1 Alɔ ə̂në Jezu jêrə pâ kaga nə gâ ye kɔ, ə̈bə̈ əgerə ə̂kpû azü zâ äwä ye. 2 Ə̈bə̈ əyïbroma nâ gâ ngotə̂ ye ə tê gâ tshekudu ye ə pâ kə ətshə ə pa: «Âgbɔ̂ Əyïngerə, kədə bə yində nə, bə lï ndə kə mbrə ndə kə pa akwa əmə sə mvo.» 3 Jezu yî kəna ye ə gôro ətshə ə pâ kə ətshə ə pa: «Mə yîndə nə gâ ye! Akwa zə nə sə̈ mvo.» Kʉ pə kôto səkɔ, broma nə kâtə̂ ye. 4 Mandânə, Jezu pâ kə ətshə ə pa: «Djï əmə tə ə̂rɔ̂nə kane! Pä ndə nə pä kə ə̈bə̈ əzü bale ne. Bale, nä ə mä tə̂ zə kə awotokrɔ ndə kə pa tshə wu əbə. Tö əkrɔ mata ə̂në âgbɔ̂ əpʉ nə̂ Mayïzə yû tshuku nə kɔ ndə kə pa azü nɔ̂ wusə̂ nə ə pa broma nə zə kâ gâ ye.»

5 Alɔ ə̂në Jezu sə̂ kə li gâ lə gala Kaprənayɔmə kɔ, ə̈bə̈ kapita nə̂ atrugu əgɔ Rɔmə nâ gâ ngotə̂ ye ə kɨ ə̂sə̂ əyo tə̂ ye kə ətshə 6 ə pa: «Âgbɔ̂ Əzü, əyïkosəra nə̂ əmə sho gâ tʉ mâ lə anda. Ə̂tə̂ ye ka ətshə tə bandanə â äwä ndə kə pa tshə afɔ gâ lafɔ guta gu ne.» 7 Jezu pâ kə ətshə ə pa: «Mə sə kə na ndə kə grɔ rəka tə̂ ye.» 8 Kapita nə̂ atrugu nə kîrə əpʉ kə ətshə ə pa: «Âgbɔ̂ Əzü, mə lï lï ndə kə pa bə li gâ lə anda nə̂ əmə ne. Bale, pä kʉtə̂ ə̈bə̈ əpʉ bale, rəka nə sə kə katə̂ əyïkosəra nə̂ əmə nə. 9 Mbrə ə̂në əmə də ə̂tə̂ əmə, mə sə gâ tshekudu alabə̈ aâgbɔ̂ azü. Mə sə də atrugu gâ tshekudu əmə ə̂në mə sə kə za ama kə əndje. Kədə mə pa kə ə̈bə̈ nə bale ə pa: "Nä mâ ko-e!", tshə sə kə na na ye. Alɔ ə̂në mə pa kə ə̈bə̈ ata nə ə pa: "Nä mâtəye!", tshə sə kə na nə. Alɔ ə̂në mə pa kə əyïkosəra nə̂ əmə nə ə pa: "Mä ərə səye!", tshə sə kə ma nə.»

10 Mandânə ə̂në Jezu djî əpʉ səkɔ, əpʉ nə tô tə̂ ye. Tshə pâ kə azü ə̂në əndje zâ äwä ye kɔ ə pa: «Djatra əpʉ, mə pa kə e: mə sɔ̂tə̂ marä tə̂ lɔsu rəke sɔ̂ ndə ə̈bə̈ əzü bale lə əgɔ Isərayalə nɔ̂ ne. 11 Mə pa kə e, azü ngbatshe sə kə afɔ djoko tə̂ tshepalɔ də lɔtebanga ə na ə sə gâ tʉ ndə kə zɨ ərə äwä bale də Abraamo də Izakə gâ ndə Jakɔbə lə Əgɔngerə tshelafɔ. 12 Bale, azü ə̂në Əgɔngerə nə sə mbrə əndje kɔ, əndje sə kə wli əndje gashu gâ lə əbutshe. Kôto də̂ əndje sə kə kɨ nə də ngɔla əndje ə sə kə zɨ tshelə əji əndje.»

13 Mandânə, Jezu pâ kə kapita nə̂ atrugu nə ə pa: «Gü na ye! Ndjapä mä kə əbə ə lï də lɔsu zə.» Kʉ pə kôto səkɔ, rəka nə̂ əyïkosəra nə kâtə̂ nə.

14 Mandânə, Jezu nâ mâ lə anda nə̂ Piarə. Tshə wû mbea Piarə nə tə yashe ə̂në tshə shô gâ tʉ â tshelə akwa ye sə̂ kədjï kədjï kɔ. 15 Tshə gôro kəna ye â rəka nə kâtə̂ ye. Mandânə, yashe nə âfɔ â vɔ̂tə̂ kə ko rəgo ndə kə pa tshə zɨ.

16 Də lɔkədɨ nə, əndje kô azü ə̂në əndje sə̂ də aafrɔ ayirə̂ lə əndje ə̂në əndje ngbâ tə bandanə kɔ ə nâ də əndje kə ətshə. Kʉ tə̂ äwä əpʉ ama ye, tshə grɔ̂ aafrɔ ayirə̂ tə̂ azü nə â grɔ̂ ndje arəka tə̂ alayïrəka nɔ̂. 17 Rəkɔ, ndəma əpʉ ə̂në awopandəma Ndjapä Ezayi pâ leme-e kɔ mbrə. Tshə pâ əpʉ ə pa: «Tshə kô arəka ə̂në ə ndɨ alabə̈ aərə tshekotə̂ əzə̂ kɔ ndje də arəka nə̂ əzə̂ nɔ̂ gâ pâ ye.»*8.17 Wu Eza 53.4.

18 Alɔ ə̂në Jezu wû əgerə ə̂kpû azü nə ə̂në əndje sə dji ətshə kɔ, tshə zâ ama kə atrawaya nə̂ ye ndə kə pa alane gbo ə̂ngû djoko ətshî. 19 Ə̈bə̈ awoyisə̂ âgbɔ̂ əpʉ nə̂ Mayïzə nâ gâ ngotə̂ ye ə pâ kə ətshə ə pa: «Âgbɔ̂ Əzü, mə sə kə za äwä zə tə̂ ətshe nɔ̂ ə̂në bə sə kə na tə̂ nə kɔ.» 20 Jezu kîrə əpʉ kə ətshə ə pa: «Agbagraba sə də əgro əndje tə̂ nə, ayanu sə də komɔ əndje tə̂ nə, bale, Əgblə nə̂ Əzü sə sə də ə̈bə̈ ətshe ndə kə za kumu ye gâ tʉ gâ tə̂ nə ndə kə wu tə̂ ye ne.»

21 Ə̈bə̈ əzü lə takpa tə̂ atrawaya pâ kə Jezu ə pa: «Âgbɔ̂ Əyïngerə, kätə̂ äwä kə əmə, mə na ə shi abä əmə angbʉlînə gâ ye kane.» 22 Bale, Jezu kîrə əpʉ kə ətshə ə pa: «Zä äwä əmə ə kätə̂ akuzu, əndje shi angâ əndje də̂ akuzu.»

23 Jezu ô gâ lə əgerə âgbâ â atrawaya nə̂ ye zâ äwä ye. 24 Bə pa bə dji, ə̈bə̈ âgbɔ̂ əyi vɔ̂tə̂ kə yi la ə̂ngû nə â kplaka ə̂ngû nə vɔ̂tə̂ kə tu gâ lə əgerə âgbâ nə. Bale, Jezu lô na ye gâ ye. 25 Atrawaya nə nâ trö də ətshə ə jô ətshə lə əlo nə ə pâ kə ətshə ə pa: «Âgbɔ̂ Əzü, a tshû gâ ye â səye, tshɔ̈ ä!» 26 Tshə pâ kə əndje ə pa: «Awa ma e tshe rə mbrə yekɔ? Azü aya lɔsu!» Bale, tshə âfɔ ə ngâ kə əyi nə də ə̂ngû nə â ətshe nə zɨ̂tɨ ə yî tʉ̂ tʉ̂ tʉ̂. 27 Kumu azü nə nɔ̂ kpê pâ əndu əndje â əndje pâ: «Koshe səye sə tə əde â əyi də ə̂ngû ndje djî əpʉ ama ye kɔ?»

28 Alɔ ə̂në Jezu də atrawaya nə̂ ye gbô ə̂ngû nə ə yî kumu əndje mâ lə əgɔ Gadara kɔ, alabə̈ akoshe bishi ə̂në əndje sə də aafrɔ ayirə̂ lə əndje kɔ, tô mâ pâ aə̂dû ə nâ ə tê ətshə. Akoshe səkɔ sə̂ tə djatra aəmbrʉ azü â ə̈bə̈ əzü trâ ndə kə ro tə̂ äwä ə̂në əndje sə tə nə kɔ trâ bale ne. 29 Əndje tâ râwâ ə pa: «Ɨrɨ Ndjapä, ərə yekɔ nə̂ zə tə̂ ä? Bə nâ mâtəye ndə kə gi əyo tə̂ ä angbʉlînə ndə kə pa alɔ nə lï a?»

30 Kandää tə̂ ətshe nə səkɔ, ə̈bə̈ əgerə ə̂kpû akɔsɔ sə̂ je, teashe ngrʉ̂, ə sə̂ kə zɨ ətshe. 31 Aafrɔ ayirə̂ nə kɨ̂ ə̂sə̂ əyo tə̂ əndje kə Jezu nə ə pa: «Kədə bə yində kə grɔ ä, wlä ä, ä li gâ lə ə̂kpû akɔsɔ səye.» 32 Jezu pâ kə əndje ə pa: «E nä je!» Aafrɔ ayirə̂ nə wûtu lə akoshe nə ə lî gâ lə akɔsɔ nə. Kpûtû akɔsɔ nə nɔ̂ âfɔ də ärɔ̈ tə̂ matshi kaga nə ə yɔ̂ gâ lə ə̂ngû nə ə tshu nɔ̂.

33 Aawobata akɔsɔ nə kpê ə gû na ye gâ lə gala ə pâ ndə əpʉ ərə nɔ̂ ə̂në ə wûtu kɔ, də əpʉ ərə ə̂në ə wûtu ndje gâ tə̂ akoshe nə ə̂në əndje sə̂ də aafrɔ ayirə̂ lə əndje kɔ. 34 Bale, azü tshelə gala nə nɔ̂ nâ ndə kə te Jezu. Alɔ ə̂në əndje wû ətshə kɔ, əndje kɨ̂ ə̂sə̂ əyo tə̂ əndje kə ətshə ndə kə pa tshə ro lə ashɔ əgɔ nə̂ alane nə.