1 जो जो जागो इस्राएली कनान देसाम सापड़ायेल, ताह एलीआजर चाकऱ्यो, एने नुन ने बिटोख यहोशु, एने इस्राएली गेराणान डायडायान गेराणान मुखी मुखी एदमी ताह आपेल तो ज्‍यो हे। 2 ✝जो उकुम बोगवान मुसाह साड़े नोव गेराणान केरता आपेल इतो, तास ने गेत तान ईसा चिट्ठी टाकीन आपाय गीया। 3 मुसा एड़ी कुटूमाह तान जागो ताह यरदन नेदीन ती पार आपेल इतो; पुण लेवीन कुटूमाह दिहरा माणहान गेत काल्लो जागो नाह जुड़नो। 4 ✝युसूफान वोचीन दुय कुटूम एय जायेल एता, मतलब मनश्शे एने एप्रेम; पुण लेवीन कुटूमान माणहाह काल्लो जागो नाह आपानो, पुण ताह रेणेन केरता थोड़ाक हियोर एने तान पालन्या जेनवेरान चारान केरता खेत जुड़ना। 5 जो उकुम यहोवा मुसाह आपेल इतो तान गेत इस्राएली केऱ्या; एने ता देसाह वाट देना।

6 ✝तेवी यहुदि यहोशु फाय गीलगाल माय आवा; एने कनजी यपुन्नेन बिटोख कालेब ताह केयो, "तु जाणतेय काय बोगवानान सेवक मुसाह कादेशबर्ने माय मारे एने तारे बाराम काय कियेल इतो। 7 ✝बोगवानान सेवक मुसा जेवी माहु कादेशबर्ने रेन देसान पोतो लागाड़नेन केरता मोकलेल इतो, तेवी मी चालीह वोरह्यान इतो, एने मी खेरी मोना केरीन ता फाय खोबेर लावो। 8 एने मारा हाती जा मार हेऱ्या जायेल एता, ता ते माणहान मोनाम बिय रिगाड़ दियेल एता; पुण मी पुरी रिती से आपणो बोगवान यहोवान वात मान्यो। 9 ✝तेवी ते दिह मुसा सुगोण खाएन माहु केयो, ‘तु पुरी रिती से मारो बोगवान यहोवान वात मानेल हे, केरीन जी बुयी पोर तु तारा पाय मिलेल हे ती कायेम ने केरता तारी एने तारा सोरान ईसो एय जाय।’ 10 एने एवी देख, ज्यी वात यहोवा मुसाह तुलबुखे कियेल एती, जेवी इस्राएली माणहे जेंगलाम बोटेकते फिरताला; तुलबुखे रेन ज्या चालीह ने पाच वोरह्या वोर बोगवान तान वचनान गेत माहु जीवतालो मिलेल हे। 11 मी एवी बी तोलोस ताकेतवोर हे, जोलोक ताकेतवोर मी तुलबुखे इतो, जेवी मुसा माहु जाणकारी लेणेन केरता मोकलेल इतो, मी ता दिह्यान गेत एवी बी लेड़ाणेन तियार हे। 12 केरीन तो बोयड़ावालो ईलाको माहु आप दिवो, जाह यहोवा जुलूम वेगोन ते दिह माहु आपणेन वचन आपेल इतो; तुलबुखे तुमूह मालुम पुड़ेल एतो काय ताहरी ताकेतवोर अनाकी माणहे रेतेह एने हियोर जुलूम मोठा एने बांदाबोस माय हेते; एय सिकेह काय यहोवा मार हिऱ्यो रेय एने यहोवान वचनान गेत मी ताह निकाल नाहाडु।"

13 यहोशु यपुन्नेन बिटोख कालेबाह बोरकेत आप्यो, एने यहोशु हेब्रोन हेयराह तान सोतान ईसो केर दिनो। 14 एने हेब्रोन हियोर एवी बी कनजी यपुन्नेन बिटोख कालेब ने कुटूमान ईसो हे, काहाकाय तो इस्राएल ने बोगवान यहोवान उकुम खेराय माय मान्यो एने ता पोर पुरो बुरहो किऱ्यो। 15 हेब्रोन हेयरान नाव पेल किर्यतर्बा एतो, काहाकाय अर्बा अनाकी माणहाम रेन आखाम रेन मोठो एदमी इतो; तान बाद देसाह सान्ती जुड़नी।