1 Hino, nnando ghutughupala kulongela ndo aghu, twenga tubhegha na Ndundame Nkulu ghwa kya habhu, ywene katama mu mbande ya nnilo ya kiteho kya utabhala kya Chapanga Nkulu kunani. 2 Akwo kunani kangutenda lihengo lya Undundame Nkulu, mu lihema liibheghite Kunani kwa Chapanga lyene ndo pang'anyimo muno, liichengitwe na Bambo, hangi ng'obhe na anamundu.

3 Ndundame nkulu ywohele kahaghulwa ngati katendekehe nyambi na bhwengu. Ubhwabhu abhu, Nywo ayu Ndundame ghwetu Nkuku kangunoghwakabheghe na kilibhi kya kuyambika. 4 Handa Yesu kangaghendelela kutama mu nnima ndo , kangabheghite ndwee Ndundame Nkulu, kiyaha bhabhegha kala mandundame bhangi bhangutendekeha nyambi kubhukana na malaghilo gha Musa ghakapeghitwe na Chapanga. 5 Mahengo ghabhe gha undundame ndo nhwano ghwa kihwili ghweka kya ghala ghaabheghite kunani. Kiyaha Musa pakabheghite ugheghela na kuchenga litinga lyakaghombelitwe na Chapanga, ndo Chapanga kakinng'ombela, "Ghutendekehe hilibhi hyoha kubhukana na ghula nhwano ghuulangihitwe kula kukitumbi." 6 Hinu Yesu kakamuhwa lihengo lya undundame lya maha kyanalumu. Handa bhula ninganilo lyakayimihite nkati ya Chapanga na bhandu ndo lya maha kyanalumu, kiyaha ngimiko yake yibhegha naghilo yiibheghite ya maha kyanalumu.

7 Kiyaha handa lila ninganilo lya kalongohi lyangabheghite ng'obhe litwihiliko, pangabheghite ng'obhe na kupalaha ninganilo lya ubhili. 8 Hino Chapanga kakibhona kyangatwihilika kwa bhandu bhake, naywo kakilongela,

"Manjubha ghanguhika, kalongela Bambo,

na nenga ndatenda ninganilo lya hyono na bhandu bha Isilaeli na bhandu bha Yuda.

9 Ninganilo lyangu lyaabhegha ng'obhe handa lila linilitendite na aghohi bhabhe

linjubha kubhalongoha maha kuhuma ku Misili

Kiyaha bhakighendelela ng'obhe kulihyubhalila ninganilo lyangu,

na nenga nikiapughana.

10 Hinu ali ndo ninganilo lyangu liimbala kulitenda na Akaaisilaeli

kwa manjubha ghanguhika, kangulongela Bambo.

Ndaghabhika malaghilo ghangu mumahala ghabhe,

na kuyityeka mu myoyo yabhe.

Ndaabhegha Chapanga ghwabhe,

nabho bhaabhegha bhandu bhangu.

11 Kahone mundu ywa kunhunda ghanja ghwake

ebu kunng'ombela nndamani ghwake

‘Ghunmanye Chapanga’

Kiyaha bhoha bhaammanya nenga,

kutandila ywakabheghite nndokwa mbaka ywakabheghite nkulu.

12 Ndabhalekekeha kwa uhokelo ghwabhe,

na ndaghukulungwa ng'obhe ulemwa ghwabhe."

13 Kwa kulikema ninganilo ali lya hyono, Chapanga kangulitenda lila lya kalongohi ndo lya makachu, na kilibhi kyohele kya makachu kingubhegha kihakala na kibhegha ugheghela na kuhobha.