1 Hino, kiyaha yila naghilo ya kuyingila pakupughwa yikali yibhegha, ndo tuyoghope ngati ywohele nkati yetu kakotoke kulepelwa kuyingila paupughwo aghwo. 2 Mana ndo hoto, na twenga tulandamihwa Nhalo ghwa Maha ghughula ghula handa bhaalandamihitwe bhombe. Peni lilagho lila lyaliyihwite likianogha ng'obhe, kiyaha likihangangana ng'obhe na kuhyubhalila. 3 Hino, twenga tuhyubhalilite tungumokola upughwo aghwo ghwakatulaghilite Chapanga. Handa pakalongelite,

"Nikiyaghabhala na nikilapa,

‘Bhaayingila ng'obhe paupughwo ghwangu.’"

Chapanga kakighalongela agho hata payibheghite lihengo lyake likiyomoka kala kutandila pakaghubhumbite unnima. 4 Pamoo pamu Matyeko ghatyekwa yakya linjubha lya saba, "Chapanga kakipumulila linjubha lya saba, na kakileka mahengo ghake ghoha." 5 Kangi bahapa apa patyekwa, "Bhaayingila ng'obhe pakupughwa kwa nenga." 6 Hino, aghwo naghilo lya kuyingila pakupughwa likali kubhegha, kubhukana na bhala bhaalandamihitwe Nhalo ghwa Maha pala kandahi, bhakilepelwa kuyingila amwo, kiyaha bhakiyitikila ng'obhe. 7 Chapanga kakilibhika linjubha lingi liikemwa "Lelo." Mbole ya ngungwa ndangalo kakilongela kangi kwa njila ya Daudi malagho ghakaghakambukite kala,

"Handa lelo pamuliyihwa lilobhe lya Chapanga,

ghukotoke kubhegha na ngakatala."

8 Kiyaha Yoshua kakiapegha bhandu abho upughwo, mbole ya agho Chapanga kangalongela ng'obhe ya kya linjubha lingi lya kupughwa. 9 Kya habhu, kukali kubhegha na kupughwa kwa bhandu bha Chapanga mu linjubha lya saba. 10 Mana, kila ywakayingila pa upughwo ghwa Chapanga, kaapumulila kubhuka mu lihengo lyake, handa bhula Chapanga pakapughwite pakayomolite lihengo lyake. 11 Hino, tukangamale kuyingila mu upughwo aghwo, ngati kakotoke kubhegha ywohele mu nkati yetu ywakalepelwa kuyitikila handa pabhatendite bhombe ghwangahyubhalila.

12 Kiyaha Lilagho lya Chapanga libhegha na ubhumi na libhegha, na libhegha na makakala, lingutema kupitingana lukechelo lungutema mbande hyoha. Lungutema mbaka mu ng'ebhu payikongana mwoyo na nhuki, lingutema mbaka mu uloyhwo na mahuta. Lilagho alyo linguhangula hwacho na ulamulo ghwa myoyo ya bhandu. 13 Hangi kahone kibhumbe kyakulihiha muulongolo ghwa Chapanga, hilibhi hyoha hyahwimulighwa muulongolo ghwake, kwa ywombe ndo yingutunogha kubhuha mmalango ghwa ndendelo yetu.

14 Hino, handa tubhegha na Ndundame Nkulu kupitingana bhoha ywakayingilite kunani kwa Chapanga, aywo ndo Yesu Mwana ghwa Chapanga, na tughukamulile muno uhyubhalilo ghwetu. 15 Ndundame ayu Nkulu kangughumanya uyoyobhalo ghwetu, aywo mwene kaking'ehwa handa twenga mu milando yoha peni kakitenda ng'obhe ulemwa. 16 Habhu, tukiheghelele kyanga lyogha kiteho kya utabhala ghwa Chapanga yuna luhungu, ngati tumokole luhungu na umaha ghwa kututangatila mu mapungwo.