यहोशु 20

आसरान हेयरान ठेरावणो

1 ✝ 20:1 गिनती 35:9-34; व्यवस्था 4:41-43; 19:1-13 उवतो बोगवान यहोशुह केयो, 2 इस्राएल माणहाह ज्‍य के, "तुमू तुमरी केरता आसरान हेयरान चेरचा किरेल इतो तान पारमाणे ताह निवाड़ीन मीलो, 3 केदी एखेह माणुह एगदा माणहाह बुलचूक माय मार देय, तो ता हेयराम नाह जाय, एने ता खुनान बोदलो लेणारे माणहाह रेन वोचणेन केरता तुमरा आसरान हियोर ठेराती। 4 तो माणुह ता गावाम रेन एगदा हेयराम नाह जाय, एने ता हेयरान बायणा पोर उबरीन ता गावान डायडायान सामने तान काम केय होमलावे; तेवी ता ताह गावाम तान विचीम रेणेन केरता जागो आपी, जा माय तो ता हिऱ्यो रेय। 5 एने केदी खुनान बोदलो लेणार तान पासाण लागीन तान पासाण आवी, ताहार ता खुनीह तान आथाम नाय हुपे, काहाकाय तो तान आहेंल्‍याह बुलचूक माय एने पेल ता हिऱ्यो बिगेर दुसमोनाय मेलीन माऱ्यो। 6 एने जाह वोर तो मोंडलीन सामने नियावान केरता उबी नाय रेय, एने जाह वोर ता दिह्यान मुखी चाकऱ्यो नाय मोर जाय, ताह वोर तो तास हेयराम रेय; तान बाद तो खुनी तान गावाम जाएन तान गेरा माय पोशो रेय।"

7 केरीन इस्राएल ने माणहे नप्तालीन बोयड़ावाला देसाम गेलील ने केदेशाह, एने एप्रेमान बोयड़ावाला देसाम शेकेमाह, एने यहुदान बोयड़ावाला देसाम किर्यतर्बा, जो हेब्रोन बी केवाथे, आसरान जागो चोखालो ठेरायो। 8 एने यरीहोन आहने यरदन नेदीन पुर्व उगे रूबेन ने गेराणान ईसाम बेसेराह, जो जेंगलाम सापाट जागा पोर वोह रिनोह, एने गादान गेराणान ईसाम गीलादान रामोताह, एने मनश्शेन गेराणान ईसाम बाशान ने गोलान गावाह ठेराया। 9 आखा इस्राएलीन केरता, एने तान विचीम रेणारे पाराया देसावालान केरता बी, जा गावे ठेराय गीया, काय जो कुण एगदा माणहाह बुलचूक माय मार देय तो ताम रेन एगदा गावाम नाह जाय, एने मोंडलीन सामने उब रेणेन पेल खुनान बोदलो लेणारान आथा केरीन नाय माराय।