O Isus sikavela pi slava pe trine učenikonge
2 A palo šov dive, o Isus lela peja e Petare e Jakove hem e Jovane hem gele ki uči gora, kote so ola sine korkori. Adathe angli lende e Isuseskoro izgled promenisalilo. 3 Leskere šeja ule doborom parne, so našti sine nijekh manuš ki akaja phuv agjar te parnarel len! 4 Hem adathe pojavisalile angli lende o Ilija hem o Mojsej, so kerena sine lafi e Isuseja.
5 Togaš o Petar phengja e Isuseske: "Učitele, šukar amenge so sijem akate. Ajde te kera trin šatojra – jekh tuke, jekh e Mojsijaske, hem jekh e Ilijaske."
6 (O Petar tari dar na džangja so te phenel, soske ola but darandile.)
7 Togaš alo jekh oblako hem učhargja len, i šundilo glaso taro oblako: "Akava tano mo manglo Čhavo. Le šunen!"
8 I taro jekh puti, koga dikhle uza peste na dikhle više nikas, osven e Isuse.
9 Koga hulena sine tari gora, o Isus zapovedingja lenge nikaske te na vakeren so dikhle, sa dži kote o Čhavo Manušeskoro na uštela taro mule. 10 Ola nikaske na vakerge adava, ama pučle pe maškar peste, so značinela akava: "Te uštel taro mule."
11 A o učenikija pučle le: "Soske o učitejla e Zakoneskere vakerena deka prvo trebela te avel o Ilija?"
12 O Isus odgovoringja lenge: "Čače o Ilija ka avel prvo hem ka sredinel sa. Togaš soske i pišimo deka o Čhavo Manušeskoro mora but te cidel hem te ovel otfrlimo? 13 Ama vakerava tumenge: Sar soj pišimo lestar, o Ilija više alo hem kerge leske sar ola so mangle."