1 जुलूम दिह्यान पासाण, जेवी यहोवा इस्राएलीह तान कावदेन वाला दुसमोना से आराम आप्यो, एने यहोशु डायो एने जुलूम वोयान एय गीयो, 2 तेवी यहोशु आखा इस्राएलीह, मतलब डायडाया, मुखी एदमी, एने आदिकारीह हादिन केणे बाज गीयो, "मी ते एवी डायो एने जुलूम वोयान एय जायेल हे; 3 एने तुमू दिखेल हेते काय तुमरो बोगवान यहोवा तुमरे वोजेसे ज्‍यु आख्‍यु जात्‍यु हिऱ्यो काय काय किरेल हे, काहाकाय जो तुमरी उगे रेन लेड़तेन आयेल हे तो तुमरो बोगवान यहोवा हे। 4 दिखो, मी ज्‍यु वोचेल जात्युन चिट्‍ठी टाक टाकीन तुमरा गेराणान ईसो केर दियेल हे; एने यरदन रेन पश्‍चिम उगेवालो मोटला देरीया वोर रेणार्‍यु त्यु आख्‍यु जात्‍युह बी ओहलोच आपेल हे, जाह मी काट दियेल हे। 5 एने तुमरो बोगवान यहोवा ताह तुमरे सामने रेन तान देसाम रेन निकाल देय; एने तुमू तुमरो बोगवान यहोवान वचनान गेत तान देसान आदिकारी एय जाहो। 6 केरीन जुलूम ईमोत बांदिन, जो काय मुसान नेमान पुस्तेक माय लिखेल हे ताह मानो एने पालेन किरो ताह रेन नाहते जीवड़े एने डाखरे उगे वोलज्‍यो। 7 एने ज्‍यु जात्‍यु तुमरे विचीम रेय जायेल हेत्यु तान विचीम मा जाहो, एने तान देवतान नाव मा लिहो, एने तान नावान सुगोण मा खाहो, एने तान बोक्ती मा किरहो, एने तान पाया मा पोड़हो। 8 पुण जीहे आजीन दिह वोर तुमू तुमरो बोगवान यहोवान बोक्ती माय लाग रेतेह, तिहेच केरीन रेया किरज्‍यो। 9 काहाकाय यहोवा मोटली एने ताकेतवोर जात्‍युह तुमरे सामने रेन निकाल नाहाड़ेल हे; एने तुमरे सामने आज वोर कुण टिकनो नाह। 10 ✝तुमरे माय रेन एक माणुह एजार माणहाह नाहाड़ देय, काहाकाय तुमरो बोगवान यहोवा तान वचनान गेत तुमरी उगे रेन लेड़ाह। 11 केरीन तुमूह तुमरो बोगवान यहोवान बोक्ती केरते रिज्यो, एने तुमरा पुरा जीवा केरीन मोंग किरज्‍यो। 12 काहाकाय केदी तुमू वोलीन तुमरे विचीम वोचेल ज्‍यु जात्‍युह रेन मिलाय जाहो, एने ता हेऱ्या वाराड़ केरीन ता हेऱ्या मिलाहो, 13 ते खेरीच जाण जावो काय ओंगाण तुमरो बोगवान यहोवा ज्‍यु जात्‍युह तुमरे सामने रेन नाय निकाली; पुण तुमरी केरता जाल एने फांदा, डिलान केरता कोड़ा एने तुमरा डोलान केरता काटा बोण जाती, एने सेवल्‍यी बुखेत तुमू ज्यी हाजाली बुई पोर रेन जो तुमरो बोगवान यहोवा तुमूह आपेल हे खेतेम एय जाहो।

14 "हुमलो, आज ते मी तीस वाटे रेन जाण्‍यो हे जी आखी दुनियान हे, एने तुमू आखा आप आपणा मोनाम जाणतेह काय तुमरो बोगवान यहोवा तुमरे बाराम जोली बोलायीन वात्यु केयो, त्युम रेन एक बी बिगेर पुरी ईयेल नाह रेनी, त्यु आख्‍यु तुमरी केरता पुऱ्यू एय जायेल हेत्यु; त्युम रेन एक बी बिगेर पुरी ईयेल नाह रेनी। 15 एने जीह केरीन तुमरो बोगवान यहोवान कियेल बोलायीन वातु आख्‍यु तुमरी केरता पुऱ्यू ईयेल हेत्यु, तिहेच केरीन त्यु आख्‍यु तेकलीत बी तुमरी पोर लावी; एने जी हाजाली बुय तुमरो बोगवान यहोवा तुमूह आपेल हे, ती पोर रेन खेतेम केर देय। 16 जेवी तुमू ती वाचान जीह तुमरो बोगवान यहोवा तुमूह उकुम आपीन ता हिऱ्यो बांदाड़ेल हे तीह तोड़ीन पाराया देवतान बोक्ती किरहो एने तान पाया पोड़हो तेवी यहोवान राग तुमरी पोर बोड़ेक उठी, एने तुमू ज्या हाजाला देसाम रेन, जो तुमूह आपेल हे, उतवाल्‍याह खेतेम एय जाहो।"