Marko 5

O Isus vazdela e čhaja taro meribe hem sasljarela e nasvale romna

21 O Isus palem nakhla e čamcoja tari okoja strana taro ezero hem uza leste khedisalili bari gužva, a ov sine uzo ezero. 22 Togaš alo ko Isus o Jair, jekh taro vodačija e sinagogakere hem pelo ko kočaka anglo leskere pre. 23 I silno molingja le: "Mi čhaj i meribaja jekh! Ava čhiv te vasta upro late te sasljol hem te živinel!"

24 I o Isus gelo leja. A but manuša džana sine pala leste hem gurinena pe sine upro leste.

25 Maškar lende sine jekh nasvali romni, so dešuduj berš thavdela sine latar rat. 26 But cidingja ko doktojra, sa pe pare trošingja mislindor deka ka ovel lake pošukar, a pološno uli. 27 Koga šungja e Isuseske, nakhla maškar o manuša hem palaldan pipingja leskere šeja. 28 Adaleske so akaja romni phengja ki peste: "Samo te pipinav man ko leskere šeja, me ka sasljovav." 29 I odma o rat čhinagja te thavdel latar, a oj osetingja pe deka saslili.

30 O Isus odma osetingja deka iklili lestar bari sila, i irangja pe ko manuša hem pučlja: "Koj pipingja me šeja?"

31 A o učenikija leskere vakerge leske: "Dikheja li kozom manuša gurinena pe upro tute, a tu pučeja: ‘Koj pipingja man?’"

32 Ama o Isus rodela sine te dikhel koj kergja adava. 33 Togaš adaja romni tresinela sine tari dar, soske džangja so ulo laja. Ali, peli ko kočaka hem vakergja leske sa.

34 O Isus vakergja lake: "Mi čhaj, ti vera sasljargja tut! Dža tuke mireja hem ov sasljardi taro to nasvalipa!"

35 Dži kote kerela sine lafi o Isus, ale nesave manuša taro kher e Jaireskoro so sine vodači e sinagogakoro hem vakerge leske: "Ti čhaj muli. Soske dosadineja više e učitele?"

36 Koga šungja adava o Isus, vakergja e Jaireske: "Ma dara! Samo verujn!"

37 I o Isus nikas na mukhla te džan pala leste, samo e Petareske, hem e duje phralenge o Jakov hem o Jovan.

38 Koga ale dži ko kher e Jairesko, o Isus dikhla bute manušen, sar rovena hem vikinena sa pe glasoja. 39 Khugja andre hem vakergja: "Soske rovena hem vikinena? I čhaj na muli, oj sovela!" 40 A ola asandile leske.

I o Isus zapovedingja sarinenge te iklon avrik, samo te ačhoven andre o dad hem i daj e čhajakiri hem leskere trin učenikija so ale pala leste. Hem khugja adathe kote so sine i čhaj pašli.

41 Ov astargja o vas e čhajakoro hem vakergja lake: "Talita, kumi!" (So značinela: "Čhaje, tuke vakerava, ušti!").

42 I čhaj odma uštili hem počmingja te phirel, hem sarine čudisalile. A la sine la dešuduj berš. 43 Togaš o Isus zapovedingja lenge te na vakeren nikaske hem phengja lenge te den la te hal.