Rute 3

Naomi usi nttọhna s’ọbada kw’Rut

1 Iwu jạnẹ, Naomi kw’ode ọkka-ọmaan-udim kw’Rut, obeni Rut bẹ́, "Nnwa kwaam, ọbaan bẹ́ nnor udim nnạng-ọ kw’m’okker-ọ. 2 Boaz nwọ kw’n’asi ọtọhm ọttạra atọhmnạng pẹ p’ipanạng, ode uchinạng kwamạna. Songa bẹ́ ma irungu, m’ọkhaan abarli-mạma k’ibyi sabẹ n’aninga aguma abarli-mạma. 3 Sọhng ata akpobha asi, afọhnọ ana p’arebhi iruk, age ẹnya ch’ede ọkkachẹ, brasẹ n’afon k’ibyi sabẹ n’aninga aguma abarli-mạma. Kàsi osonga bẹ́, aning mạma, ttạrr uchi ọttọhk phyibh, ogwo atwuk. 4 M’age utum k’ibyi s’m’uyima. De kk’uyima, sọhng ata awong-ẹ ivạra, ayim-ẹ ma mfhokpatwạkhọ. M’otekh-ọ oche kw’masi."

5 Rut ọpọhn-ẹ bẹ́, "Amma m’nsi oche kwidede kw’abeni bẹ́, nsi." 6 Mạnna wọ Rut ubin ofona k’ibyi sabẹ n’aninga aguma abarli-mạma, ọta usi oche kw’ọkka-ọmaan-udim oben-ẹ bẹ́, usi. 7 Okpe kw’Boaz kk’ọttọhk uchia phyibh, ọbạra ogwo atwuk, ettem erebh-ẹ, ọta uyima k’ukwung kw’abarli-mạma, ọttaabha. Rut ọbẹkh-ọbẹk ọta owonga ivạra s’ibubh mfhokpatwạkhọ sẹ, uyima. 8 Ma urunguttem, ọttọhk ugbikh-ẹ, ukwu ọbhạkh-ẹ, n’osose n’ose ikwanạng kw’uyim-ẹ k’mfhokpatwạkhọ.

9 Ọbạbh bẹ́, "Ọma anẹ wọ o?"

Rut ubhina bẹ́, "Amma Rut, ọtọhmnạng kwọ e. Wonga ẹvạramma s’ivạra sọ bubh-m, masẹ ode bẹ́, ọma wọ ade ọkkaan-ichimma."

10 Boaz ọbẹ́, "Nnwa kwaam, tte Ọvaar Ubinọkpaabyi udiọ-ọ. Ijibha nja ẹyọhng ch’acheden asi. Ọma adikkobh p’avaar-ọvaar ọttạra p’atto okpor, nákhubha. 11 Ma o, nnwa kwaam, tte nạng-ọ ojor. Fidede f’abạbh-m, m’nsi-usi nnạng-ọ, ukwuru bẹ́, ayok-ofhon paam phyibh asong ma bẹ́, ọma ade ikwanạng kw’ujibhi ẹmmaana. 12 K’udik ọkka, amma nde uchinạng e, okhenka, ọkkaan-ichimma ọdwạkh-ọdwạk uning ka kw’ofor ọtạm ọyọhnga amma. 13 Yima maa, ma irungu. Ode iwu kk’echobha, de ocher bẹ́, obhekh-ọ, ọbaan ma. De nạn ifor núdia s’m’obhekh-ọ, k’oche kw’Ọvaar Ubinọkpaabyi urukhu akpen, amma m’mmekh-ọ obhek. Yima maa ttạrr iwu echobha."

14 Ma wọ Rut uyim k’mfhok-mfhok s’Boaz ttạrr iwu echobha, okhenka, ọpạm-ọpạm ubina k’ekpebha-rungu brasẹ ọnạng utin oyok. Boaz oben-ẹ bẹ́, "Tte ọnạng wạnọ-wạnọ nạngẹ osong bẹ́, ikwanạng ukwu uyima k’ibyi sabẹ n’ayuk abarli-mạma o."

15 Ọbạra oben-ẹ bẹ́, "Tima ivạra nnọ s’abubh ma kwu, maama sẹ." Masẹ kk’usia oche ngwọ, Boaz okpokhu abarli-mạma p’afu ọkhạrạbang ẹsajạnẹ, owon-ẹ ma ivạra, udira uyiẹ-ẹ, brasẹ ẹma oyeni n’ọkpa nnạm ọbhạna k’ofon.

16 Masẹ Rut ukpir k’ọchọhm, ọkka-ọmaan-udim ọbạbh-ẹ bẹ́, "Nnwa kwaam, aseng yạn?"

Ma wọ, Rut ọkpaakhẹ udik kw’idede kw’Boaz usi ọnang-ẹ. 17 Ọbạra ọkpaakh-ẹ bẹ́, "Ọgba ọnang-m ọkhạrạbang ọsajạnẹ p’abarli-mạma, oben-m bẹ́ nạng mbọhk-mbọhk mfon nkebha ọkka-maan-udim kwaam."

18 Ma wọ, Naomi oben-ẹ bẹ́, "Nnwa kwaam, ninga tik, ttạrr asonga oche kw’idik m’ide, ukwuru bẹ́, ujunung nwọ ọyọhng mókwokha ttạrr udik ngwa ọkhaam echo chemma."