1 Əmə, Palɔ, əyïkosəra nə̂ Jezu Kristə, mə tâ fraka səye kə e. Ndjapä ê əmə tə əzü-awla ə kê əmə ndə kə pa mə mʉ Ə̂rɔ̂ Əpʉ nə̂ ye.

2 Ə̂rɔ̂ Əpʉ səkɔ, Ndjapä zâ ama də əpʉ nə kerə lə ama aawopandəma ye lə Fraka nə̂ Ndjapä gâ ye. 3 Ə̂rɔ̂ Əpʉ səkɔ sə gâ pâ əpʉ Ɨrɨ Ndjapä, ə̂në lə əzü tə̂ ye, tshə sə tə ätä Davidə kɔ, 4 â tə̂ äwä Âgbɔ̂ Yîrə̂, Ndjapä zâ ətshə tɔ gâ lafɔ tə Ɨrɨ nə tə̂ äwä awlra nə̂ ye, alɔ ə̂në tshə shê ətshə lə takpa tə̂ akuzu gâ ye kɔ. Ətshə də̂ Jezu Kristə, Âgbɔ̂ Əyïngerə nə̂ əzə̂. 5 Tə̂ äwä ye, mə sɔ̂tə̂ ə̂rɔ̂tə̂ Ndjapä â sə tə əzü-awla nə, ndə kə pa mə gu də azü lə amarä nɔ̂ əndje za lɔsu əndje kə ətshə ə dji əpʉ ama ye ə mbe əɨrɨ Kristə nə. 6 E-e ndje, e sə lə takpa tə̂ azü səkɔ, e-e ə̂në Jezu Kristə nə ê e gâ ye kɔ.

7 Mə ta fraka səye kə e nɔ̂ ə̂në e sə mâ Rɔmə kɔ, ə̂në Ndjapä yində e â ê e mbrə ətshə kɔ. Abä əzə̂ də Ndjapä gâ ndə Âgbɔ̂ Əyïngerə də Jezu Kristə nə mä ə̂rɔ̂tə̂ əndje kə e ə zä blatshe kə e!

8 Mə sə kə za mərshe angbʉlînə kə Ndjapä nə̂ əmə, tə̂ äwä Jezu Kristə, mbrə e nɔ̂, mbrə ə̂në azü sə kə pa ndə əpʉ lɔsu e pâ ashɔ nɔ̂. 9 Ndjapä, ə̂në mə mbrə kosəra kə ətshə də lɔsu əmə nɔ̂ tə̂ äwä kə mʉ Ə̂rɔ̂ Əpʉ gâ pâ əpʉ Ɨrɨ nə kɔ, wusə̂ nə ə pa djatra əpʉ də̂ mə pa kɔ. Mə sə kə pa ndə e alɔnɔ̂ lə aəpʉ kə yu Ndjapä nə̂ əmə, 10 mə sə kə yu Ndjapä alɔnɔ̂ ndə kə pa, kədə tshelə ye yində nə, mə sɔtə̂ ə̈bə̈ ə̂rɔ̂ äwä ə na ə wu e. 11 Mbrə ə̂në əgo kə wu e mi əmə wââ ndə kə pa mə na ə yisə̂ ə̈bə̈ ə̂rɔ̂ ərə tshemandâ âkrâ nə̂ Âgbɔ̂ Yîrə̂ kə e kanika e gbɔgbɔ tə̂ e tə̂ äwä nə. 12 Gâ pâ nə ndje, mə sə də əgo ndə kə pa mə sə lə takpa tə̂ e kanika əzə̂ nɔ̂ a gbɔgbɔ angâ əzə̂, lɔsu e gbɔgbɔ əmə ka lɔsu əmə ndje gbɔgbɔ e.

13 Alaye, mə yində nə ə pa e wusə̂ nə ə pa äwä ngbatshe mə yində kə na mâ ndə e je, bale äwä nə kânga tə̂ əmə gâ ye ʉrrr ndjɔ kpəsəye. Mə yi kəmə ndə kə pa mə sɔtə̂ aə̂rɔ̂ aərə mandâ kosəra nə̂ əmə lə takpa tə̂ e ndje, mata ə̂në ə sə lə takpa tə̂ ə̂dû amarä pâ ashɔ kɔ. 14 Mə lï ndə kə pa mə mbrə kosəra mbrə azü nɔ̂, azü tshelə gala də azü tshelə kpɔkɔ, aawowusə̂ ərə də azü ə̂në əndje wusə̂ ərə wu ne kɔ. 15 Rəkɔ mə sə də əgo ngbatshe ndə kə pa mə mʉ Ə̂rɔ̂ Əpʉ kə e, e-e ndje ə̂në e sə lə gala Rɔmə kɔ.

16 Mbrə ə̂në gana mbrə əmə mbrə ndə kə pa mə mʉ Ə̂rɔ̂ Əpʉ nə ne. Ə sə tə awlra nə̂ Ndjapä ndə kə pa tshə she azü nɔ̂ ə̂në əndje za lɔsu əndje kə ətshə kɔ lə kuzu tə̂ äwä nə: Ajuwufu angbʉlînə, ndje də azü ə̂në əndje sə sə tə Ajuwufu nə ne kɔ. 17 Mbrə ə̂në Ə̂rɔ̂ Əpʉ səkɔ yisə̂ nə ə pa Ndjapä sə kə wu azü tə aə̂rɔ̂ azü lə ala ye kʉ tshî tə̂ äwä ə̂në əndje za lɔsu əndje kə ətshə kɔ, mata ə̂në Fraka nə̂ Ndjapä pâ: «Ə̂rɔ̂ əzü sə kə sə də sorô tə̂ äwä lɔsu.»*

18 Mâ ngâ lafɔ-e, Ndjapä yisə̂ əkɔ nə̂ ye gashu gâ tə̂ azü mbrə nyaka də əmbrʉ ərə ə̂në əndje sə kə mbrə nə kɔ â tə̂ äwä aəmbrʉ aərə ə̂në əndje sə kə mbrə nə kɔ, əndje gbɔ̂ tə̂ äwä tə̂ djatra əpʉ gâ ye. 19 Bale, ərə ə̂në əzü lï ndə kə pa tshə wusə̂ nə tə̂ Ndjapä kɔ sə kpə tə âgbɔ̂ ətshe ətshi əndje, mbrə ə̂në Ndjapä nə yîsə̂ nə gashu kə əndje gâ ye. 20 Mbrə ə̂në, awlra nə̂ Ndjapä ə̂në ə sə piii kɔ də kə sə ətshə ə̂në azü lï lï ndə kə wu nə ne kɔ, kerə ə̂në Ndjapä mbrə̂ tsheshu kɔ, azü sə kə wu nə tə ə̂rɔ̂nə alɔ ə̂në əndje sə kə wu aərə ə̂në tshə mbrə̂ gâ ye kɔ. Rəkɔ, azü sə sə də ə̈bə̈ əpʉ ndə kə pa nə ne. 21 Mbrə ə̂në əndje wûsə̂ Ndjapä nə gâ ye, bale əndje mbê ətshə mbê tə Ndjapä nə ne ə zâ mərshe zâ kə ətshə ne. Bale, kə tegbɔ kumu əndje sə̂ tə əmbrʉ nə gâ ye â kə wusə̂ ərə nə̂ əndje nə̂ aəndɨ nə lî əbutshe gâ ye. 22 Əndje pâ alane sə tə aawowusə̂ âdâ ərə, bale əndje dô tə̂ əndje tə aəndɨ gâ ye. 23 Ndə kə pa əndje vrɔ Ndjapä ə̂yî ə̂në tshə tshu tshu tə̂ ərə ne kɔ, əndje vrɔ̂ aərə ə̂në ə ko əzü, ə̂në tshə sə kə tshu ə tshu kɔ, də ayanu də aagia ə̂në əndje na ana də aə̈nü əndje vəna kɔ də aagia ə̂në əndje orɔ də tshela ə̈vü əndje kɔ.

24 Âdârə ə̂në Ndjapä nə tshî əndje tʉ tə̂ äwä aəmbrʉ aərə, ə lï də aəgo ərə tə̂ lɔsu əndje kɔ, â əndje sə kə mbrə aərə gana gâ tə̂ akwa əndje lə takpa tə̂ əndje. 25 Əndje zâ əpʉ əterə gâ mandâ djatra əpʉ nə̂ Ndjapä; ndə kə pa əndje vrɔ Ndjapä ə̂në tshə mbrə̂ aərə nɔ̂ kɔ, əndje sə kə vrɔ də̂ aərə ə̂në Ndjapä nə mbrə̂ gâ ye kɔ, kandää, ətshə Ndjapä nə də̂ azü nɔ̂ lï ndə kə pa əndje mbe ətshə alɔnɔ̂ piii! Asərəmə!

26 Âdârə ə̂në Ndjapä nə tshî əndje tʉ tə̂ äwä aəgo lɔsu əndje ə̂në ə sə tə ərə gana kɔ. Alawɔ əndje kâtə̂ kə sho də akoshe gâ ye â sə kə sho də angâ əndje də̂ ayashe, â ərə rə sə kpî tə̂ ərə ə̂në ə sə də äwänə kɔ. 27 Äwä bale ndje, akoshe kâtə̂ äwä kə sho də ayashe gâ ye â sə kʉ də əgo akoshe angâ əndje lə takpa tə̂ əndje; əndje sho də akoshe angâ əndje lə takpa tə̂ əndje â ə sə tə ərə gana â rəkɔ, əndje sə kə sɔtə̂ ərə ə̂në ə lï də əmbrʉ kə mbrə tə̂ əndje də ə̂tə̂ əndje kɔ.

28 Ə̂në əndje wə̂ra tə̂ əndje ndə kə pa əndje yerɔ Ndjapä nə kɔ, Ndjapä nə kâtə̂ əndje tʉ tə̂ äwä kə wusə̂ ərə nə̂ əndje ə̂në ə sə sə ndji ne kɔ â əndje sə kə mbrə aərə ə̂në əzü lï lï ndə kə mbrə nə ne kɔ. 29 Kə mbrə adɔ̂ngɔ̂ aərə mbrə də äwänə ne, də əmbrʉ ərə, də əgo aərə, də əmbrʉ lɔsu rô pâ əndje gâ ye; kə za tshelə əndje gâ tə̂ azü, də kə wo azü, də ama, də kə frɔ ətshe, də əgo kə ma əmbrʉ ərə kə azü, də kə pa aəmbrʉ aəpʉ də əɨrɨ azü rô pâ əndje gâ ye; 30 əndje sə kə pa tə̂ angâ əndje lə takpa tə̂ əndje; əndje sə tə alayïəpʉ nə̂ Ndjapä, tə alayïə̂gû, tə alayïwuma, tə alayïgbama. Əndje sə kə pra aäwä nɔ̂ ndə kə pa əndje mbrə əmbrʉ ərə, əndje dji əpʉ ama alabä əndje də alayï əndje dji ne. 31 Əndje wusə̂ ərə wu ne, əndje pa əpʉ pa ə mbrə ndəma nə ne, əndje ga ndə azü ga ne, əndje wu əyo azü wu ne. 32 Bale, əndje wûsə̂ əpʉ kə wa ngbanga nə̂ Ndjapä tə ə̂rɔ̂nə gâ ye, ə̂në ə pa azü ə̂në əndje sə kə mbrə marä tə̂ aərə rə kɔ lï də kuzu. Ə də̂ kʉtə̂ aərə səkɔ də̂ əndje sə kə mbrə nə ne, bale əndje yində nə ndje kə azü ə̂në əndje sə kə mbrə aərə səkɔ.