Mateus 18

Lukongo lwa ntumisi ywangasamya

21 Bu’kapo Petili ngannyendelya Yesu na kunnaluya, "Buli, nnongo wangu' mana anikosile ninsami pali’nga? Mala saba yendali’ngana?" 22 Yesu ngaanyangwa, "Nibayali mala saba bai, ila, ata saba mala sabini. 23 Kwa nyo, Ukulungwa wa Kunani ulandana na nkulungwa yumo ywaapalike kabwa isabu ya maleni ga atumisi bake. 24 Paatumbwi kabwa bai, ngaletelwa mundu yumo ywaabile na leni liku’lu' muno lyosindwa mundu kulili’pa. 25 Mundu ywo abileli na sosoti so li’pa, kwa nyo bwana wake aamulise api’mi’yi’lwe ywembe, nnyumbowe, bana bake na ili’be yoti yaabile nayo, li’nga lili’pi’lwe leni lyo. 26 Bai ntumisi ywo ngakilikita nnu’ngi' yake kabaya, ‘Nilu’ba unikomeye nanenga nalu’a kuli’pa lileni lyoti.’ 27 Yu’lu' bwana ngaammi’kya kiya, kunsamya li’lu' leni na kunneka ayende kasake.

28 "Lakini ntumisi ywo ngabu’ka na kunkolya yumo ywa atumisi aine ywaannongage lileni lisene. Ngammoywa na kuntangya paingo kabaya, ‘Uli’pe leni lyako!’ 29 Aywo ntumisi nyine ngakilikita na kunnu’ba kabaya, ‘Nikulu’ba unikomeye nanenga nalu’a kuli’pa.’ 30 Lakini ywembe ayi’ki’tili, ila aammi’kite munyumba ya atabilwe mpaka palu' paali’pa li’lu' leni.

31 "Bai, atumisi aine pabalibweni likowe lyo, baatiku’ku’li’ka muno, ngabayenda kummakia bwana wabe bu’kana na makowe go gagapitike. 32 Apo, yu’lu' bwana aatikunkema aywo ntumisi, ngammakia, ‘Wenga wantumisi nnau muno! Waatinilu’ba, nanenga nganikusamya leni lyako lyoti. 33 Buli yali’nganili na wenga kummi’kya kiya ntumisi nnyino kati mwanikubi’ki kiya nenga?’

34 "Bai, bwana ywo aatiusika muno, ngampeleka kwa asikali aywo ntumisi apwatilwe mpaka paali’pa leni lyoti. 35 Na Tati' bangu' ba kunani baampangyanga nyinyonyo, manaitei yumo nkati yinu, ansamyali nnongowe kwa mwoyo wake woti."