O pučibe e Jakoveskoro hem e Jovaneskoro
35 Togaš ale uza ko Isus o Jakov hem o Jovan, e Zavedejeskere čhave, hem vakerge leske: "Učitele, mangaja te kere amenge sa so ka roda tutar."
36 Ov pučlja len: "So mangena te kerav tumenge?"
37 Ola odgovoringe: "Mukh amen, koga ka ove ki ti slava, te beša jekh tari ti desno strana, a jekh tari ti levo strana."
38 O Isus phengja lenge: "Na džanena so rodena. Šaj li te pijen tari čaša kotar me so pijava, ili te oven krstime, krstibaja soleja me sijum krstimo?" 39 A ola odgovoringe leske: "Šaj."
Togaš o Isus phengja lenge "Oja, ka pijen tari čaša koja me pijava hem ka oven krstime, krstibaja soleja me sijum krstimo, 40 ama nane mlo te vakerav koj ka bešel tari mi desno hem tari mi levo strana. Adala thana ka del pe okolenge kaske soj spremime."
41 Koga šunge adava o javera deš učenikija, holange e Jakoveske hem e Jovaneske.
42 A o Isus vikingja sarinen hem phengja lenge: "Džanena deka okola so računinena pe sar vladitejla e narodongere, vladinena upro lende silaja, hem lengere da bare manuša vladinena upro lende. 43 Ama akava ma te ovel maškar tumende, a koj mangela te ovel baro maškar tumende, neka ovel tumenge sluga, 44 hem koj mangela te ovel prvo maškar tumende, neka ovel robo sarinenge. 45 Soske o Čhavo Manušeskoro na alo te služinen leske, nego ov te služinel hem te del po životo sar otkup butenge."