1 Pamakachu pala Chapanga kakilongela patangalo na aghohi bhetu mu njila nhanganganiko kukindila kwa ambuye, 2 peni mu manjubha agha gha uhiko, Chapanga kangulongela na twenga kukindila Mwana ghwake. Chapanga kwa njila ya ywombe kakighubhumba unnima na kakinpegha hilibhi hyoha kahitabhale. 3 Ywombe ndo ung'anyimo ghwa ukulu ghwa Chapanga na kangubhoneha bhula Chapanga pakabheghite. Kanguyambuha hilibhi yoha himamalitane papamu handa payibheghite kwa lilagho lyake liibheghite na makakala. Mbole ya kubhayoha bhandu na kubhabhuhila ulemwa, kakighenda katama kunani mu mbande ya nnilo ya ukulu ghwa Chapanga.

4 Mwana ghwa Chapanga kakitendekwa nkulu kupitingana Andumitumi bha kunani kwa Chapanga, na lihina lyake lyakapeghitwe na Chapanga ndo likulu muno kupitingana gha abho andumitumi. 5 Kiyaha Chapanga kakinng'ombela ng'obhe nga nndumitumi ghwake ywohele ghwa kunani kukita,

"Ghwenga ndo Mwana ghwangu,

nenga lelo megha Tate ghwako!"

Kangi kakinng'ombela ng'obhe nga nndumitumi ghwake yumu ghwa kunani kukita,

"Nenga ndabhegha Tate ghwake,

na ywombe katabhegha Mwana ghwangu."

6 Peni Chapanga pakabheghite kangunlaghila mwana ghwake ghwa ulongohi mu nnima ndo kakilongela,

"Andumitumi bhoha bha kunani yinguakwiliha kuntundamila."

7 Peni kya kualinga andumitumi bhake bha kunani kakilongela,

"Chapanga nungubhaghalambula andumitumi bhangu bha kunani abheghe likusi,

Na andumila bhake nungubhaghalambula abheghe mibhale ya mwoto."

8 Peni kwa kya Mwana ghwake, Chapanga kakilongela,

"Ghubhutwa ghwako ghwenga Chapanga ghwabhegha ghwa manjubha ghoha,

ghwenga ghwabhatabhala bhandu bhako muyinoghelwa.

9 Ghungupala kutenda ghanakunoghela na ghungulema uhakata.

Ya kya agho Chapanga, Chapanga ghwako kakuhaghula ghwenga na kughupopohela mahuta gha maha ngati ghubheghe nkulu

na kakupegha ghwenga uhokamo na uyelelo

kupitingana ayako bhoha."

10 Kangi kakilongela,

"Ghwenga Bambo, pamakachu ghukighubhumba nnima,

na kwa mabhoko ghako ghukitendekeha kunani.

11 Ahyo hyoha hyahobha, peni ghwenga ghwahighala manjubha ghoha,

Hyoha hyahakala handa mapinda.

12 Ghwahibhilinga handa likama,

na hyaghalambulwa handa maghwanda.

Peni ghwenga ghwahighala handa paghubhele,

na ubhumi ghwako ghwaapela ng'obhe."

13 Bhuli Chapanga kakilongela kwa nndumitumi ghwake ywoki ghwa kunani kukita,

"Ghutame apa mu mbande yangu ya nnilo

mbaka panubhabhika amyanja bhako

pahi yako handa kiteho kya kulibhatila maghulu."

14 Andumitumi bha kunani kwa Chapanga ndo aghani? ndo mihuki yiintendela lihengo Chapanga na bhalaghilwa na ywombe kuatangatila bhoha bhaapala kukingama ulopohi.