Marcos 7

I vera jekhe romnakiri so nane Evrejka

24 Palo adava o Isus gelo tari Galileja ko thana taro Tir. Khugja ko jekh kher hem na mangla nikoj te džanel deka tano adathe, ama našti sine te garavel pe. 25 Soske šungja leske jekh romni, so lakiri čhaj sine la lošno duho, oj ali hem peli ko kočaka anglo leskere pre. 26 Adaja romni sine Grkinka, bijami ki Sirisko Fenikija. I molingja e Isuse te ikalel e demone tari lakiri čhaj.

27 O Isus phengja lake: "Mukh prvo te han o čhave hem te čajloven, adaleske so nane šukar te le pe lendar o maro hem te frdel pe e džukelenge."

28 A oj odgovoringja leske: "Oja, Gospode! Ama o džukela da hana o troške telo astali so perena taro čhave."

29 Togaš o Isus phengja lake: "Bašo akava lafi so vakergjan mange, šaj te dža khere. O demoni iklilo te čhajatar."

30 Koga oj irangja pe khere, arakhla pe čhaja sar pašlola sine ki postela, a o demoni više iklilo latar.