1 Hino, maalongo bhangu muuhaghulitwe na Chapanga, ngati muulilungite na lukemo lwa kunani kwa Chapanga, munhwachile muno Yesu, Nndumila na Ndundame Nkulu ghwa uhyubhalilo ghutuukambuka, 2 ywombe kakibhegha nhyubhaliko kwa ywakanhaghulite, handa Musa pakabheghite nhyubhaliko bhandu bha Isilaeli bhene ndo kitutubhi kya Chapanga. 3 Peni Yesu kangunoghwa uhokamo nkulu kuchweha kwa Musa, kiyaha yunakuchenga kitutubhi pakapeghwa uhokamo kyanalumu kupitingana kwa kitutubhi kyene. 4 Kila kitutubhi kinguchengwa na mundu, peni Chapanga ndo nchenga ghwa hilibhi hyoha. 5 Musa kakibhegha lihoka ghwa kuhyubhalika mu bhandu bha kitutubhi kya Akaaisilaeli bhoha, na kakikambuka milando yene Chapanga katalongela kuulongolo, 6 peni Kilisito handa Mwana nhyubhaliko ywakaalongoha bhandu bha kitutubhi kya Chapanga, na twenga ndo bhandu abho mu kitutubhi kya Chapanga, Handa twaaghendelela kubhegha akangamalo na ahwadali mu milando yila yituyidumbila mbaka ku uhiko.

7 Hinu, handa pakalongela Nhuki ghwa Chapanga,

"Handa lelo pamuliyihwa lilobhe lya Chapanga,

8 nkotoke kubhegha na ngakatala, handa abhele bhenu paang'ehite,

paabheghite bhangung'eha kula kukibhala.

9 Akwo ndo aghohi bhenu bhakibhegha bhangung'eha nenga na kumbima, Chapanga kangulongela,

hata bhula mu ngungwa mbinda mabhoko ncheche bhakighabhona mandendelo ghangu ghandendite.

10 Habhu ndo bhandu bhala bhakindenda nyaghabhale na nikilongela,

‘Abha bhandu ndo ahokelo manjubha ghoha,

Na bhangulema kuyitikila kinikilongela.’

11 Nikiyaghabhala na nikilapa,

‘Bhaayingila ng'obhe mu nnima ghwene ndabhapegha apughwe!’"

12 Alongo bhangu, mu mwenga kakotoke kubhegha mundu yuna ngakatala ywangahyubhalila, na ywakalibhaghulite na Chapanga yunakulama. 13 Peni nnyonjokehane mwoyo mabhene kwa mabhene manjubha ghoha kila linjubha, ngati kakotoke kubhegha nga yumoo ywenu ywakatenditwe nnonopo kwa ukuluho ghwa ulemwa. 14 Twenga twaaghendelela kubhegha mukulilunga na Kilisito, handa twaakamulana na udumbilo ghuutubheghite naghwo kutandila mbaka kuuhiko, 15 handa Matyeko paghatyekitwe,

"Handa pamuliyihwa lilobhe lya Chapanga lelo,

nkotoke kubhegha na ngakatala handa paatendite aghohi bhenu,

Pala paangilukite."

16 Ndo aghani abho bhaayihwite lilobhe lya Chapanga na bhakinkiluka? Ndo bhala bhoha bhaalongohitwe na Musa kukibhala kuhuma ku Misili. 17 Chapanga kakiyaghabhihwa na aghani mu ngungwa mbinda mabhoko ncheche? Kakiayaghabhalila bhala bhaatendite ulemwa, mitumba yabhe yikibhegha pilikichi kula kukibhala. 18 Chapanga pakalapite "Maayingila ng'obhe pa kupughwa kwa nenga," kakialapila aghani? Kakibhegha kakilongela kwa kya bhala bhaakilukite. 19 Hino, tungubhona kukita bhakiyingila ng'obhe akwo kwa ghwangahyubhalila kwabhe.