O Isus ikalela e čhavestar o lošno duho
14 Koga o Isus irangja pe e trine učenikoncar ko okola učenikija, dikhle bute manušen uza lende hem nesave učitejla e Zakoneskere sar akošena pe lencar. 15 Sarine samo so dikhle e Isuse, iznenadinge pe hem prastandile te pozdravinen pe leja.
16 I o Isus pučlja len: "Soske akošena tumen lencar?"
17 Jekh taro manuša odgovoringja leske: "Učitele, angjum ki tute me čhave, so ki leste isi lošno duho so na mukhela le te kerel lafi. 18 Hem stalno, koga i te astarel le, peravela le ki phuv hem o čhavo ikalela pena taro muj, steginela pe danda hem kočingjola. I rodingjem te učenikondar te ikalen le, ama ola našti sine te keren adava."
19 O Isus odgovoringja: "O, bez verno generacijo, dži koga ka ovav tumencar? Dži koga ka trpinav tumen? Anen e čhave ki mande!"
20 Hem ange le ki leste, i samo so dikhla o duho e Isuse, odma počmingja te frdel e čhave ko sa o strane. Ov pelo tele ki phuv hem počmingja te prakinel hem te ikalel pena taro muj.
21 O Isus pučlja leskere dade: "Kozom vreme ov tano asavko?"
O dad odgovoringja: "Taro tiknipe. 22 But puti frdela le sine ki jag hem ko pani, te šaj te mudarel le. Ama ako šaj te kere nešto, žalin amen hem pomožin amen!"
23 O Isus phengja leske: "Ako šaj? Sa šaj okoleske koj so verujnela!"
24 Odma e čhaveskoro dad vikingja: "Verujnava! Pomožin man te verujnav poviše."
25 Koga o Isus dikhla deka but manuša prastana ki lende te dikhen so ka ovel, zapovedingja e lošno duhoske: "Duho laloreja hem kašukeja, zapovedinava tuke, iklov lestar hem nikat ma iran tut ki leste!"
26 O lošno duho vikingja, hem silno tresingja e čhave hem iklilo lestar. A o čhavo sine pružimo ki phuv sar mulo, a but džene phenge deka mulo. 27 Ama o Isus astargja le taro vas, vazdingja le hem o čhavo uštilo ko pre.
28 Koga o Isus khugja ko jekh kher, o učenikija leskere koga sine leja korkori, pučle le: "Soske amen našti sine te ikala le?"
29 Ov phengja lenge: "Asavko duho ništoja našti te ikalel pe, samo molitvaja9:29 molitvaja Nesave rakopisija dodajnena: hem posteja. ."