü nə ê əyïkosəra səkɔ ə pâ kə ətshə ə pa: "Əmbrʉ əyïkosəra, mə gbâ tshelə ködä nɔ̂ ə̂në ə sə̂ lə kumu zə kɔ mbrə ə̂në bə kɨ̂ ə̂sə̂ əyo tə̂ zə kə əmə. 33 Bə lï lï ndje ndə kə wu əyo gbɔbəngâ zə mata ə̂në mə wû əyo zə kɔ ne a?" 34 Əkɔ zâ âgbɔ̂ əzü nə â tshə zâ ətshə gâ lə kəna azü ndə kə pa əndje gi əyo tə̂ ye ʉrrr tshə piyi ködä nə nɔ̂ gâ ye kane.» 35 Bale, Jezu kwatə̂ye ə pâ: «Abä əmə ə̂në tshə sə mâ lafɔ kɔ sə ndje kə ma kə e äwä bale rə, kədə əzü bale bale lə takpa tə̂ e kə gba tshelə ködä nyaka gba lə kumu aye nə də lɔsu ye nɔ̂ ne.»