Êxodo 11

आखरी पिड़ान चेतावणी

1 पुशो बोगवान मुसाह केयो, "एक उंजु वेला मी फिरोन एने मिस्र देसा पोर टाकथु, तान पासाण तो तुमूह ता रेन जाणे देय; एने जुलबूखे तो जाणे देय तुलबूखे तुमू आखाह जोरूड़ काढ़ देय। 2 एवी मार पोरजाह मारो ज्यो उकुम होमलाड़ काय एक एक एदमी जान तान आहेंल्या, एने एक एक बायकु जिन तीन आहेणल्यु फाय रेन होना चांदीन गेयणो मांग लेय।" 3 तेवी बोगवान मिस्री माणहाह तान माणहा पोर गिणाता किऱ्यो। एने ज्याह रेन वादार तो एदमी मुसा मिस्र देसा माय फिरोनान आदिकारी एने माणहान नेजरी माय जुलूम मुठो इतो।✝11:3 निर्गमन 3:21

4 ओवतो मुसा फिरोनाह केयो, "बोगवान इहकेरीन किथे, काय आरदी रातीन आसपास मी मिस्र देसान विच रेन जाण्यो हे। 5 तेवी मिस्र माय राजगादी पोर बोहणार फिरोनान पेल्ला सोराह लागाड़ीन ते गेरटी देलनार पावेरनीन पेल्लो सोरा वोर; एने जेनवेरान पेल्ला पिला वोर सोब मोर जाती। 6 एने आखा मिस्र देसा माय मोटलो रेड़नो होमलाय, न्या वोर काय तान होस नाहते केदी इयेल हे एने नाह एय। 7 पुण इस्राएली माणहान उगे, काय माणुह काय जेनवार, काल्ला पोर काल्लो चितो बी नाय बुकी; तिहकेरीन तुमू जाण लिवो काय मिस्री माणहा एने इस्राएली माणहा माय मी बोगवान गालो पाड़थो। 8 तेवी तारा ज्या सोब आदिकारी माणहे मार फाय आवीन माहु वोंदीन ज्य केती, ‘तारा आखा माणहा हिऱ्यो न्या रेन निकेल जा।’ एने तान पासाण मी निकेल जाह।" ज्य किन मुसा मोठेस रागा माय फिरोन फाय रेन निकेल गीयो।

9 तेवी बोगवान मुसाह किय दियेल इतो, "फिरोन तुमरी वातु नाय होमली; काहाकाय मी मिस्र देसा माय जुलूम चोमेत्कार केरू।" 10 मुसा एने हारून फिरोनान ओंगाण ज्या आखा चोमेत्कार केऱ्या; पुण बोगवान फिरोनान मोन उंजु वातड़ो केर दियेल, केरीन तो इस्राएली माणहाह तान देसा माय रेन जाणे नाह दिनो।