1 मनश्शे ते युसूफान पेल्लो बिटोख इतो, केरीन तान गेराणान ईसो चिट्ठी टाकीन ज्‍यो जागो आप्या। मनश्शेन पेल्लो बिटोख गीलादान आबोख माकिर सिपाय इतो, केरीन तान वोसीह गीलाद एने बाशान ने ईसो जुड़नो। 2 मनश्शेन कुटूमान दिहरा कुटूमाह बी जागो आप्या, ता कुटूम अबीएजेर, हेलेक, अस्रीएल, शकेम, हेपेर एने शमीदा एता; ज्या आखा मनश्शेन दिहरा सोरा एता, जो युसूफान बिटोख इतो, न्या माणहान कुटूमे थोड़ोक जागो सापड़ाया। 3 पुण सलोफाद हेपेरान बिटोख इतो, हेपेर गीलादान बिटोख इतो, गीलाद माकिरान बिटोख इतो, एने माकीर मनश्शेन बिटोख इतो, पुण सलोफादान बेटहेख नाह एता; तान पाच बेटह्युख एत्यु, बेटह्युख ने नाव महला, नोवा, होगला, मिल्का, एने तीर्सा हे। 4 ✝ तेवी त्यु एलीआजर चाकऱ्यो एने नुन ने बिटोख यहोशु, एने आखा मुखी फाय जाएन केणे बाज गीयो, यहोवा मुसाह उकुम आपेल इतो काय, तो आमुह आमरा बायह्याख ने विचीम ईसो आपी; ते यहोशु यहोवान उकुम मानीन त्युह त्युन आजालाख ने विचीम ईसो आप्यो। 5 इह केरीन यरदन नेदीन ती पार गीलाद एने बाशान देसाह सोड़ीन मनश्शेन कुटूमान ईसा माय दोह ईसा उंजु जुड़ना। 6 काहाकाय मनश्शेन विचीम मनश्शेन वोसीन सोरीह बी ईसो जुड़नो, एने मनश्शेन दिहरा सोराह गीलाद देस जुड़नो।

7 मनश्शेन जागो आशेर एने मीकमतात ने ईलाकान विचीम इतो, ज्‍यो शेकेमान आहने हे; ज्यान एद्दी देक्षिण माय एन तप्‍पुह ने माणहे रेतेह ता वोर जाताली। 8 तप्‍पुह गाव ते मनश्शेन एतो, पुण तप्‍पुह हियोर जो मनश्शेन एद्दी पोर एती, एप्रेमीन इतो। 9 ओवती तारेन ती एद्‍दी कानान खोदरे वोर पोचीन तान देक्षिण ने उगे वोल गीयी, पुण मनश्शेन हेयरान विची माय एता तीबी एप्रेमान ठेराना; एने मनश्शेन एद्दी खोदरान उत्तर ने उगे एती जी देरीये वोर जात रियेल एती। 10 देक्षिण ने उगेवालो देस एप्रेमाह एने उत्तर उगेवालो मनश्शेह जुड़नो, एने तान एद्दी देरीयो ठेरानो; ती उत्तर माय आशेरान उगे पुर्व माय इस्साकार ने एद्दी हेऱ्यी लागेल एती। 11 इस्साकार एने आशेरान एद्दी माय मनश्शेह ज्या हियोर जुड़ना, बेतशान एने तान आखा हियोर, बेतशान, यीबलाम एने तान आखा हियोर, दोर माय रेणारे माणहा बेल तान आखा हियोर, तानाक माय रेणारे माणहा बेल, तान आखा हियोर एने मगीद्दो माय रेणारे माणहा बेल तान आखा हियोर, तीसरो ते नापेत बी केवाथे। 12 ✝पुण मनश्शेन माणहे ता हेयराह नाह आरीव सेक्‍या, केरीन कनानी माणहे ताहरी रेते रेना। 13 पुण इस्राएली माणहे ताकेतवोर एय गीया, तेवी ता कनानवाला माणहाह काम केरावणे बाज गीया, पुण ता कनानी माणहाह बाहेर नाह निकाल सेक्‍या।

14 युसूफान सोरा यहोशुह केणे बाज गीया, "तु आमुह चिट्ठी टाकीन बुयीन फोक्‍तो एक ईलाको आप्यो, पुण आमु जुलूम होवटा माणहे हेते; तु आमुह ता देसान एक ईसोस काहा आप्यो, काहाकाय मालीक आमुह बोरकेत आपेल हे।"

15 यहोशु ताह केयो, "केदी तुमू गेणती माय जुलूम एती, एने एप्रेमान बोयड़ावालो देस तुमरी केरता आत्यो एय, ते परिज्जीन एने रपायीन देस जो जेंगलाम हे, ता माय जाएन जाड़ाह काटीन तुमरे रेणेन केरता जागो बाणावो।"

16 ता यहोशुह जापाप आप्या, "तो बोयड़ावालो देस आमरी केरता आत्यो हे; एने बेतशान एने तान हेयराम रेणारे, एने यिज्रेल ने गाटाम रेणारे, जोला कनानी नेचाला देसाम रेतेह, ता आखा फाय लोड़ान टांगा एता।"

17 ओवतो यहोशु एप्रेम, एने मनश्शेन एने युसूफान आखा गेराणान माणहाह केयो, "होव तुमू गेणती माय जुलूम हेते, एने तुमरी ताकेत बी मोठी हे, केरीन तुमूह वोदार बुय जुड़ने जुवे। 18 बोयड़ावालो देस बी तुमरो एय जाय; काहाकाय तो जिंगोल ते हे, पुण तान जाड़े काट टाकहो, तेवी तान आहने पाहनेन देस बी तुमरो एय जाय; काहाकाय केदी कनानी माणहे ताकेतवाला रेती, एने ता फाय लोड़ान टांगा बी रेती, तीबी तुमू ताह ता रेन निकाल सिकहो।"