1 Hino, mbaha tughendelele kuulongolo kyanalumu, mu mahundo ghaakamilite na kuleka kunyuma mahundo gha kandahi ya kya lilagho lya Kilisito. Kangi tukotoke kuhighala mu ghala mahundo gha kandahi yaghalinga kulipetula kubhukana na kutama kwanga kunyeleha Chapanga na yakya kunhyubhalila Chapanga, 2 na mahundo gha ubatiso na gha kuayupila bhandu kwa kubhayabhikila mabhoko, na gha uhyuko na toso ya manjubha ghoha. 3 Kwa kutenda habho twaaghendelela kukula na kukamala mu uhyubhalilo pakapala Chapanga.

4 Kiyaha bhandu bhala bhayimanyite kala hoto ya kya Chapanga, na kukingama hilibhi hya maha ya kunani kwa njila ya Nhuki ghwa Chapanga, 5 na kumanya kya maha kukita lilagho lya Chapanga ndo la maha, na kangi bhangumanya makakala gha utabhala ghwa Chapanga mu nnima ghuupala kuhika, 6 na mbole bhakikiluka uhyubhalilo, yahotoleka ng'obhe kubhabhuyiha bhalipetule kangi, kiyaha bhangummangalila Mwana ghwa Mundu kya ubhili kwa likaho na kunnyuyuha pekupeku.

7 Kiyaha lutupi luukomelwa hula maghenda maghenda na kumela mimela yinakupapa mapambiko kwa nkandakanda, lutupi alwo lunonelwa na Chapanga, 8 peni handa yimela mihomi na hitonamamba, kahone lumotelo, na lwaabhegha ugheghela na kukotolwa na Chapanga na muuhiko lwayochwa mwoto.

9 Ena maapalo ghwangu hata bhula nubhatyekela kwa malagho makalipa, hata habho nenga mmegha na ulyaghilo kukita mungutenda gha maha ghaabhoneha kukita mulopoleghwa. 10 Kiyaha Chapanga ndo ghwa maha, na ywombe kangukulungwa lihengo limulitendite na upalo ghumuubhonehite kwa kya mwene na lihengo limubhatendela bhandu bhake na kangi mungughendelela kubhatendela. 11 Twenga tungupala kila yumu ywenu, kabhonehe ubhinililo ghula ghula, ngati mmokole kumanya uhoto ghuutwihilikite ghwa ghula udumbilo mbaka kuuhiko. 12 Habhu nkotoke kubhegha atotoho, ngati mmeghe handa bhanakuhyubhalila na bhaabheghite na ulimbililo, na kuuhiko bhaakamuhwa yila naghilo ya Chapanga.

13 Chapanga pakanlaghilite Ibulahimu, kakilapa kwa lihina lyake mwene, kiyaha kahone ywakabheghite nkulu kupitingana kwa ywombe, ywene kwa aywo kangahotolite kulapa, 14 Chapanga kakilongela, "Kulyaghila ndaghunonela na ndaghupegha ubheleko ntangalo." 15 Ibulahimu kakilimbilila na habhu kakimokola kila kyakalaghilitwe na Chapanga. 16 Bhandu paalapa angulapa kwa yumu ywakabheghite nkulu kupitingana bhene, na kilapo kinguyomola malimbano ghoha. 17 Naywo Chapanga kakiyimiha naghilo yake kwa kilapo, na kwa kya akyo kakiabhoneha peku peku bhala bhaabhalaghilite kukita kahone kupotongana kila kyakalapite, 18 Hinu Chapanga kakihitenda ahi hilibhi hibhili, naghilo na kilapo, hyene hyahotoleka ng'obhe kugilimbuka na kwa ahyo Chapanga kahotola ng'obhe kulongela uhwangi. Kakitenda hilibhi ahyo hibhili ngati katuyonjokehe mwoyo twenga tuntughilite ngati tughukamulile udumbilo ghwa milando yiipala kuhika. 19 Tubhegha na lidumbilo alyo handa ngwamiho ya kukamulila meli. Na lidumbilo alyo linguyingiha mbaka pahapa palapabhaghulitwe ya kya Chapanga ghweka kuhyeto ya lipazia pakunani. 20 Yesu mwene kalongolela kuyingila amwo kwa kya twenga na kabhegha Ndundame Nkulu mu manjubha ghoha kya nga uhiko, handa undundame ghwa Melikisedeki.