1 Yɔɔl kwɛn dzii li baan a Nziã ekal kɛn okal onse byɛ! 2 Ebee odzɛɛn k’eyɔɔ baal b’aya ola byɛ ngesɛ. Ke ngwel wɛ, baal b’ási obobɔ áyɔɔ ãnzwel ola bɔ, kɛn a bɔ k’áyɛɛ wɛn éli ãnzwel wɛ✝. 3 Etsam me baal b’ali onse bwal, olɔ yɛɛn wɛn byɛ hɛ̃ eli onse bwal onge bɔ. Etsam hɛ̃ me baal b’abetuaal mpal, ke ngwel wɛ byam hɛ̃ eli ye nzuru yɛn ekoo k’emwɛn fool.

4 Yɔɔl kwɛn mbuul wueel awal bal ye dzuun! Yɔɔl kwɛn ɔ̃kal y’ɔ̃lam akuru nzuru me bakyɛ. Ke ngwel wɛ, Nziã àwa etumbu me baal b’asa ãndɔɔ m’esio ye b’adzuu y’anga-akal wuo anga-alam.

5 Yɔɔl kwɛn nzal o nzi obee y’okwɛn okal nkal a byɛ. Ekal y’esɛ m’eluɔ bvi eli a byɛ. Ke ngwel wɛ, Nziã ndyam álieel ndiri: «Mɛ̃ k’èsiil yɛ bam wɛ, mɛ̃ hɛ̃ k’èyiri yɛ bam wɛ✝.» 6 Obɔ otsɛn bɛn, bia-byɛ ekoo k’eyɛɛn y’ãŋã mbueel ndiri:

«Mfam oli ɔ̃wuaal a mɛ̃,

mɛ̃ ke ndi ye ndɔɔ yi ebal wɛ.

Yi èsa mbuul mɛ̃ mã✝?»

7 Etsam m’ambiri a byɛ, b’átee byɛ Endɔɔ e Nziã. Etsam epfuũ bvi éli a bɔ y’emfa ki ésɛn bɔ. Obobɔ, enɔɔn a okiool o bɔ. 8 Yeso Mãsia oli ndɛ wuwu, ãtsio, nonɔ̃ bvool ɔ̃bu. 9 Baal abee byɛ opfuru m’ãtee ãkyam m’emfa bwɛn emfa m’ãkam y’okiool o bia-byɛ. Ke ngwel wɛ, eli ngesɛ kwɛn ɛ̃kwal ɛ̃ bia-byɛ ɛ̃wam me nkuul a nyiĩ a Nzia, ke m’olweel b’ãngel m’ãtal bvi-odza wɛ, ãngel mɛn bvel pyɛ me b’abekiaal mɔ̃✝.

10 Bia-byɛ eli ye nkiin yi awa Nziã ãmpɔɔ yɛn angaa-a-Nziã b’asal onse sɛɛ k’akoo k’adza bvi-odza e yɔ wɛ. 11 Ke ngwel wɛ, ãkel m’anyam m’abewa ãmpɔɔ me ndɔɔ odzeel b’ãbi, ngaa-a-Nziã wu ɔ̃nɛn abebiri mɔ̃ onse mboo yi enduru ɔ̃nsensal. Kɛn tuo li anyam obɔ, ákepaal lɔ onse bviil, bu atsoo lɔ mbaa✝. 12 Obɔ otsɛn bɛn, Yeso hɛ̃ apal ye ndɛ onse bviil, bu ayebam ndɛ, kwɛn baal akal ba ngel m’ãkel ã ndyam. 13 Obobɔ, bia-byɛ hɛ̃ epal onse bviil, eyi ola ndɛ, ekiool k’eyoo opfuru b’éyoo ndɛ. 14 Ke ngwel wɛ, bia-byɛ k’eli y’ola b’ɔ̃bu me nsie ŋã wɛ. Kɛn a bia-byɛ ebebii ola b’òya. 15 Obobɔ, yɔɔl kwɛn, me nkuul a Yeso, lio lam lueel, bia-byɛ ewa Nziã mpɔɔ yi elweel ndɛ, ŋ’ayɛɛn ndiri, eyam ãnziĩ m’ãlweel nkuũ a ndɛ ke nkwel a baal bueel. 16 Kɛn ebee odzɛɛn k’esa ãndɔɔ mã ngesɛ ye k’ewuaal a bakyɛ. Ke ngwel wɛ, omɔ̃ eli ãmpɔɔ m’ãsa Nziã esɛ.

17 Elweel ambiri a byɛ bvool esa ãndɔɔ m’etam bɔ byɛ osa. Ke ngwel wɛ, bɔ abekyab nkal ɛ̃fel ɛ̃ byɛ, bvool ebvaan bɔ asuo Nziã emfa ki esi bɔ ɔ̃sal a bɔ. Esa kwɛn bɔ asa ɔ̃sal ondɛ y’esɛ, k’onse ɛ̃nduɔɔl wɛ. Okɛɛn k’obobɔ wɛ, ndɛ k’akal ye bvel si ngemɔ̃ me ndɔɔ a byɛ wɛ.

18 Ebuɛɛn me ndɔɔ a bee. Ke ngwel wɛ, bee ekiool bam wɛn, ãtsam ã bee ãli tsɛtsɛ, bvool bee edzii k’ekal y’epfuũ bvi ngesɛ m’ãndɔɔ mbueel. 19 Mɛ̃ eluɔɔn byɛ bam k’esa obobɔ, kwɛn Nziã awa mɛ̃ nkuul yi ebvool mɛ̃ ola byɛ tswa-a-tswa.

20 Yɔɔl kwɛn Nziã-Nga-Opi wu áseel onse b’ákwi-ákwi Ɔ̃nkiaal a emɛmɛ̃ wu ɔ̃nɛn, Mfam a bia-byɛ Yeso, m’ãkel m’Ondoo b’ɔ̃bu, 21 asuul byɛ ekoo k’esa ãndɔɔ mbueel mã ngesɛ, kwɛn byɛ esa b’edzii ndɛ. Yɔɔl kwɛn ndɛ bvool asa onse bia-byɛ ãndɔɔ mbueel m’ãsa ndɛ esɛ me nkuul a Yeso Mãsia. Yɔɔl kwɛn lweel ekal li ndɛ ɔ̃bu nzal ɔ̃bu! Amɛn!

22 Andoo, mɛ̃ nswɛn byɛ ãndɔɔ mã me ndɔɔ yi ewɛɛl byɛ. Mɛ̃ nduɔɔn byɛ k’ekuru ɛ̃kwal me ndɔɔ a mɔ̃. Mɔ̃ k’ãli bibi wɛ. 23 Eyɛɛ wɛn ndoo a bia-byɛ Timote amaapal onse bwal. Ŋɛn ndɛ otɔ ŋã tswa-a-tswa, mɛ̃ èyetal byɛ ye ndɛ.

24 Ebio ambiri a byɛ bueel ye baal ba ngel bueel. Andoo b’afi ɔ̃kiri wu Itali abio byɛ hɛ̃.

25 Yɔɔl kwɛn Nziã asio byɛ bueel nyiĩ!