ԻՄԱՍՏՈՒԹՅՈՒՆ ՍԻՐԱՔԻ 26

Երջանիկ ամուսնության մասին

1 Երանելի է բարի կնոջ ամուսինը, և կրկնակի է նրա օրերի թիվը։

2 Բարեգործ կինն ուրախացնում է իր ամուսնուն և նրա տարիները լցնում խաղաղությամբ։

3 Բարի կինը մի բարի բաժին է, որ Տերը տալիս է իրենից երկնչողներին. հարուստ թե աղքատ՝

4 նրանց սիրտը գոհ է նրանից, և նրանց դեմքը միշտ ուրախ է։

Զգուշանալ չար կանանցից

5 Երեք բանի վրա կասկածեց իմ սիրտը, բայց կա մի չորրորդը, որի դեպքում աղոթում եմ։

6 Դրանք են՝ քաղաքի բանսարկությունը, ժողովարանի վրդովմունքը

7 և սուտ չարախոսությունը, որոնք մահից ավելի դաժան են։

8 Բայց սրտի ցավ և սուգ է այն կինը, որ չարանախանձ է մեկ այլ կնոջ,

9 լեզվանի գազան է, որ խոցում է բոլորին։

10 Չար կինը եզան երերացող լուծի պես է. ով բռնի այն իժ կբռնի։

11 Մեծ խայտառակություն է հարբեցող կինը, որ չի ծածկում իր ամոթը։

12 Կնոջ պոռնկությունը իմացվում է նրա շարժուձևերից, նրա աչքերի հայացքից և նրա արտևանունքներից։

13 Անամոթ դստեր վրա հսկողությո՛ւն հաստատիր, որ չլինի թե համարձակություն ստանալով՝ ինքնագլուխ լինի։

14 Լիրբ աչքի հանդեպ զգո՛ւյշ եղիր և մի՛ զարմացիր, եթե քո դեմ էլ հանցանք գործի։

15 Ինչպես ծարաված ճանապարհորդը, նա բերանը բացում և խմում է ամեն տեսակ մոտիկ ջրերից, նստում է ամեն տեսակ վրանի առջև և կապարճի պես բացվում առաջին իսկ նետի դեմ։

Գովք կատարյալ կնոջ

16 Կնոջ շնորհը հրճվանք է նրա ամուսնուն, և նրա ողջախոհությունը զորացնում է նրա ոսկորները։

17 Խոնարհ կինը Տիրոջ պարգևն է. անփոխարինելի է առաքինի հոգին։

18 Շնորհների վրա շնորհ է ամոթխած կինը,

19 և համարժեք կշիռ չկա նրա զուսպ հոգու համար։

20 Տիրոջ բարձունքներում ծագող արեգակ է

21 բարի կնոջ գեղեցկությունն իր տան հարդարանքի մեջ։

22 Ինչպես լուսատու ճրագն է մաքուր աշտանակի վրա, այնպես էլ երեսի գեղեցկությունն է հանդարտ հասակի վրա։

23 Ինչպես ոսկեղեն սյուներն են արծաթեղեն խարիսխների վրա, այնպես էլ գեղեցիկ ոտքերն են խոնարհ գարշապարների վրա։

25 Սիրտս տխուր է երկու բանի համար, և կա մի երրորդ բան, որից իմ մեջ ցասում առաջացավ։

26 Դրանք են՝ պատերազմող մարդը, որն աղքատության պատճառով է թշվառ, և իմաստուն մարդիկ, որոնք արհամարհված են։

27 Բայց ով արդարությունից դառնում է դեպի մեղքը, Տերը նրա համար սուր է պատրաստում։

28 Դժվար թե վաճառականը խուսափի հանցանքներից, և պանդոկապանը արդարանա մեղքերից։