1 Ke mbee a ŋ’eyɛɛn Yeso ãndɔɔ omɔ̃, ndɛ oseel mviil ke ywel, bu abuɛɛn bubu: «Taal, lio emeekoo, lweel Muaan a yɛ, kwɛn Muaan hɛ̃ alweel yɛ. 2 Ke ngwel wɛ, onge b’éwi yɛ ndɛ okwɛn nkal a baal bueel, ndɛ hɛ̃ owi baal bueel b’ewi yɛ ndɛ elaã li ɔ̃bu nkal ɔ̃bu. 3 Elaã li ɔ̃bu nkal ɔ̃bu eli oyɛɛ o yɛ, yɛ wu Nziã kɛn a ngɔmɔ̃ wa taa-taa, y’oyɛɛ o Yeso Mãsia wu eyuɔɔl yɛ. 4 Mɛ̃ ndyam ndweel yɛ me nsie, mɛ̃ man ɔ̃sal wu ewi yɛ mɛ̃ osa. 5 Oŋɔ̃ meba, yɛ wu Taal, wa mɛ̃ lweel ke nkwel a yam, lweel li éli a mɛ̃ ye yɛ, ye k’asa ɔ̃kiri. 6 Mɛ̃ nsuo nkuũ a yɛ ola baal b’ewel yɛ onse ɔ̃kiri, bu wi mɛ̃. Bɔ áli ba yɛ, yɛ wi mɛ̃ bɔ, obobɔ bɔ akwee Endɔɔ e yɛ. 7 Meba, bɔ ayɛɛ kwɛn bvieel bvi ewi yɛ mɛ̃ efi ola yɛ. 8 Ke ngwel wɛ, mɛ̃ ngwi bɔ ãndɔɔ m’ewi yɛ mɛ̃. Bɔ ayɔɔ mɔ̃. Bɔ ayɛɛ bam ndiri mɛ̃ mfi ola yɛ, bɔ hɛ̃ akiool ndiri yɛ wu oyuɔɔl mɛ̃.»

9 «Mɛ̃ me ndɔɔ a bɔ ebuɛɛn. Mɛ̃ ke me ndɔɔ a ɔ̃kiri ebuɛɛn wɛ, mɛ̃ ebuɛɛn me ndɔɔ a b’ewi yɛ mɛ̃, nzal-a-ŋɛn bɔ ali ba yɛ. 10 Ke ngwel wɛ, eluɔ bvieel bvi ndi a mɛ̃, eli bvi yɛ, bvi eli a yɛ hɛ̃, eli bvi mɛ̃. Obobɔ, lweel e mɛ̃ emɔɔn onse bɔ. 11 Alili ŋã, mɛ̃ bvool k’ebekal onse ɔ̃kiri wɛ, ke ngwel wɛ mɛ̃ ŋ’eya ola yɛ, bɔ asiil onse ɔ̃kiri. Taal wu oli Ɔ̃nsensal, kiaal bɔ me mpɛn a nkuũ a yɛ, nkuũ yi ewi yɛ mɛ̃, kwɛn bɔ akal mbuul ngɔmɔ̃ onge b’eli bia-yɛ bvoo onge mbuul ngɔmɔ̃. 12 Ŋ’éli mɛ̃ kɛn ye bɔ, mɛ̃ bam ékekiaal bɔ me nkuũ a yɛ, nkuũ yi ewi yɛ mɛ̃. Mɛ̃ nkwee bɔ, onkyam ngɔmɔ̃ onse bɔ wu odziɔɔn pyɛ, okɛɛn ke kɛn a ndɛ ondɛ wu muaan wu odziɔɔn wɛ. Oŋɔ̃ ŋ’asi ndɔɔ yi ákel onse Ɛ̃nkaan mi ngel✝. 13 Meba ŋã mɛ̃ ŋ’eya ola yɛ. Mɛ̃ èyɛɛn ãndɔɔ mã ŋe ndi mɛ̃ kɛn onse ɔ̃kiri, kwɛn esɛ e mɛ̃ onse bɔ ekal ɔ̃koo. 14 Mɛ̃ ndyam ngwi bɔ Endɔɔ e yɛ, ɔ̃kiri bu abyel bɔ, ke ngwel wɛ, bɔ k’ali b’ɔ̃kiri wɛ, onge bɛn mɛ̃ ke ndi wu ɔ̃kiri wɛ. 15 Mɛ̃ ke nsɔɔ ola yɛ k’ambaal bɔ onse ɔ̃kiri wɛ, ki nsɔɔ mɛ̃ kɛn a kyɛn yɛ kiaal ke nkwel Obi. 16 Bɔ k’ali b’ɔ̃kiri wɛ, onge bɛn mɛ̃ ke ndi wu ɔ̃kiri hɛ̃ wɛ. 17 Suul bɔ akal bam ba ngel, me nkuul otaa-taa. Endɔɔ e yɛ eli otaa-taa. 18 Onge bɛn yɛ ayuɔɔl mɛ̃ onse ɔ̃kiri, mɛ̃ hɛ̃ ngyuɔɔl bɔ onse ɔ̃kiri. 19 Me ndɔɔ a bɔ, myam nkab nzuru a mɛ̃ yueel ola yɛ, kwɛn hɛ̃ bɔ akal ba ngel me nkuul a otaa-taa.

20 Mɛ̃ ke mbuɛɛn kɛn a me ndɔɔ a bɔ wɛ, mɛ̃ hɛ̃ mbuɛɛn me ndɔɔ a b’akieel akiool mɛ̃ me nkuul ãtee ã bɔ. 21 Mɛ̃ mbuɛɛn kwɛn bɔ akal kɛn a mbuul ngɔmɔ̃. Taal, yɔɔl kwɛn bɔ akal bvoo yɛ bia-yɛ onge b’eli yɛ bvoo ye mɛ̃, mɛ̃ hɛ̃ ndi bvoo ye yɛ. Yɔɔl kwɛn bɔ akal mbuul ngɔmɔ̃ kwɛn ɔ̃kiri ayɛɛ ndiri yɛ wu ayuɔɔl mɛ̃. 22 Mɛ̃ ngwi bɔ lweel li ewi yɛ mɛ̃, kwɛn bɔ akal mbuul ngɔmɔ̃, onge b’eli bia-yɛ bvoo onge mbuul ngɔmɔ̃. 23 Mɛ̃ ekal onse bɔ bvool yɛ akal onse mɛ̃, m’emfa okyɛ bɔ akal bam ɔ̃koo onse bvoo. Obobɔ, ɔ̃kiri ayɛɛ kwɛn yɛ mbuul wu ayuɔɔl mɛ̃, bvool kwɛn yɛ dzii bɔ onge b’edzii yɛ mɛ̃. 24 Taal, b’ewi yɛ mɛ̃, mɛ̃ nzii kwɛn mboo ye ndi mɛ̃, bɔ hɛ̃ akal ye mɛ̃, kwɛn bɔ amwɛn lweel e mɛ̃, lweel li ewi yɛ mɛ̃, ke ngwel wɛ yɛ ádzii mɛ̃ ye k’asa ɔ̃kiri. 25 Taal wa dzu, ɔ̃kiri k’ayɛɛ yɛ wɛ, kɛn a mɛ̃ ndyam ngyɛɛ yɛ, bvool bɔ ayɛɛ ndiri yɛ mbuul wu ayuɔɔl mɛ̃. 26 Mɛ̃ nsi kwɛn bɔ ayɛɛ nkuũ a yɛ. Mɛ̃ bvool èsa kwɛn bɔ ayɛɛ yɔ, kwɛn dzii li edzii yɛ mɛ̃ ekal onse bɔ, bvool kwɛn mɛ̃ nkal onse bɔ.»