1 दिहरी चिट्ठी शिमोनान नावा पोर, मतलब शीमोनान गेराणान नावा पोर तान वोची पारमाणे निकल्यी, एने तान ईसो यहुदान ईसान विचीम ठेरानो। 2 ✝तान ईसाम ज्या हियोर हेते, बेर्शेबा मतलब शेबा, मोलादा, 3 हसरशुआल, बाला, एसेम, 4 एलतोलद, बतुल, होर्मा, 5 सीकलग, बेत्‍मर्काबोत, हसेर्शुसा, 6 बेतलबाओत, एने शारूहेन; ज्या तेरा हियोर एने तावाला गाव ताह जुड़ना।

7 ताह ऐन, रिम्मोन, एतेर, एने आशान ज्या चार हियोर एने तावाला गाव जुड़ना; 8 एने बालत्बेर मतलब नेगेब ने रामा वोर ज्या हेयरान कावदेन आखा गाव बी न्याह जुड़ना, शिमोनीन गेराणान ईसो तान वोची पारमाणे ज्‍योस ठेरानो। 9 शिमोनी माणहान ईसो यहुदा वोचीन ईसाम रेन आपानो; काहाकाय यहुदान ईसो तानकेरता जुलूम इतो, केरीन शीमोनी माणहान ईसो तास ने ईसान विचीम ठेरानो।

10 तिसरी चिट्ठी जबुलून ने वोची पारमाणे तान कुटूमान नावा पोर निकल्यी, एने तान ईसान एद्‍दी सारीद जागे वोर पोचनी। 11 एने तान एद्दी पश्‍चिम उगे मरला जागे लागती दब्‍बेशेत माय पोचनी; एने योकनाम ने सामने खोदेर वोर पोचनी। 12 पोशी सारीद रेन ती पुर्व उगे वोलीन किसलोत्तारोबान एद्दी वोर पोचनी, एने तारेन ओंगाण जाएन दाबरत माय एने यापी उगे जात रेनी 13 ता रेन ती पुर्व उगे ओंगाण जाएन गथेपेर एने इत्कासीन गीयी, एने ता रिम्मोन माय निकल्यी जो नेआ वोर पोसीर रेनीह; 14 तारेन ती एद्दी तान उत्तर उगे वोलीन हन्‍नातोन वोर पोचनी, एने यिप्‍तहेलान गाटाम जाय निकेलनी; 15 कत्तात, नहलाल, शिम्रोन, यिदला, एने बेथलेहेम; ज्या बारा हियोर एने तावाला गाव तास ईसान ठेराना। 16 जबुलून माणहान ईसो तान वोची पारमाणे ज्‍योस ठेरानो; एने ताम तान तान गावा बेल ज्यास हियोर हेते।

17 चोवथी चिट्ठी इस्साकार ने वोसी पारमाणे तान नावा पोर निकेलनी। 18 एने तान एद्दी यिज्रेल, कसुल्लोत, शुनेम 19 हपारेम, शीओन, अनाहरत, 20 रब्बीत, किश्‍योन, एबेस, 21 रेमेत, एनगन्नीम, एनहद्दा, एने बेत्‍पस्‍सेस वोर पोचनी। 22 ओवती ती एद्दी ताबोर, शहसुमा एने बेतशेमेश वोर पोचनी, एने तान एद्दी यरदन नेदी वोर जाय निकेलनी; इहकेरीन ताह सोला हियोर तावाला गावा बेल जुड़ना। 23 इस्साकार ने गेराणान ईसो तान वोसी पारमाणे हियोर एने गावा बेल ज्‍योस ठेरानो।

24 पाचवी चिट्ठी आशेरीन गेराणान वोची पारमाणे तान नावा पोर निकेलनी। 25 तान एद्दीम हेलकात, हली, बेतेन, अक्षाप, 26 अलाम्‍मेलेक, अमाद, एने मीशाल एता; एने ती पश्‍चिम उगे कर्मेल वोर एने शीहोरलीबनात वोर पोचनी। 27 ओवती एद्दी पुर्व उगे वोलीन बेतदागोन गियी, एने जबुलूनान ईसा वोर, एने यिप्‍तहेलान गाटाम उत्तर उगे लागती बेतेमेक एने नीएल वोर पोचनी एने उत्तर उगे जाएन काबुल वोर निकेलनी, 28 एने ती एब्रोन, रहोब, हम्‍मोन, एने काना लागती मोटला सीदोन पोचनी; 29 ता रेन ती एद्दी वोलीन रामाह लागती सोर *नावान किल्‍लावाला हियोर वोर जात रेनी; ओवती एद्दी होसान उगे वोलीन महलाब अकजीबान आहनेवाला देसाम लागती देरीयो वोर जाय निकेलनी, 30 उम्मा, अपेक, एने रहोब बी तान ईसाम ठेराय; इहकेरीन बावीस हियोर तान तान गावा बेल ताह जुड़ना। 31 आशेरीन वोसी पारमाणे तान ईसा हियोर एने गावा बेल ज्यास जुड़ना।

32 सोव्‍वी चिट्ठी नप्तालीन वोची पारमाणे तान नावा पोर निकेलनी। 33 एने तान एद्दी हेलेप रेन, एने सान्नीम ने वांज जाड़े रेन, अदामीनेकेब एने यबनेल लागती लक्कुम वोर जात रेनी, एने यरदन नेदी माय निवरी जाताली। 34 ता रेन ती एद्दी पश्‍चिम उगे वोलीन अजनोत्तबोर, एने ता रेन हुकोक पोचनी, एने देक्षिण, एने जबुलूनान ईसा वोर, एने पश्‍चिम उगे आशेरान ईसा वोर, एने पुर्व उगे यहुदान ईसान आहनेवाली यरदन नेदी पोर पोचनी। 35 एने तान किल्‍लावाला हियोर ज्या हेते, मतलब सीद्दीम, सेर, हम्‍मत, रक्कत, किन्नेरेत, 36 अदामा, रामाह, हासोर, 37 केदेश, एद्रेई, एन्हासोर, 38 यीरोन, मीगदलेल, होरेम, बेतनात, एने बेतशेमेश; ज्या उगणीह हियोर गावा बेल ताह जुड़ना। 39 नप्ताली गेराणान ईसा तान वोची पारमाणे हियोर एने तान गावा बेल ज्‍योस जुड़नो।

40 हातवी चिट्ठी वोची पारमाणे दान ने गेराणान नावा पोर निकेलनी। 41 एने तान ईसान एद्दी माय सोरा, एश्ताओल, ईरशेमेश, 42 शालब्बीन, अयालोन, यीतला, 43 एलोन, तिम्नाह, एक्रोन, 44 एलतके, गीब्‍बतोन, बालात, 45 यहुद, बनेबराक, गत्रीम्‍मोन, 46 मेयर्कोन, एने रक्कोन ठेराय, एने याफान सामनेवाली एद्दी बी तान एती। 47 ✝ एने दानान ईसो उंजु वोदार एय गीयो, काहाकाय दानी लेशम पोर चेड़ाय केरीन ताह जिक लेदा, एने ताह तालवार केरीन मारीन ताह तान ताबाम केरीन ताम रेणे बाज गीया, एने तान डायडायान नावा पोर लेमेशान नाव दान मेल्या। 48 वोसी पारमाणे दान ने गेराणान ईसो हियोर एने गावा बेल ज्‍योस ठेरानो।

49 जेवी देसान वाटणो एद्‍दीन पारमाणे पुरो एय गीयो, तेवी इस्राएली नुन ने बिटोख यहोशुह बी तान विचीम एक ईसो आप्या। 50 यहोवान केणेन गेत ता ताह तान मांगेल हियोर आप्या, ज्‍यो एप्रेमान बोयड़ावाला देसावालो तीम्‍नातसेरह हे; एने तो ता हेयराह पोशो वोहाड़ीन ताम रेणे बाज गीयो।

51 जा जा ईसा एलीआजर चाकऱ्यो, एने नुन ने बिटोख यहोशु, एने इस्राएलीन गेराणान डायडायान मुखी मुखी एदमी शिलो माय, मिलापवाला तोम्बुन बायणा पोर यहोवान सामने चिट्ठी टाक टाकीन वाट दियेल ता ज्यास हेते; इहकेरीन ता देसाह वाटणेन काम पुरो केऱ्या।