Malako 5

Bona o buunto ooki Yailo la buunto oobutaki ehenda eeki Yesu

21 Yesu aunwɛ yopendya lenkina nse e mboka e ndjale nde waato, mpe banto buuke bayaki yoyahokia ntute la nde, ayalaki nde ibongo. 22 Bonkondi bɔmɔɔ boki botumba bo lɔbɔndɔ bo lina Yailo ayɛ. Anɛ e ɛnɛ nde Yesu, ayalikɛ nde bekolo bekinde 23 mpe abɔbɔndɛlɛ la weembeli nde ante: «Bona okimi o buunto o eboha awa la nkandi, yaka mpe oboapye bɛbɔ kela abate lobiko mpe nkandi ehile!» 24 Batɛ nde la Yesu ndjela ɛmɔɔ. Banto buuke batɛ itoboyelaka mpe itoboukaka mpika la lombuha.

25 Nde banto baiko, eyalaki la buunto ɔmɔɔ ɔkɔnɛ nkandi yotanga bakila, akelɛ la ɛkɔ mbula lyomu la ipe. 26 Anyɔkwɛ eka benganga buuke, aheyɛ lokutu lokinde lonkuma mpe tabika; yaa nkandi engalaki nko ngaangala. 27 Anɛ eokɛ nde nsango eeki Yesu, ayɛ la lombuha lo banto, mpe abutɛ ehenda eeki Yesu. 28 Itina ayahangelaki: «Kaki ngɔbɛngɛ nkya bihenda biikinde, nkoobika.» 29 La mbala ɛmɔɔ, bakila baatangaki batenɛ, mpe aokɛ nde byonge biikinde angobikɛ la nkandi eyalaki laa nde. 30 Nko aiko, Yesu aokaki nguya ɛmɔɔ engoboolɛ nde byonge, akalimwɛ mpe alendɛ boloy, ahangɛ: «Omboombute nde bihenda nɔ?» 31 Bakɛndi la nde babobelɛ: «Wɛnɛ banto buuke baokuke mpika ndjoko inkuma mpe oyuubola lenkina: "Ombombute nɔ?"» 32 Yaa Yesu alendɛ ntute la nde kela aɛnɛ ɔnɛ omboobobute. 33 Buunto ɔkɔ atutumaki la bɔɔmɔ itina aebaki inɛ ingobolekelɛ; ayɛ yɔkɔ bakulubɔngɔ nde bekolo beeki Yesu mpe abohangelɛ nhɔhɔlɔ enkuma . 34 Yesu nde ɔnɛ obobelɛ: «Bona okimi o buunto, waambi bookiɛ bongokobikyɛ, kɛndɛ bɔlɔti mpe bika la nkandi ekiɛ.»

35 Nko aiko etepela Yesu, banto bankina baumɛ nde botumba booki bonkondi bo botumba bo lɔbɔndɔ, bayɛ yobobela: «Bona okiɛ o buunto angowɛ. Itina iitungya wɛ lenkina bolaki nɔ?» 36 Ankya bookaki Yesu ngauko, abelaki Yailo: «Tookake bɔɔmɔ, yala nko la waambi.» 37 Yesu taunwa yolanga bonto aboyele, akɔhɛ nko Petelo, Yakɛ la Yowane bohibotonga oki Yakɛ. 38 Bakitɛ nde botumba booki bonkondi bo botumba bo lɔbɔndɔ, Yesu aɛnɛ banto bata baunwa, balela mpe bayahaba la yoboba la nguya. 39 Aɔtwɛ mpe ababelɛ:«Lolyaleka mpe lolela ngauko itina nɔ? bona tawei, alali.» 40 Mpe banto babɔɔlɛ. Aolyɛ banto bankuma, akɔhɛ nko ihe la nyango eki bona la banɛ bayaki la nde, baɔtwɛ mpiko eyalaki bona. 41 Yesu abutɛ bona nde lɔbɔ mpe abobelɛ: «Talita kumi» – Elimbola wambɔ: «Eboha e buunto, nkobela, emala!».

42 Nko aiko, bona eboha e buunto aemalɛ mpe abangɛ yɔkɛndɛ – ayalaki la mbula lyomu la ipe. Mbala ɛmɔɔ, banto bankuma bautɛ byɔli. 43 Yesu abakokomyɛ tabahangelake la bonto ɔmɔɔ, nkamba aobabela: «Lobopa yomba ale.»