1 Okiool ŋ’etsam mbuul bam wɛn ndɛ amaabɔɔ eluɔ bvi ebeta ndɛ kaã, eli otsweel b’eluɔ bvɛn k’amwɛn wɛ. 2 Eli me nkuul a okiool kwɛn Nziã átsweel baal ba tsɔɔn-tsɔɔn.

3 Eli me nkuul a okiool kwɛn bia-byɛ ekwaal otsɛn wɛn Nziã ási ɔ̃kiri m’Endɔɔ e ndɛ. Obobɔ, eluɔ bvi abemwɛn, ási bvɛ me nkuul a bvɛn k’abemwɛn wɛ✝.

4 Eli me nkuul a okiool kwɛn Abɛl áwi Nziã mpɔɔ yi enduru yi éwi Kayiin m’ɔ̃bvɛn. M’okiool o ndɛ, Nziã átsweel ndiri ndɛ oli mbuul wa dzu, ke ngwel wɛ Nziã ndyam átsweel kab e ndɛ. M’okiool, Abɛl abeyɛɛn kɛn, onkyam ŋɛn ndɛ ámaakwa✝.

5 Eli me nkuul a okiool kwɛn Nziã ábiri Enok ola ndɛ wu Nziã, kwɛn ndɛ abee epfu omwɛn. M’emfa okyɛ, k’ámwɛn ndɛ bvool wɛ, me ndɔɔ yɛn Nziã ábiri ndɛ ola ndɛ. Ke ngwel wɛ, ŋ’ɛ̃kwel ye k’ebiri Nziã ndɛ, ndɛ átsweel me ndɔɔ a ndɛ ndiri ndɛ wu Enok ákewa ndɛ esɛ✝. 6 Kɛn okɛɛn mbuul k’ali y’okiool wɛ, ndɛ k’akoo bam k’awa Nziã esɛ wɛ. Ke ngwel wɛ, mbuul wu asyal tsotsoo a Nziã, ebvaan ndɛ akiool ndiri Nziã oli, bvool ndiri ndɛ abewa baal b’abebii ndɛ furu.

7 Eli me nkuul a okiool kwɛn, Nowa áyoo ãnkunkwa m’éwi Nziã ndɛ me ndɔɔ a ndɔɔ yi èkeya yɛn ále kɛn amwɛn wɛ. Ndɛ okiool bam ndiri m’ékeyɛɛn Nziã ã́li mã taa-taa. Ndɛ bu atuu ãsua mɛn me mɔ̃ ndɛ obvuul ye yam e ndɛ lueel. M’emfa okyɛ, m’okiool o ndɛ, Nowa ásuo kwɛn baal b’ɔ̃kiri áli onse obi. Bvool m’okiool o ndɛ, Nziã áwel ndɛ onge mbuul wa dzu✝.

8 Eli me nkuul a okiool kwɛn Abalayam álweel mbel yi éti Nziã ndɛ, ŋ’éyɛn ndɛ ɔ̃kiri wu éwi Nziã ndɛ kwɛn akal wa ndɛ. Ndɛ áyɛn, kwɛn ŋɛn ndɛ k’áyɛɛ ku ékeyi ndɛ wɛ✝. 9 Eli me nkuul a okiool kwɛn ndɛ okal onge ɔ̃nzii onse ɔ̃kiri wu éwi Nziã ndɛ lɔɔ. Ndɛ ákekal onse asɛɛ. Emfa kiki hɛ̃ Isak ye Dzakab ákekal onse asɛɛ onge ndɛ. Bɔ ange-buaal b’áwel ɔ̃swal wa lɔɔ lili li éwi Nziã bɔ✝. 10 Ke ngwel wɛ, Abalayam ákebviil bviil li átuu nkal ãnkɔɔn mɛn k’ãtsiɔ̃ wɛ, lɛn Nziã ndyam wu átsam me ndɔɔ emfa ki atuu lɔ, bvool átuu lɔ.

11 Me nkuul a okiool hɛ̃ Sala ákoo k’abɔɔ ãyam, onkyam ŋɛn ndɛ áli empi, bvool onkyam ŋɛn mvel yɛn ndɛ álekoo k’abva yam álemeebwel. Ke ngwel wɛ, ndɛ ákiool ndiri Nziã wu áwi ndɛ lɔɔ, wu obvaan m’okiool.✝ 12 Obɔ otsɛn bɛn, me mbuul ngɔmɔ̃, wɛn áleyii ekukwel, swa epfu, áburu ãyam bibi onge angam-a-ngam b’áli ke ywel, onge esɛɛ bvi eli nku-a-nku ãdza m’ɔ̃ngwa, bvɛn k’akoo k’atsiɔ wɛ✝.

13 Eli onse okiool ku ékwi baal obɔ bueel. Bɔ k’ábɔɔ eluɔ bvi éwi Nziã bɔ lɔɔ wɛ, bɔ ámwɛn bvɛ kɛn a lala, bu esi bɔ esɛ. Bɔ ákiool ke nkwel a baal bueel ndiri bɔ ali anzii bvool ali ɛ̃mbwel-nkuul me nsie ŋã✝. 14 Ke ngwel wɛ, baal b’abeyɛɛn obobɔ, abesuo kal-a-kal ndiri bɔ abebii ɔ̃kiri a bɔ. 15 Okɛɛn bɔ b’ákesɛɛn ɔ̃kiri wu éfi bɔ, kɛn bɔ ákaabɔɔ mpwee yi abvool okɔ. 16 Kɛn a bɔ ákebii ɔ̃kiri wu onduru obvie, ŋ’ayɛɛn ndiri ɔ̃kiri wa ke ywel. Obɔ otsɛn bɛn, Nziã k’ayoo opfuru okɛɛn baal ata ndɛ me «Nziã a bɔ» wɛ, ke ngwel wɛ, ndɛ ámaayɛɛl bɔ bviil.

17 Eli me nkuul a okiool kwɛn Abalayam áwi Isak onge mpɔɔ, ŋ’ékie Nziã ndɛ. Wu ékewa ndɛ mpɔɔ éli ensuu e ndɛ muaan ngɔ̃mɔ̃ wu bɔɔl, wu éwi Nziã ndɛ lɔɔ✝. 18 Nziã álieel ndɛ ndiri: «Me nkuul a Isak yɛ akieel abɔɔ atiɔɔl✝.» 19 Abalayam áketa kaã ndiri Nziã okoo k’aseel mbuul m’epfu. Obɔ otsɛn bɛn, Nziã ábveel ndɛ muaan: Ndɔɔ oyɔ eli mboo.

20 Eli me nkuul a okiool kwɛn Isak ándɔɔl Dzakab y’Edzau kuɔɔl me ndɔɔ ãndɔɔ m’ã̀keya ke nkwel✝.

21 Eli me nkuul a okiool kwɛn Dzakab ándɔɔl baan a Dzedzef ngɔmɔ̃ ngɔmɔ̃ kuɔɔl, ŋ’eyii ekwa ndɛ. Ndɛ ápfɔɔn nkal a nswɛɛ a ɔ̃mpaã a ndɛ✝.

22 Eli me nkuul a okiool kwɛn Dzedzef, ŋ’eyii ekwa ndɛ, álieel me ndɔɔ a opal o baan b’Isalayel k’Edzipito, bvool átam mɛn ebvaan kieel asa me ndɔɔ ɛ̃ywee ɛ̃ ndɛ✝.

23 Eli me nkuul a okiool kwɛn amburu a Moyize álwɔɔn ndɛ nswii tyel, ke mbee a ŋ’áburu ndɛ. Ke ngwel wɛ, bɔ ámwɛn kwɛn muaan a bɔ áli y’ompal, bvool bɔ k’áyoo buɔ b’afel ngel yi éwi ɔ̃kwɛn wɛ✝.

24 Eli me nkuul a okiool kwɛn Moyize, ŋ’ékwel ndɛ, ábee kwɛn ata ndɛ me muaan wu bɔɔl a muaan a Falahɔ̃ wu ɔ̃kaal✝. 25 Kɛn a ndɛ ásueel kwɛn atuaal ndɛ mpal bvoo ye baal a Nziã, ye k’ekal ndɛ onse osia mpaa b’ãbi bo lio etsi-tsiri. 26 Ke ngwel wɛ, ndɛ ámwɛn kwɛn, ŋ’apfiɔɔl ndɛ onge b’ápfiɔɔl Mãsia enduru obvie ye k’ebii ndɛ opfel b’Edzipito. Ke ngwel wɛ, ndɛ áketaal furu li ékeya.

27 Eli me nkuul a okiool kwɛn Moyize ámbal Edzipito, k’ábal mpuru a ɔ̃kwɛn wɛ. Ke ngwel wɛ, ndɛ ásɛn ãnã olɔ yɛɛn wɛn mbuul wu ákemwɛn Nziã wɛn k’abemwɛn wɛ✝. 28 Eli me nkuul a okiool kwɛn ndɛ átam baan b’Isalayel k’abɛɛl pfuun li Onduru bvool k’anzɔɔ ãkel m’ɔ̃nywã a nzɔ, kwɛn ãnzwel m’ãbam ãbee baan b’abɔɔl b’ɛ̃kwel b’Afi-Isalayel obam✝.

29 Eli me nkuul a okiool kwɛn baal b’Isalayel átsiil ãdza m’ɔ̃ngwa mã bɛ onge nsie yi kɛɛ-kɛɛ. Kɛn a ŋ’ékie baal b’Edzipito k’atsiil onge bɔ, bɔ ádziin✝.

30 Eli me nkuul a okiool kwɛn ebɔɔ e bviil e Dzeliko ébvi ke mbee a ŋ’édziɔɔn baan b’Isalayel bviil olɔ ãtsoo nsiaan✝. 31 Eli me nkuul a okiool kwɛn, Laab, ɔ̃kaal-nga-esio, k’ákwi bvoo ye baal b’ábee Nziã olweel wɛ. Ke ngwel wɛ, ndɛ áyɔɔ baal b’áyetal Dzeliko m’edziɔɔn ngesɛ✝.

32 B’èyɛɛn mɛ̃ bvool omã? Ke ngwel wɛ, mɛ̃ lio ol’eywɛn li eyɛɛn me ndɔɔ a baal ba m’ɔ̃mɔ̃-ɔ̃mɔ̃: Dzedehɔ̃, ye Balak, ye Samesɔ̃, ye Dzefete, ye David, ye Samuɛɛn, y’aliaal-ɛ̃kiɛɛn a Nziã✝. 33 Eli me nkuul a okiool kwɛn bɔ ábvel eta ke nkwel ãkwɛn bibi. Bɔ ási ãndɔɔ mã dzu, bɔ ábɔɔ eluɔ bvi éwi Nziã bɔ lɔɔ, bɔ ákuru ebob ɛ̃nywã✝. 34 Bɔ ádzeel mbaa yi ékekaan kokɔ, k’ákwi m’epwel wɛ. B’áli y’ãluu, ãnzuru ã bɔ ã́l’ãyii kɛɛ-kɛɛ. Bɔ ásuo mpɛn ŋ’ékedzwaan bɔ eta, bvool ásuul ambwel-mbwel b’anzii ál’áyii abal otsa-otsa ke nkwel a bɔ✝. 35 Me nkuul a okiool, akaal ámwɛn baal a bɔ b’ámaakwa asiool.

Kɛn átueel baal bakyɛ mpal, bvool bɔ ábee kwɛn abvuul bɔ, me ndɔɔ yɛn bɔ áyɛɛ ndiri bɔ akieel asiool bvool kieel akal y’elaã li enduru obvie✝. 36 Ákesyob bakyɛ, áyuul bɔ asikɔrɔ, ákuru bɔ ebwal bvool áywɛɛn bɔ me bwal.✝ 37 Ábam bakyɛ m’ãnkɔɔn, átsiil bakyɛ etswel bviaal me sii, ábam bakyɛ m’epwel. Bɔ ákefa ku ákebwel ku, ákelaal ebaan bvi emɛmɛɛ̃ ye bvi antab, bɔ áywɛn a bvieel, áketuaal bɔ mpal bvool ási kwɛn bɔ amwɛn fool✝. 38 Ɔ̃kiri k’ábvaan me ndɔɔ a bɔ wɛ. Bɔ ákefa ku ákebwel ku onse ɛ̃baan mi kɛɛ-kɛɛ, onse ãnkio, onse ãywɛn m’onse ãnkɔɔn y’ãmbie.

39 Bɔ obɔ bueel, onkyam ŋɛn Nziã átsweel bɔ, me ndɔɔ okiool o bɔ, bɔ k’ábɔɔ ki éwi Nziã bɔ lɔɔ wɛ. 40 Ke ngwel wɛ, Nziã áli y’ɔ̃yɛɛl wu onduru obvie me ndɔɔ a bia-byɛ. Ndɛ ádzii kwɛn bɔ akal ɔ̃koo nkuul mɔ̃ ye bia-byɛ.