1 Ŋ’eman Yeso ãndɔɔ omɔ̃ mbueel oyiool, ndɛ olieel ayio a ndɛ ndiri: 2 «Byɛ eyɛɛ kwɛn ãtsoo ãsiil mbuaal m’abɛɛl Pfuun li Onduru. M’emfa okyɛ, àtiɔ Muaan a mbuul, kwɛn abɛɛl ndɛ m’enkulusu.»

3 Obobɔ, amfam b’anga-a-Nziã y’akuu-kuul b’Ayuda abvɔɔn ke nzɔ a ngaa-a-Nziã wu ɔ̃nɛn wu ata me Kayif. 4 Bɔ akuru k’asiin Yeso m’ãyal bvool abam ndɛ. 5 Kɛn a bɔ ayɛɛn ndiri: «Ebee ndɛ osiin onse pfuun, kwɛn oŋɔ̃ tsungaa abee onse baal obva.»

6 Ŋ’éli Yeso k’ola bo Betani onse nzɔ a Simɔ̃ wɛn tsɔɔn áli y’ãluu me leba, 7 ɔ̃kaal ngɔmɔ̃ osyel tsotsoo a ndɛ me lio li ékedza ndɛ. Ndɛ áli y’ɔ̃langa wu alebat wu áluul m’ãnasi* mã nzi bibi. Ndɛ oyiri ndɛ mɔ̃ m’ɔ̃tswɛ. 8 Ŋ’emwɛn ayio obobɔ, bɔ ayoo nkyee, bu alieel bubu: «Li ebɔɔ̃ li bwɛn-a-bwɛn? 9 Al’akoo k’atiɔ ãnasi omɔ̃ nzi bibi, bu awel nzi oyɔ awi aywal.» 10 Ŋ’eyɛɛ Yeso obobɔ, ndɛ olieel ndiri: «Otsɛn omã b’esa byɛ ɔ̃kaal wu? Ndɔɔ yi esi ndɛ me ndɔɔ a mɛ̃ eli ngesɛ. 11 Aywal, byɛ èkal ye bɔ lio lueel. Kɛn a mɛ̃, byɛ k’èkal ye mɛ̃ lio lueel wɛ. 12 Okɛɛn ndɛ oyiri mɛ̃ ãnasi mã me nzuru, me ndɔɔ yi afaal odziool o mɛ̃. 13 Taa-taa bam, mɛ̃ eyɛɛn byɛ wɛn, ãmboo mbueel m’akieel atsal Nsia yi ngesɛ yi, m’ɔ̃kiri ndyam wueel, akieel ayɛɛn me ndɔɔ yi esi ɔ̃kaal wu, me ndɔɔ yi atsam ndɛ.»

14 Obobɔ, ngɔmɔ̃ onse antam kuun ye buaal wɛn nkuũ Yuda Isikaliot, oyetal amfam b’anga-a-Nziã. 15 Ndɛ ofuul bɔ bubu: «Ki èwa byɛ mɛ̃ emã, ŋɛn mɛ̃ ntiɔ byɛ Yeso?» Bɔ bu awi ndɛ nzi yi ãbvieel ãku-ãtyel✝. 16 Bɛɛn lio olɔ, Yuda oyii abebii mpwee yi ngesɛ yi etiɔ ndɛ bɔ Yeso.

17 Me tsoo li ɛ̃kwel li pfuun li adza amampa bɛn k’abiin wɛ, ayio ayefuul Yeso ndiri: «Yɛ dzii kwɛn bee eyeyɛɛl yɛ ɔ̃laan wa pfuun li Onduru kwɛn?» 18 Ndɛ obveel bɔ ndiri: «Eyi onse bviil, ola mfungetie, eliaal ndɛ bubu: "Ɔ̃tee oyɛɛn ndiri: Lio e mɛ̃ eyii ekoo. Ola yɛ, mboo yi èyedza mɛ̃ pfuun li Onduru y’ayio a mɛ̃."» 19 Ayio asi ãndɔɔ kɛn a m’emfa ki etam Yeso bɔ osa. Bɔ bu awel ɔ̃yɛɛl wa pfuun li Onduru.

20 Ŋ’etɔ ãnkunkwal, Yeso owel mboo me ndɔɔ yi adza y’antam kuun ye buaal. 21 Ŋ’eyii edza bɔ, ndɛ olieel bɔ bubu: «Taa-taa bam, mɛ̃ eyɛɛn byɛ wɛn, ngɔmɔ̃ onse byɛ àtiɔ mɛ̃.» 22 Ayio ayii bam ãwua-ãwua, bu abvi ndɛ ofuul wɛn ke mbee a wɛn ndiri: «Mfam, mɛ̃?» 23 Yeso obveel ndiri: «Wu olɔ kuɔɔl ye mɛ̃ onse saan, ndɛ ondɛ wu àtiɔ mɛ. 24 Muaan a mbuul ŋ’àyi m’emfa ki ákel me ndɔɔ a ndɛ✝. Kɛn ãwua m’ãnduru ɔ̃ndel ola mbuul wu àtiɔ Muaan a mbuul! Me ndɔɔ a mbuul ondɛ, ngesɛ ále k’ábee ndɛ oburu!» 25 Yuda wu àtiɔ Yeso abvuru oyɛɛn, ofuul ndɛ ndiri: «Ɔ̃tee, eli mɛ̃?» Yeso obveel ndɛ ndiri: «Ee, yɛ bu yɛɛn yɔ obɔ.»

26 Ŋ’eyii edza bɔ, Yeso owel mampa, obveel Nziã ãtuɛɛn, otsiil ndɛ, owi ayio ndɛ y’ãyɛɛn m’ɔ̃nywã ndiri: «Ewal edza, yi-bu nzuru a mɛ̃.» 27 Ke mbee oŋɔ̃, ndɛ owel mbiɔ a mbal ã bvine, obveel Nziã ãtuɛɛn, owi ayio y’ãyɛɛn m’ɔ̃nywã ndiri: «Enywã mɔ̃ byɛ bam bueel, 28 mã-bu ãkel ã mɛ̃, ãkel m’ondoo, m’ãtsɔɔn me ndɔɔ ɔ̃bobɔ a baal, kwɛn bɔ abɔɔ odzeel b’ãbi. 29 Mɛ̃ eyɛɛn byɛ wɛn, bɛɛn nonɔ̃, mɛ̃ bvool kieel k’ebenywã mbal ã bvine mã wɛ, tiil tsoo li ekieel enywã mɛ̃ mɔ̃ m’emfa ekyam ye byɛ onse Okwɛn o Tal a mɛ̃.» 30 Ke mbee a ŋ’eyam bɔ ãnziĩ, bɔ apal me ndɔɔ yi ayi nkio a ɛ̃ti mi Olibve.

31 Obobɔ, Yeso olieel bɔ ndiri: «Kɛn a me tsia wu, m’ã̀ya me mɛ̃ ã̀nziool byɛ bueel onse okiool. Ke ngwel wɛ, ákel bubu: "Mɛ̃ èbɛɛl ɔ̃mbuaal-anyam, ɔ̃kel wu emɛ̃mɛɛ̃ àtsɔɔn✝." 32 Kɛn a ke mbee osiool o mɛ̃, mɛ̃ ètsɔɔn nkwel a byɛ ke Ngalile.» 33 Piɛɛl abvuru oyɛɛn, olieel ndɛ ndiri: «Mfam, onkyam ŋɛn m’ã̀ya me yɛ ãnziool bakyɛ bueel, mɔ̃ k’ã̀nziool mɛ̃ bam wɛ!» 34 Yesu bu abveel ndɛ bubu: «Taa-taa bam, mɛ̃ eyɛɛn yɛ wɛn, kɛn a me tsia wu, ye k’ekuaal nswee, yɛ àtwɛn nsa tyel wɛn yɛ ke yɛɛ mɛ̃ wɛ.» 35 Piɛɛl olieel ndiri: «Onkyam ŋɛn ebvaan mɛ̃ ekwa ye yɛ, mɛ̃ ke nkoo k’etwɛn wɛn mɛ̃ ke ngyɛɛ yɛ wɛ!» Obobɔ, ayio bueel ayɛɛn kɛn a bubu.

36 Ke mbee oŋɔ̃, Yeso otɔ y’ayio ke mboo yi ata me Ngetesemane. Ndɛ olieel bɔ ndiri: «Ebva nsɛn ŋã, mɛ̃ èsyal ku me ndɔɔ yi eyebuɛɛn.» 37 Ndɛ owel Piɛɛl, ye baan a Dzebede b’abɔɔl ange-buaal. Ndɛ obvi ãwua y’ãnyiĩ oyoo. 38 Ndɛ bu alieel bɔ ndiri: «Mɛ̃ eyoo ãwua mɛn mɛ̃ ngyii ekɔɔ y’epfu. Esiil ŋã, ekal angɔ-mwiĩ ye mɛ̃.» 39 Ndɛ osyel muaan-lala, obvi ãbuo mbwii me nsie, bu abuɛɛn bubu: «Taal, okɛɛn yɛ dzii, siaal mbiɔ yi lala ye mɛ̃. Kɛn a yɔɔl kwɛn yɛ bee be nzii mɛ̃ osa, yɛ sa b’edzii yɛ.» 40 Ndɛ okɔɔl ol’ayio ange-atyel, oyebɔɔ bɔ amaayiool me twal. Ndɛ bu alieel Piɛɛl bubu: «Obobɔ, byɛ ŋɛn k’eman k’ekal angɔ-mwiĩ si ekal lio ngemɔ ye mɛ̃ wɛ! 41 Ekal angɔ-mwiĩ bvool ebuɛɛn, kwɛn byɛ ebee m’ɔ̃mbio obva. Ɔ̃fel oli ye mpɛn, kɛn a nzuru eli y’okwal.» 42 Ndɛ osyel muaan-lala li nsa yuaal, bu abuɛɛn bubu: «Taal, okɛɛn mbiɔ yi, k’akoo k’asiaal yɔ lala ye mɛ̃ wɛ, kɛn ebvaan mɛ̃ enywã yɔ, oŋɔ̃ yɔɔl kwɛn yɛ sa b’edzii yɛ!» 43 Ndɛ okɔɔl bvool ol’ayio, oyebɔɔ bɔ amaayiool me twal, ke ngwel wɛ bɔ mviil ãl’ãyii y’olyam. 44 Ndɛ bvool osiil bɔ, osyel lala me ndɔɔ yi ayebuɛɛn li nsa tyel. Ndɛ oyɛɛn ãndɔɔ mãmã. 45 Ŋ’ekɔɔl ndɛ ol’ayio, ndɛ olieel bɔ ndiri: «Byɛ kɛn eli me twal bvool ebewuun! Lio ekoo, ŋ’àtiɔ Muaan a mbuul me mviɔɔl mi anga-ãbi. 46 Etɛɛn, bia-byɛ eyi! Mbuul wu àtiɔ mɛ̃ oyii tsotsoo.»

47 Ŋ’ékeyɛɛn Yeso kɛn ãndɔɔ omɔ̃, mbuul wu ata me Yuda, wu áli ngɔmɔ̃ onse ayio kuun ye buaal otɔ. Ndɛ áli y’embuul e baal b’ábiri epwel y’ɛ̃mpaã. B’áyuɔɔl baal obɔ amfam b’angaa-a-Nziã y’akuul-kuul a yam. 48 Yuda wu àtiɔ Yeso al’amaaliaal baal obɔ eliĩ ki èsa ndɛ, ndiri: «Mbuul wu èbuun mɛ̃, ndɛ ondɛ, esiin ndɛ.» 49 Tswa-a-tswa oŋɔ̃, Yuda osyel tsotsoo a Yeso, olieel ndɛ bubu: «Enswɛɛn obɔ, Ɔ̃tee!» Ndɛ bu abuun ndɛ. 50 Yeso bu alieel ndɛ ndiri: «Ndoo a mɛ̃, b’eyi yɛ osa, sa bɔ.» Obobɔ, baal obɔ asyel tsotsoo a Yeso, asiin ndɛ, bu akuru ndɛ. 51 Ngɔmɔ̃ onse b’áli ye Yeso oyɔɔ epwel, opfel ɔ̃sal a ngaa-a-Nziã wu ɔ̃nɛn kyɛ, bu atsɔɔ ndɛ tswi. 52 Kɛn a Yeso olieel ndɛ bubu: «Bveel epwel e yɛ ke mboo a kyɛ. Ke ngwel wɛ, baal bueel b’akieel awa epwel, akieel akwa hɛ̃ m’epwel. 53 Yɛ atsam wɛn mɛ̃ ale ke nkoo k’eta Tal a mɛ̃ mbel, kwɛn ndɛ ayuɔɔl mɛ̃ alili ŋã nkel* a ãnzwel yi enduru kuun ye mbuaal wɛ? 54 Ke mɛ̃ esa obobɔ, emfa emã ki ekoo ãndɔɔ m’ákel onse Ɔ̃nkaan a Nziã? Ke ngwel wɛ, mɔ̃ ayɛɛn ndiri ebvaan ãndɔɔ ãbwel m’emfa okyɛ.»

55 Ke mbee oŋɔ̃, Yeso olieel embuul e baal ndiri: «Byɛ ewal mɛ̃ onge edzuul, kwɛn byɛ eya ola mɛ̃ y’epwel y’ɛ̃mpaã me ndɔɔ yi esiin mɛ̃? Ãtsoo mbueel, mɛ̃ ékebva nsɛn onse Nzɔ a Nziã me ndɔɔ yi eyiool, kɛn a byɛ k’ésiin mɛ̃ wɛ. 56 Kɛn a m’asi mã mbueel, me ndɔɔ yɛn ãyɛɛn m’aliaal-ɛ̃kiɛɛn a Nziã m’ákel ãkoo. Obobɔ, ayio bueel ayiri ndɛ, bu abal.»

57 Baal b’ásiin Yeso abiri ndɛ ola Kayif wu ngaa-a-Nziã wu ɔ̃nɛn. Ayiool b’ãngel y’akuul-kuul ábvɔɔn okɔ. 58 Piɛɛl ákeluɛɛn a Yeso lala tiil ekɔɔ e nzɔ a ngaa-a-Nziã wu ɔ̃nɛn. Ndɛ osam onse mwiĩ a kyɛ, bu abvi nsɛn y’ankiaal a kyɛ, me ndɔɔ yi atal emfa ki esɛn ãndɔɔ omɔ̃. 59 Amfam b’angaa-a-Nziã ye mbal yi nɛn yi Ayuda yueel ákebii elyal ki mfi-mfya ki akel Yeso, kwɛn awa ndɛ etumbu ki epfu. 60 Kɛn a bɔ k’abɔɔ kyɛ wɛ, onkyam ŋɛn baal ákeya ndɛ ãndɔɔ oburu. Ke mbee oŋɔ̃, amwɛn buaal ba mfya ayi. 61 Bɔ ayɛɛn bubu: «Mbuul wu álieel ndiri: "Mɛ̃ nkoo k’etsal Nzɔ a Nziã bvool k’etuu yɔ m’ãtsoo mbuaal✝."» 62 Obobɔ, ngaa-a-Nziã wu ɔ̃nɛn otɛɛn bvool ofuul Yeso ndiri: «Yɛ yi abveel pyɛ? B’eyɛɛn yɛ omã m’ãbuu m’eliaal baal ba me ndɔɔ a yɛ?» 63 Kɛn a Yeso owuun pi. Ngaa-a-Nziã wu ɔ̃nɛn bu alieel ndɛ bubu: «Mɛ̃ etam yɛ k’alab ɔ̃kyel me nkuũ a Nziã wa mwiĩ, me ndɔɔ yɛn yɛ yɛɛn bee okɛɛn yɛ ndyam li Mãsia wu Muaan a Nziã.» 64 Yeso obveel ndɛ ndiri: «Yɛ bu lieel yɔ obɔ. Kɛn a mɛ̃ eyɛɛn byɛ wɛn, bɛɛn meba ŋã, byɛ ekieel emwɛn Muaan a mbuul me nsɛn me kuɔɔl ki elam ki Nga-Waan, bvool k’eya ndɛ onse epɛn ke ywel.» 65 Obobɔ, ngaa-a-Nziã wu ɔ̃nɛn okɔɔl ekɔ, y’ãyɛɛn m’ɔ̃nywã ndiri: «Ndɛ osiaan Nziã! Bia-a-byɛ bvool k’eli ye kɔɔ e mbuul wu ayɛɛn bia-byɛ ãndɔɔ mã wɛ, nzal-a-ŋɛn byam eyoo k’esiaan ndɛ Nziã.» 66 Byɛ ekuru omã? Bɔ abveel ndɛ ndiri: «Ndɛ ebvaan akwa✝!» 67 Ke mbee oŋɔ̃, bɔ afaan Yeso ãntɛɛ m’osu, bvool anyam ndɛ ɛ̃nkwaã. Bakyɛ ayuul ndɛ ãmpal y’ãyɛɛn m’ɔ̃nywã ndiri: 68 «Mãsia, okɛɛn yɛ li ɔ̃liaal-ɛ̃kiɛɛn a Nziã, ta bvua, wu obɛɛl yɛ nã!»

69 Ŋ’esa oŋɔ̃, Piɛɛl ábvi nsɛn onkwel-a-nzi, onse ekɔɔ. Ɔ̃sal ngɔmɔ̃ wu ɔ̃kaal osyel tsotsoo a ndɛ, bvool olieel ndɛ ndiri: «Yɛ, yɛ hɛ̃ áli ye Yeso wu ɔ̃fi-Ngalile!» 70 Kɛn a Piɛɛl otwɛn ke nkwel a baal bueel ndiri: «Mɛ̃ ke ngyɛɛ b’edzii yɛ oyɛɛn wɛ.» 71 Onge bɛn ndɛ al’oyii ayi mpyal ɔ̃nywã wu ekɔɔ, ɔ̃sal ɔ̃kyam wu ɔ̃kaal omwɛn ndɛ bvool olieel b’áli oŋɔ̃ ndiri: «Mbuul wu áli ye Yeso wa Nadzalet.» 72 Piɛɛl bvool otwɛn ndiri: «Mɛ̃ ndab ɔ̃kyel wɛn, mɛ̃ ke ngyɛɛ mbuul ondɛ wɛ.» 73 Ke mbee a muaan-lio, b’áli oŋɔ̃ asyel tsotsoo a Piɛɛl bvool alieel ndɛ ndiri: «Taa-taa bam, yɛ hɛ̃ li ngɔmɔ̃ onse baal obɔ, ke ngwel wɛ eyɛɛn e yɛ efɛn yɛ.» 74 Piɛɛl bu abvi oyɛɛn ndiri: «Yɔɔl Nziã awa mɛ̃ etumbu, okɛɛn mɛ̃ epfuru! Mɛ̃ ndab ɔ̃kyel wɛn mɛ̃ ke ngyɛɛ mbuul ondɛ wɛ!» Kɛn alili oŋɔ̃, nswee okueel. 75 Obobɔ, Piɛɛl bu ayeel ãyɛɛn m’éyɛɛn Yeso ndɛ ndiri: «Ye k’ekuaal nswee nonɔ̃, yɛ àtwɛn nsa tyel wɛn yɛ ke yɛɛ mɛ̃ wɛ.» Ndɛ bu apal nkwel-a-nzi, bu abvi olel ye nkyɛɛl yueel.