1 Hino, kiyaha malaghilo ndo kihwili ghweka kya ghala gha maha ghaapala kuhika, na ndo chepa utwihiliko ghwa milando yila ya telatele, nyambi ndo yiyila yila ya malaghilo yiitendekehwa ngungwa mbaka ngungwa, yaahotoleka ndwee kubhayoha bhandu bhala bhanakutundamila Chapanga. 2 Handa bhandu abho bhaantundamila Chapanga bhangayohwite ulemwa ghwabhe hoto, bhangaghendelelite ng'obhe kulibhoa kukita abhegha na ulemwa, na nyambi ahyo hyoha hingalekitwe, 3 peni nyambi ahyo hiitendekwa kila ngungwa ngati kubhakulungwa bhandu ulemwa ghwabhe. 4 Kiyaha mwahi ghwa makambako gha senga na makambako gha mbuhi ghwahotola ng'obhe kubhuha ulemwa.

5 Kubhukana na agha, Kilisito pakabheghite kanguhika pannima, kakinng'ombela Chapanga,

"Ghukipala ng'obhe bhwengu na nyambi,

peni ghukimikila kala mmili kwa kya nenga.

6 Ghungunoghelwa ng'obhe na nyambi ya kuyochwa anyama mu likuta

ebu matulo gha kuyoha ulemwa.

7 Apo ndo paanongelite, ‘Nenga megha apa,

kutenda ghaughapala, Ghwe Chapanga,

handa payityekitwe ya kya nenga mu kitabho kya malaghilo’"

8 Kandahi kakiyanda kulongela, "Ghulema na ghunoghelwa ng'obhe na nyambi ya kuyochwa na ya kuyoha ulemwa." Kakilongela habhu hata payibhele bhwengu ndo nyambi yikibhegha tela na malaghilo. 9 Mbole kakilongela, "Megha apa, Ghwe Chapanga hika kughatenda mapalo ghako." Habhu Chapanga kakigilimbula nyambi ya makachu na kihyengo kyake kakibhika nyambi yingi yimu. 10 Kiyaha Yesu Kilisito kakitwihilia mapalo gha Chapanga, twenga tunguyohwa na kutendwa bhaabhaghulitwe kwa kya Chapanga kwa njila ya nyambi ya mmili ghwa Yesu Kilisito ghuubhuhitwe mala yimo ghweka.

11 Ndundame ywohele Nnyahudi kangutenda lihengo lyake lya kutundamila kila linjubha na kutendekeha nyambi yila yila patangalo, nyambi yene yangahotola kubhua ulemwa. 12 Peni Kilisito kakitenda nyambi yimu kwa kya ulemwa, nyambi yinakutenda lihengo manjubha ghoha, mbole kakitama mbande ya nnilo ya Chapanga.

13 Kutandila apo kangualindila amyanja bhake mbaka kabhabhike pahi mu utabhala ghwake. 14 Hino, kiyaha Kilisita kakilibhuha nyambi mala yimu, kabhayoha ulemwa ngati mmeghe bhandu bhake manjubha ghoha mu mamjubha ghoha bhala bhoha bhaayohwa ulemwa ghwabhe.

15 Naywo Nhuki ghwa Chapanga kangutughombea yakya nnando aghu kwa kulongela,

16 "Ali ndo ninganilo liimbala kutenda nabho,

manjubha ghaapala kuhika, kangulongela Bambo.

Ndabhika malaghilo ghangu mu myoyo yabhe

na kughatyeka malaghilo ghangu mu mahala ghabhe."

17 Mbole kakighendelela kulongela, "Ndaghukulungwa ng'obhe kangi ulemwa hangi uhokelo ghwabhe." 18 Hino, ulemwa paghubhuhwa, kahone nhokolo ghwa kubhuha nyambi ya kughubhuha ulemwa.

19 Hino, maalongo bhango, kwa mwahi ghwa Yesu tungupeghwa mwoyo ghuukangamalite ghwa kuyingila pang'anyimo munu. 20 Ywombe katuhughulila njila ya hyono, njila ya ubhumi, kukindila lila lipasia ghwene ndo mmili ghwake mwene. 21 Hino, tubhegha na Ndundame nkulu nnolelekeha ghwa nyumba ya Chapanga. 22 Hino, tunheghelele Chapanga kwa mwoyo ya nyanyi yene yinakunhyubhalila hoto, patubhegha na myoyo yiiyohitwe kubhukana na hwacho hakataho, na mibhili yiighululitwe kwa machi gha nyanyi. 23 Tughungile lidumbilo lyetu litulihyubhalila na litulikambuka kyanga bhwaghalili, kiyaha Chapanga ywakatendite naghilo lyake ndo ywa kuhyubhalika. 24 Kangi tungunoghwa kuyonjokehana myoyo ngati tupalane na kutendelana gha maha twenga kwa twenga mu mapalo na mu kughatenda gha maha. 25 Kangi tukotoke kuleka hila hitohe hya kukungana papamu, handa paatenda bhangi paalekite kukongana, kangi yingutunogha kuyonjokehana myoyo handa paatenda bhangi, Linjubha lila lya Chapanga linguheghelela.

26 Handa patughendelela kutenda ulemwa kwa likaho mbole ya kupeghwa ghula umaha ghwa yila hoto, kahone nyaambi yaahotolekwa kubhuhwa kwa kya kutubhuhila ulemwa. 27 Peni kiihighalite ndo kulindila toso ya Chapanga kwa lyogha na mwoto nkalipa ghwakubhakanjaghana bhaannema Chapanga. 28 Mundu ywehele ywakaghalemite malaghilo gha Musa kaakomwagha kyanga luhungu, mbaka pabheghe uyimiho ghwa bhandu abhili ebu andatu. 29 Bhuli, munguhwachila bhuli yikinnogha ng'obhe kihyato kiibheghte kikulu kyanalumu mundu yula ywakanpughana Mwana ghwa Chapanga, na kubhoa mwahi ghwa ninganilo ghuunnyohite kukita ndo kilibhi kihakata, na kuntendela hyeta Nhuki luhungu? 30 Kiyaha tungummanya kukita Chapanga kakilongela, "Lihengo lya kubhuyiha kibhuyiho ndo lihengo lyang" Na hila hila Chapanga kakilongela, "Kataatosa bhandu bhake." 31 Ndo nnando ghwa kuyoghoha muno, kukukongana na toso ya Chapanga yuna ubhumi.

32 Mughakulungwe manjubha ghala gha kalongohi, pannyandite kuhyubhalila Kilisito, payibhele mukimokola kimbamanda peni mukilimbilila. 33 Pamoo pangi mukilighwa na kuyuyuhwa mu muu, pamoo pangi mukinoghwa kubhatangatila bhala bhaapamanditwe handa mwenga. 34 Mukiabhonela luhungu bhala bhaabheghite mu hiphopo, mukiyitikila kwa uyelelo kutolelwa utopelo ghwenu kiyaha mukimanya kukita mu myoyo yenu hikibhegha hilibhi hyanga kupela manjubha ghoha. 35 Hino, nkotoke kughuhobheha ukangamalo ghwenu, kiyaha mwaakamuhwa lilumbo likulu kuhuma kwa Chapanga 36 Yinguanogha mmeghe na ulimbililo ngati mmokole kughatwihiliha mapalo gha Chapanga na kupeghwa kila kyakanaghihite. 37 Handa paghatyekitwe Matyeko,

Kukali midaluko michoko hela,

Yula yunakuhika katahika

na kaabhalila ng'obhe.

38 Peni yunakutama handa pambala, katalama kwa kunhyubhalila nenga,

na handa katanyumanyuma

ndabhegha ng'obhe na uyelelo naywo."

39 Peni twenga tubhegha ng'obhe handa bhandu bhanakuleka kuntughila Chapanga na kuhobha, ngati tubhegha papamu na bhandu bhaanhyubhalila na kulopoleghwa.